Romanos 7

Chambʌquiajupʌ tiyʌ co'tʌjcajcuquiʌsi

1Atzita'm, oto'ŋʌytyamba'ʌsmij porque mustambamis te' aŋgui'mguy. Mustambamis que te' aŋgui'mgu'yis 'yaŋgui'mba te' pʌn quenba'cmaj. 2Juca quenba'cmaj te' co'tʌc-yomo's jyayaj, pyʌcpa wa'y ijtu ñe'cʌji'ŋ, chambašej te' aŋgui'mgu'yis. Pero juca ca'pa te' jyayaj libre tzʌ'pya, ja'nande' co'tʌc-yomo. 3Te'cotoya juca quenba'cmaj te' jyayaj, y ñʌ'itpa eyapʌ pʌn maŋba ñʌmyaju cʌtzʌjcʌ'opyapʌ yomote'. Pero juca ca'pa te' jyayaj ja'na chʌ'i te' co'tʌjcajcuy aŋgui'mguquiʌ'mʌ. Te'cotoya juca itpa eyapʌ jyayaj ja'na maŋu ñʌmyaju cʌtzʌjcʌ'opyapʌ yomote'. 4Te'šejtijque' mij atzita'm, porque ca'u Cristo ca'uwʌšejta'mamij, wa'mis jana mato'ŋoyjaytyame te' aŋgui'mguy. Te'cotoya ja'namij ittame aŋgui'mguquiʌ'mʌ, sino que Cristocʌ'mʌ, te' Diojsis yajwinsa'upʌ ca'yajupʌ'ojmoc, wa'mis nyosjaytyamu Dios. 5Te' pecapʌ nwi'nis šu'noquiu'yojmomajtʌ ittamu'c, te' aŋgui'mgu'yis inʌc chʌcje'csjapya tʌ nyatzipʌ su'noquiuy. Y tʌ nyatzipʌ su'noquiuy ndzʌcpatʌ inʌc tʌ ŋgüerpo's tyiyʌjanatiyʌpit, y te'cotoya maŋbatʌ inʌc ŋga'tamu. 6Ja'ndiyʌta'mandʌ te' aŋgui'mguquiʌ'mʌ, porque ca'uwʌše'andʌ ndzʌctamu nwin te'wʌcʌsi, y jʌcʌ'u pyʌmi tʌcotoya te' aŋgui'mdambapʌ'stʌ inʌc. Te'cotoya ŋgʌna'tzʌytyambatʌ jomepʌ quengupyit, te' Espiritu'stʌ tzi'papʌ, y ja'nde' te' pecapʌ aŋgui'mgupyit ja'yʌyušej totocʌsi.

Te' ʌ'ojmo ijtupʌ cowa

7¿Tiya'ndʌ jeque ndzamba? ¿Cowasʌ'ŋde' te' aŋgui'mguy? Ja'ne nijutz. Juca inʌc te'šej jamyusʌ'ʌs inʌc tiyʌte' cowa, pero mujsu'ʌs te' aŋgui'mgupyit. Porque jamyusʌ'ʌs inʌc ni'aŋsu'noquiuy juca inʌc ja'n ñʌmi te' aŋgui'mguy: Uy ni'aŋsu'noy. 8Pero te' cowa's ñʌwʌ'aju te' aŋgui'mguy y yajni'aŋsu'noyu'ʌj mumutiyʌcʌsi. Ja'ndiyʌmʌy aŋgui'mguy ja'ndʌ tiyʌ maŋgocʌtʌqui. 9Te'šej jeque'ʌj inʌc ijtu wina, y wijtu'ʌj jujcha' ja'n myatowepʌ's te' aŋgui'mguy. Pero matoŋu'camʌs te' aŋgui'mguy winsa'u te' cowa ʌ'ojmo y ca'uwʌše'ʌj tzʌ'yu cowa'ojmo. 10Chamdzi'oquiu'yajpa te' aŋgui'mgu'yis te' quenguy, pero ʌjcotoya yojsu wa'yʌj te'wʌpit ŋga'u. 11Porque ñʌwʌ'aju te' cowa's wa'yʌj aŋgoma'cʌyu te' aŋgui'mgupyit, y te'wʌpit wa'yʌj yajca'u.

