KUZOYA 32

Jakobo kukuboisa kukwana na Esau

1Nao Jakobo ukighenda chia yake, weke malaika wa Mlungu wikakwana nao. 2Hata iji Jakobo orewiwonieghe ukaghamba, “Iji ni ijeshi ja Mlungu.” Ukakuwanga andu aja, Mahanaimu.#32.2 Mahanaimu: Kiarami kutambua kwaro ni “Majeshi awi.”

3Nao Jakobo ukaduma wadumi wizoe wikirie kwa mruna Esau, aja Seiri, isanga ja Edomu, 4ukawilaghira ukighamba, “Mzerenyi bwana wapo Esau: mdumiki wako Jakobo waghora huwu, ‘Naghendie ngakaia wughenyinyi kwa Labani hata idana, 5nani neko na ng'ombe, punda, mfugho, na wadumiki wa womi na wa waka. Niko nakudumia momu kukumanyisha, eri nirumirikie imbiri kwako bwana wapo.’”

6Nao waja wadumiki wikawuya kwa Jakobo wikighamba, “Davika kwa mwanyinyu Esau, nao wawuyacha kukumara uko na wandu maghana ana.” 7Jakobo ukaja wasi na kuobua na ndighi, ukawaghanya wandu orekoghe nawo, mfugho rose na ngamila mafungu awi, 8ukiririkanya, “Iji Esau wacha na kujikaba ifungu ja imbiri, ifungu ja kawi jadima kukimbia.”

9Nao Jakobo ukalomba ukighamba, “Ee Mlungu wa wawa Abrahamu, na Mlungu wa aba Isaaka; ee BWANA, oho korenizerieghe, niwuke na kuwuya isangenyi mzedu kwa kichuku chapo, na oho kuchanibonyera nicha. 10Ini sifwane kindo chingi kukatanishwa na ulo lukundo lwako, na wuloli ghwako kughuwonyere kwapo ini mdumiki wako; kwa kukaia nereruwukieghe Jordani na mzata ghwapo ghoni, ela idana nakaia mafungu awi. 11Kunikire nakulomba, kunikire nisekabo ni mwanidu, uo mwanidu Esau; angu namuobua na ndighi usechedibwagha isi diwose, wana na weke mae. 12Na oho korenilaghirieghe kukaia kuchanibonyera nicha na kuchichuria kivalwa chapo chikaie sa wungi ghwa msangagha ghwa baharinyi, chisetalikagha kwa wungi ghwaro.”#Kuz. 22.17

13Nao ukalala aja kio chija, ukawusa kufuma kwa ivo vilambo orekoghe navo, vipate kukaia manosi kwa mruna Esau, 14mburi maghana awi, fwandi mirongo iwi, ng'ondi maghana awi, bauru mirongo iwi, 15ngamila riongoshagha mirongo idadu andwamweri na wana wawo, ng'ombe mirongo ina na njau ikumi, weke punda wa waka mirongo iwi, na wa womi ikumi. 16Iri rose ukawineka wadumiki wake, ukawika mzighaniri kwa kula ifungu, na kula ifungu jikaie jiekeri, ukawilaghira wadumiki wake ukighamba, “Kirienyi imbiri kwapo, sena msighe wulalo aghadi ya kula ifungu, ja imbiri na ja nyuma.” 17Ukamlaghira uja wa ifungu ja imbiri, “Iji kwakwana na mwanidu Esau, nao ukukotie, ‘Oho ko mdumiki wani? Kwawuyaghenda hao? Na iri mfugho kuko naro ni rani?’ 18Kumtumbulie huwu, ‘Ni ra mdumiki wako Jakobo, ni manosi gha bwana wapo Esau, nao moni wori oko na nyuma uacha.’” 19Huwo koni ukamlaghira kilongozi wa kawi na wa kadadu, na wa mafungu ghose gherekoghe ghikinugha, “Mchaghora agho madedo gheni iji mwakwana na mwanidu Esau. 20Mchamzera, ‘Na mdumiki wako Jakobo wori oko na nyuma.’” Angu oreririkanyireghe, “Kewada nadima kumhoresha na agha manosi ghakiria imbiri kwapo, niko konyuma diwonane wushu kwa wushu, na kewada unirumirie.” 21Na agho manosi ghikakiria, ela uo moni ukasigharika na nyuma, ukalala kambinyi icho kio.

Jakobo kubukana aja Penieli

22Nao chija kio cheni, Jakobo ukawuka, ukawidwa waka wake wawi, waja wai wa kazi na wana wake ikumi na umweri, ukawiruwusa kiruwuko cha Jaboki. 23Nyuma ya kuwiruwusa, ukaruwusa wokoni vose orekoghe navo. 24Ela Jakobo ukasigharika uekeri; na mndumu ukacha ukabukana nao hata kaavui na ndoe kuela.#Hos. 12.3-4 25Nao iji uo mundu wawona angu ndemsimagha Jakobo, ukammbwada kiwonu, na bara yake ikategheruka iji orekoghe ukibukana nao. 26Uja mundu ukamzera, “Nisighe nighende angu ndoe yaawuyaela.” Ela Jakobo ukaghamba, “Kusaanirasimia sikusighagha.” 27Nao ukamzera, “Irina jako nani?” Ukamtumbulia, “Jakobo.” 28Uja mundu ukamzera, “Ndekuchaawangwa Jakobo sena, ela kuchawangwa Israeli, angu kwasimana na Mlungu na wandu kukasima.”#Kuz. 35.10 29Jakobo ukamzera, “Nakulomba kunighorie irina jako.” Ela uo mundu ukaghamba, “Kwaki kunikotiagha irina japo?” Na aho ukamrasimia.#Wat. 13.17-18

30Nao Jakobo ukakuwanga andu aja Penieli#32.30 Penieli: Kutambua kwaro ni “Wushu ghwa Mlungu.” ukighamba, “Angu nammbona Mlungu wushu kwa wushu sena hoku naduagha moyo.” 31Iruwa jerekoghe jajoka iji Jakobo orefumagha Penieli, ukaghenda ukitighina kwa wundu ghwa bara yake. 32Kwa wundu ughu, Waisraeli ndewijagha lugha lwa kiwonu andu lukwaniagha na bara hata linu, angu Jakobo oreadadiroghe lugha lwa bara aja kukwane na kiwonu.

Currently Selected:

KUZOYA 32: TAITA

Highlight

Compare

Copy