KUZOYA 33

Jakobo kukwana na Esau

1Nao Jakobo ukazighana, ukammbona Esau ukicha andwamweri na wandu wake maghana ana. Aho ukawiwaghia Lea, Raheli, na waja wai wawi wa kazi, waja wana. 2Waja wai wa kazi na wana wawo ukawiwika kiimbiri, na Lea na wana wake wikanugha, na Raheli na Josefu wikatua nyuma. 3Ela uo moni ukakiria imbiri kwawo, ukikughoghomesha hata andoenyi mando mfungade, hata ukavika kaavui na mruna.

4Ela Esau ukakimbia na iseghe kummara, ukammbwada na kumshishidia ukimsusugha; nawo wikalila na ndighi. 5Hata iji Esau wawusira meso ghake na kuzighana, ukawiwona waja waka na wana ukaghamba, “Ni weke ani awa mkwanye?” Jakobo ukaghamba, “Ni wana awa Mlungu uninekie ini mdumiki wako kwa wucha ghwake.” 6Nao awo wai wa kazi wikacha na wana wawo wikaghoghoma; 7na wokoni Lea ukacha na wana wake, wikaghoghoma; na kutua Josefu na Raheli wikacha wikaghoghoma.

8Esau ukakotia, “Na iji izungu jose nakwana najo kutambua kwaro ni wada?” Jakobo ukatumbulia, “Nirumirikie mesonyi kwa bwana wapo.” 9Ela Esau ukamzera, “Ivo niko navo vanikata mwanidu. Oho wadia ivo kuko navo.” 10Nao Jakobo ukaghamba, “Hata mwanidu, iji loli narumirikia mesonyi kwako, nakulomba kuwade manosi kufuma mkonunyi kwapo, angu kwa loli mwanidu kughuwona wushu ghwako, ni sa kughuwona wushu ghwa Mlungu; seji kwaniwada kwa kunirumiria nandighi. 11Ghiwuse nakuvoya agha manosi ghapo nakuredia, angu Mlungu moni waninekie kwa wungi, nani neko na va kukata.” Nao ukamshingira hata ukaghiwada agho manosi.

12Niko Esau ukaghamba, “Nndoko dighende, na ini nichakiria.” 13Ela Jakobo ukaghamba, “BWANA wapo wamanya angu wana ni watini, na mfugho rimu naro riaongosha. Ni suti nirilindie, kwa kukaia rikadwalwa na iseghe kwa ituku jimweri, mfugho rose radima kufwa. 14Kwa huwu bwana wapo ndekirie, na mdumiki wako ucheghee mboa-mboa kunughana na mwendo ghwa mfugho riko imbiri kwapo na wanake, hata nivike mzinyi kwa bwana wapo aho Seiri.”

15Nao Esau ukaghamba, “Leka nikusighanye na wandu wamu nikwanye nawo.” Ela ukaghamba, “Agho ni ghaki? Bora tu nirumirilo ni bwana wapo.” 16Nao Esau ukawuya cha Seiri jija ituku jeni. 17Ela Jakobo ukaghenda Sukothi ukaagha nyumba aho, ukaagha na viwanda kwa wundu ghwa ng'ombe. Kwa huwu andu aja kukawangwa Sukothi.#33.17 Sukothi: Kutambua kwaro ni “Viwanda.”

18Jakobo ukavika banana kufuma Padan-aramu, ukakaia muzi ghwa Shekemu, isanga ja Kanaani; nao ukabonya kambi yake aho kaavui na muzi. 19Ukaghua mbuwa kwa vibelele va feza ighana jimweri kufuma kwa Hamori ndee Shekemu; nao ukadunga hema yake aho.#Jos. 24.32; Joh. 4.5 20Ukaagha madhabahu ukaghiwanga irina jake El-Elohe-Israeli.#33.20 El-Elohe-Israeli: Kutambua kwaro ni “Mlungu wa Israeli.”

Currently Selected:

KUZOYA 33: TAITA

Highlight

Compare

Copy