Lew 10
10
Tơdrong yoch bre Nađap păng Abihu
1Nađap păng Abihu 'bar 'nu kon drŏ-nglo Arôn, măr sư tă kơ chĕp gĕl tơmam 'bâu phu ngăl, tah ŭnh lăm noh, tah tơmam 'bâu phu kơpal păng pơyơ̆r ŭnh đơ̆ng nai 'bơ̆t anăp Kră Yang. Ŭnh thoi noh Kră Yang ưh kơ đei tơtă ôh kơ lu sư. 2Ŭnh đơ̆ng anăp Kră Yang soh chhông bre noh, na măr sư lôch hloi 'bơ̆t anăp Kră Yang. 3Thoi noh Môis khan kơ Arôn tơdrong âu: Kră Yang đei khan boih, Inh gô pơdah jơhngơ̆m rơgoh Inh kơ lu đe bu mă oei jê̆ Inh păng Inh đei tơdrong đe pơyom 'bơ̆t anăp đĭ-đăng kon pơlei. Arôn ngăn hreh. 4Đơ̆ng noh Môis krao Misael păng Êlsaphan, 'bar 'nu kon drŏ-nglo Usiêl, ma Arôn păng khan kơ lu sư: Năm jê̆ tơ âu, tung bĕ akâu 'nhŏng oh iĕm lôch weh đơ̆ng anih rơgoh. Anhăk ba tơ 'nguaih kơđông. 5Thoi noh sư năm jê̆ tung anhăk 'bar 'nu bơngai oei hrŭk ba ao tai sư, tung tơ 'nguaih kơ kơđông, kiơ̆ thoi Môis tơtă boih. 6Đơ̆ng noh Môis khan kơ Arôn păng 'bar 'nu kon sư Êlêasar păng Ithamar: Iĕm 'nĕ kơ achăng sŏk ôh păng 'nĕ kơ hek ao lu iĕm kơdih, kơnh hli kơ lu iĕm lôch păng kơnh tơdrong hil mĭl Kră Yang gô truh kơ đĭ-đăng kon pơlei oei akŭm, mă-lei 'nhŏng oh lu iĕm, adrĕch Isơrael iĕm, athei nhơ̆m kơ lu bơngai mă Kră Yang soh chhông hăm ŭnh. 7Thoi noh lu iĕm 'nĕ kơ lĕch ôh đơ̆ng 'măng Bơsŭn Anih Akŭm kơnh hli kơ iĕm lôch, yua kơ đak pơgang 'bâu phu Kră Yang tuh boih kơ kơ̆l lu iĕm. Lu sư chu hloi nơ̆r Môis pơma.
Dôm tơdrong lu 'bok soi gơh pơm
8Kră Yang khan kơ Arôn thoi âu: 9Layơ mă ih păng lu kon drŏ-nglo ih mơ̆t lăm Bơsŭn Anih Akŭm 'nĕ kơ et sik hơmu păng huch tơmam kiơ mă pơm kơ iĕm suai kơnh hli kơ iĕm lôch. Tơdrong noh jing tơdrong juăt tơtă ling-lang lăm đĭ jơhnơr lu iĕm. 10Wă kơ iĕm gơh kơnăl tơdrong 'lơ̆ng hăm tơdrong kơnê̆, tơdrong rơgoh păng tơdrong ưh kơ rơgoh. 11Păng lu iĕm athei bơtho kơ bơngai Isơrael dôm tơdrong juăt mă Kră Yang đei yua Môis bơtho ăn. 12Môis khan kơ Arôn păng lu kon drŏ-nglo sư oei arih, noh Êlêasar păng Ithamar. Ih iŏk bĕ tơmam pơyơ̆r, phe 'ba mă oei rơkah, đơ̆ng soh pơyơ̆r tơ chơnang soi kơ Kră Yang boih athei sa hloi hăm 'bĕng ưh kơ đei 'buih pông 'bơ̆t cheng chơnang soi; yua kơ tơmam âu jơ̆ rơgoh. 13Athei sa tơmam soi âu tơ anih 'lơ̆ng rơgoh hloh, yua kơ tơmam âu 'măn lê̆ kơ ih păng lu kon drŏ-nglo ih đơ̆ng tơmam soi ăn hăm ŭnh sa pơyơ̆r kơ Kră Yang, yua kơ Sư pơkă boih kơ inh. 14Mă-lei sĕch kơtơh mă pơyơ̆r chro 'ma 'ngiĕo păng blu kon sem dơrong mă đei pơyơ̆r hiŏng tơ kơpal, na ih păng lu kon akăn ih athei sa tơ minh anih rơgoh yua kơ đe đei 'măn lê̆ kơ ih păng lu kon drŏ-nglo ih đơ̆ng lu tơmam pơyơ̆r 'blŏk bơnê đơ̆ng kon pơlei Isơrael. 15Lu sư gô chĕp ba blu kon sem dơrong soi pơyơ̆r hiŏng tơ kơpal păng sĕch kơtơh mă đei pơyơ̆r chro 'ma 'ngiĕo hăm lu rơmă sư, wă soi pơyơ̆r chro 'ma 'ngiĕo 'bơ̆t anăp Kră Yang, dôm tơmam noh đe 'măn bơih kơ ih păng lu kon drŏ-nglo ih, kiơ̆ kơ tơdrong juăt ling-lang, mă Kră Yang đei tơtă bơih. 16Môis chă kon bơbe tơno wă pơm tơmam soi sơmah huai đơ̆ng yoch, 'bôh đe 'buh khôi bơih, na sư mĭl kơ Êlêasar păng Ithamar, 'bar 'nu kon Arôn mă oei arih păng khan: 17Liơ măr iĕm ưh kơ sa 'nhĕm tơmam soi huai đơ̆ng yoch tơ anih 'lơ̆ng rơgoh? Yua kơ noh jing tơmam 'lơ̆ng rơgoh hloh mă đe ăn boih kơ lu iĕm, wă kơ lu iĕm pŭ đĭ-đăng tơdrong yoch kon pơlei pơla păng soi sơmah huai đơ̆ng yoch ăn kơ lu sư 'bơ̆t anăp Kră Yang. 18Pham sư ưh kơ anhăk ba tơ anih 'lơ̆ng rơgoh ôh, trŏ sư, iĕm sa tơmam âu tơ anih 'lơ̆ng rơgoh kiơ̆ thoi nơ̆r inh tơtă. 19Mă-lei Arôn tơl Môis: Năr âu lu sư pơyơ̆r boih tơmam soi huai đơ̆ng yoch păng tơmam soi lu sư 'buh 'bơ̆t anăp Kră Yang; na kư̆m đei tơdrong truh kơ inh. Tơdah năr âu inh sa tơmam soi huai đơ̆ng yoch, lei Kră Yang hăm lăp đon kơ inh ưh? 20Môis kơtơ̆ng tơdrong tơl thoi ei sư drơ̆ng trŏ.
Currently Selected:
Lew 10: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
