Horiso 62
62
Gơnang kơ Kră Yang 'Bok Kei-Dei mơsêh
Nơ̆r hơri Đawit pơm. Ăn kơ lu thây bơtho hơri kiơ̆ kơ tơ'nguơ̆ “Jôduthun”.
1Bơhngol inh pơdơh hiôk lăm minh Kră Yang 'Bok Kei-Dei đĕch;
Tơdrong dŏng pơklaih inh đơ̆ng Sư.
2Lăp minh 'nu Sư đĕch tơmo pĕng inh,
Păng dŏng pơklaih inh,
Kơđông kơjăp inh.
Inh huay pă pơgơ̆.
3Dĭng dang yơ dơ̆ng iĕm wă blah minh 'nu bơngai.
Đĭ-đăng lu iĕm hơdai wang wă pơlôch sư.
Thoi lĕ kơ tơnăr grê, thoi dur wă păk.
4Lu sư lăp pơđâu đĕch wă blah lê̆ sư đơ̆ng anih đe pôk sư;
Lu sư lăp kơ pơma hơlĕnh, 'bơ̆r lu sư hơpơi pŭn hiôk.
Mă-lei lăm jơhngơ̆m hiap pơtê̆. Sêla
5Ơ bơhngol inh pơdơh bĕ tơ anih Kră Yang 'Bok Kei-Dei;
Yua kơ inh chang hơmĕng kơ Sư.
6Lăp minh 'nu Sư đĕch mă tơmo inh gơnang,
Păng dŏng pơklaih inh,
Păng anih kơjăp inh, inh ưh pă pơpơ̆.
7Tơdrong dŏng pơklaih păng tơdrong ư-ang inh lăm.
Kră Yang 'Bok Kei-Dei tơmo kơjăp;
Tơmo inh păng anih inh kơ'nơp.
8Ơ kon pơlei, gơnang bĕ đĭ kơ Sư, ling-lang.
Tuh bĕ jơhngơ̆m ih kơ Sư Kră Yang 'Bok Kei-Dei Sư boih mă anih bơ̆n kơ'nơp. Sêla
9Sĭt tơpă, bơngai đe ưh kơ gĭt thoi kial dui jơhngơ̆m.
Bơngai đe gĭt 'biơ̆ kư̆m tơdrong kơ đei.
Atŏk tơ kơpal kĭ lu sư phiơl.
Đĭ lu sư hơiơch hloh kơ hơyuh kial dui jơhngơ̆m.
10'Nĕ gơnang kơ kĕ pơjuă đe.
'Nĕ gơnang hơmĕng kơ tơtông klĕ,
Mă đei mŭk tơmam lơ, 'nĕ kơ hơđơ̆ng kơ noh.
11Kră Yang 'Bok Kei-Dei đei khan, thoi âu:
Inh kơtơ̆ng 'bar wơ̆t tơdrong mơsêh noh Kră Yang 'Bok Kei-Dei.
12Ơ Kră Yang tơdrong 'mêm mơnat lăm Ih;
Yua kơ Kră Yang apah kơ rim 'nu kiơ̆ thoi đêl lu sư jang.
Currently Selected:
Horiso 62: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
