Lew 9
9
Arôn pơyơ̆r tơmam soi
1Lăm năr mă tơhngam Môis krao Arôn păng lu kon drŏ-nglo sư păng đĭ-đăng lu kră bơngai Isơrael. 2Sư khan bơtho Arôn thoi âu: Rôp iŏk bĕ minh pôm kon rơmo tơno wă pơm tơmam soi huai đơ̆ng yoch, minh pôm triu tơno pơm tơmam soi 'buh, 'bar tŏ noh ưh kơ đei jĭ kiơ ôh păng pơyơ̆r 'bơ̆t anăp Kră Yang. 3Ih athei khan bĕ kơ bơngai Isơrael: Lu iĕm athei rôp minh pôm bơbe tơno pơm tơmam soi huai đơ̆ng yoch, minh pôm rơmo kon păng minh pôm triu kon mă ưh kơ đei jĭ kiơ ôh păng 'bar tŏ noh đei minh sơnăm ngăl bơih. Wă pơm tơmam soi 'buh. 4Minh pôm rơmo dăm, minh pôm triu tơno, wă pơm tơmam soi 'blŏk bơnê, pơyơ̆r 'bơ̆t anăp Kră Yang păng tơmam pơyơ̆r tơpŭng lŭk hrâu boih hăm đak rơmă ôliwơ yua kơ năr âu Kră Yang gô tơ'bôh akâu Sư kơdih kơ iĕm. 5Thoi noh lu sư chĕp ba tơ anăp Bơsŭn Anih Akŭm dôm tơmam mă Môis đei pơkă bơih; đơ̆ng noh đĭ-đăng lu bơngai năm akŭm năm jê̆ Bơsŭn Anih Akŭm dơ̆ng 'bơ̆t anăp Kră Yang. 6Môis khan: 'Nâu tơdrong mă Kră Yang tơtă, lu iĕm pơm bĕ na tơdrong ư-ang Kră Yang gô tơ'bôh kơ lu iĕm. 7Môis khan dơ̆ng kơ Arôn: Ih athei năm jê̆ tơ chơnang soi, pơyơ̆r bĕ tơmam soi huai đơ̆ng yoch păng pơyơ̆r tơmam soi 'buh ih, wă soi huai đơ̆ng yoch ih kơdih gơh rơgoh păng soi huai đơ̆ng yoch kon pơlei pơla păng sơmah huai đơ̆ng yoch lu sư, kiơ̆ thoi Kră Yang đei tơtă bơih. 8Thoi noh Arôn năm jê̆ tơ chơnang soi, pơlôch kon rơmo tơno yua pơm tơmam soi huai đơ̆ng yoch sư kơdih. 9Lu kon drŏ-nglo Arôn iŏk pham ba kơ sư, sư tôt hơnglâu ti sư tơ pham pik tơ lu ake chơnang soi, đơ̆ng noh tuh pham tơ jơ̆ng chơnang soi. 10Sư iŏk soh pơyơ̆r rơmă, 'bar tŏ boh-lăn păng mơ'nhao hơtăng lom klơm kon sem tơmam soi huai đơ̆ng yoch, pơyơ̆r tơ chơnang soi, kiơ̆ thoi Kră Yang tơtă bơih kơ Môis. 11Sư 'buh lê̆ sĕch hăm akar tơ 'nguaih kơ kơđông. 12Đơ̆ng noh sư pơlôch kon sem pơm tơmam soi 'buh; lu kon drŏ-nglo Arôn chĕp ba kơ sư pham, na sư săi pham noh tăp dăr kơ chơnang soi. 13Lu sư kư̆m ăn kơ Arôn lu 'nhĕm kăt lê̆ bơih păng kơ̆l sư hloi, na soh pơyơ̆r đĭ tơmam soi noh tơ kơpal chơnang soi. 14Sư ôp klak mot păng tơkong anhăk ba 'buh hơdai hăm tơmam soi 'buh tơ chơnang soi. 15Păng sư pơyơ̆r tơmam soi kon pơlei pơla. Sư rôp bơbe tơno pơm tơmam soi huai đơ̆ng yoch kon pơlei păng pơlôch kon bơbe noh, pơyơ̆r wă huai đơ̆ng yoch, nhen thoi tơmam soi huai đơ̆ng yoch mă adrol ki. 16Sư pơyơ̆r tơmam soi 'buh, kiơ̆ thoi tơdrong juăt. 17Đơ̆ng noh sư pơyơ̆r tơmam soi hăm phe 'ba, sư chup minh kơđôp anhăk ba soh tơ chơnang soi 'nguaih kơ tơmam soi 'buh til pơgê. 18Kŭm thoi noh mơ̆n, sư pơlôch rơmo păng triu tơno pơm tơmam soi 'blŏk bơnê yua kơ kon pơlei pơla. Lu kon drŏ-nglo Arôn ăn kơ sư pham na sư tơtraih pham noh tăp dăr kơ chơnang soi. 19Păng kư̆m chĕp ba kơ sư rơmă rơmo păng triu tơno, rơmă kiĕng, lu rơmă lom klak 'bar tŏ boh-lăn păng pơ'nhao lom klơm. 20Lu sư dan lu rơmă tơ kơpal sĕch kơtơh, đơ̆ng noh soh pơyơ̆r tơ kơpal chơnang soi. 21Arôn iŏk sĕch kơtơh păng blu 'ma pơm tơmam soi chro 'ma 'ngiĕo 'bơ̆t anăp Kră Yang thoi Môis tơtă. 22Đơ̆ng rŏng kơ Arôn yơ̆r ti sư tơklă gah kon pơlei pơla sơkat ăn pŭn hiôk kơ lu sư pơyơ̆r tơmam soi huai đơ̆ng yoch, tơmam soi 'buh păng tơmam soi 'blŏk bơnê, na sư jur đơ̆ng chơnang soi. 23Môis păng Arôn mơ̆t lăm Bơsŭn Anih Akŭm; kơplah sư wă lĕch đơ̆ng hnam noh, bre sư sơkat pŭn hiôk ăn kơ kon pơlei pơla. Na tơdrong ư-ang Kră Yang tơ'bôh 'bơ̆t anăp đĭ-đăng kon pơlei. 24Ŭnh lĕch đơ̆ng anăp Kră Yang sa tơmam soi 'buh păng rơmă kơpal chơnang soi. 'Bơ̆t đĭ-đăng kon pơlei 'bôh tơdrong noh, wang chhôk jreo drap kŭp kơ̆l tơ teh.
Currently Selected:
Lew 9: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