12Te'cotoya te' aŋgui'mguy wiyuŋšej masanbʌte', y tumdumʌ aŋgui'mguy masan, justo y oye. 13¿Y minusʌ'ŋʌj yajca'u te' oyepʌ aŋgui'mgu'yis? Ja'ne, sino que te' cowa'sʌj ca'uwʌcotzʌjcu te' oyepʌ tiyʌpit, wa'y quieju que cowate'. Te'šej tujcu te' aŋgui'mgupyit wa'y quieju te' cowa que saŋyatzipʌte'.

14Muspatʌ que te' Espiritu'ste' quiojtu te' aŋgui'mguy, pero ʌj, ne' nwi'nis šu'noquiu'yʌs ŋgʌñʌñjapya. Quioyosaše'ʌj aŋgui'mba cowa's. 15Porque tiyʌ'ʌs ndzʌcpa ja'ʌs nʌctʌ'i. Tiyʌ'ʌs sunba ja'ʌs ndzʌqui, pero tiyʌ'ʌs ŋgui'nispa, te'wʌ ʌs ndzʌcpa. 16Pero juca ndzʌcpa'ʌs te' ja'ʌs suni ndzʌjcupʌ tiyʌ, mbʌjcʌchoŋba'ʌs que oyepʌte' te' aŋgui'mguy. 17Te'šej jeque ja'nande' ʌs nʌ ndzʌjcu te'šejta'mbʌ tiyʌ. Te' cowa te' ʌ'ojmo ijtupʌ, te'wʌ'ste' nʌ chʌjcu. 18Y muspa'ʌs que ʌ'ojmo, sunba'ʌjte' nʌmu ʌs yatzipʌ nwi'nojmo, ja'ndiyʌ oyepʌ tiyʌ. Porque sunjo'pya'ʌs ndzʌjcu oyeta'mbʌ tiyʌ, pero ja'ʌs ŋgʌpa'te wa'yʌs ndzʌjcu. 19Porque sunba'ʌs ndzʌjcu te' oyepʌ tiyʌ, y ja'ʌs ndzʌqui. Pero te' yacha'cuy ja'ʌs sunipʌ, te'wʌ ʌs ndzʌcpa. 20Juca ndzʌcpa'ʌs te' ja'ʌs suni ndzʌjcupʌ tiyʌ, ja'nande' ʌs nʌ ndzʌjcu, sino que te' cowa te' ijtupʌ ʌ'ojmo, te'wʌ'ste' nʌ chʌjcu.

21Te'šej jeque, aŋjamba'ʌs que yʌ'šejtʌ tucpa, que sunba'cʌs ndzʌjcu te' oyeta'mbʌ tiyʌ ijtu yacha'cuy ndzoco'yojmo. 22Porque ndumʌtzoco'yʌs nʌ'omjapya te' Diojsis 'yaŋgui'mguy. 23Pero aŋjamba'ʌs que ʌs ŋgüerpo'ojmo ijtu su'noquiuy ñʌquipjapyapʌ's ʌs ŋguipsoquiu'yojmopʌ su'noquiuy. Yʌ'wʌ'sʌj nuctzʌ'pya wa'yʌs ndzʌcjayu cowa's šu'noquiuy te' ʌs ŋgüerpo'ojmo ijtupʌ. 24Ay ʌjšejpʌ pʌn. ¿Iwʌ'sa yajʌcʌ'jaytyʌ'pa yʌ' ca'papʌ ʌs ŋgüerpo? 25Nʌjapya'ʌs Dios yʌscotoya tʌta'm Ngomi Jesucristopit, ñe'cʌ'sʌj yajquipcoschi'pa. Te'cotoya yʌtij nʌctʌ'yoquiupyit mato'ŋoyjapya'ʌs Diojsis 'yaŋgui'mguy, pero ʌs pecapʌ ŋgüerpopit mato'ŋoyjapya'ʌs tiyʌ šunba te' cowa's.

Currently Selected:

Romanos 7: ZCNT

Highlight

Copy