Mateo 18

Pën ni'ik mëj'äämpy

1Näy jää ja Jesús ojts ja y'ijxpëjkpëtëjk nyiminyë ets yajtëëwëtë:

¿Pën ni'ik mëj'äämpy ma ja tsajpjotmëpë kutujkën?

2Tääts ja Jesús tu'uk ja pi'k ëna'k tyaxëy ets tpëjktäky itkujky, 3ets y'ënäny:

Tëy miits n'ënëëmëtë, pën ka'ap miits ja mjuukyajtën xyajtëkatstë ets mwinpitë ijxtëm yë pi'k ëna'kën, ka'ap nëjkx mtëkëtë ma tsajpjotmëpë kutujktaknën. 4Pën yujy naxym näpyëjktakëp ijxtëm yë pi'k ëna'kën, yë'ë mëj'äämpy naxaanp ma ja tsajpjotmëpë kutujktaknën. 5Ets pën kyupëjkpy ëjtskyëjxm tu'uk ja pi'k ëna'k ijxtëm ya'atën, nän ëjts ënäty xykyupëjkp.

Wi'ix kyutsë'ëkëtyën ko pokyjotm nka'amëty

6Pën nitu'uk ya'atë pi'k ëna'k yajpokytyuunpy mëti'ipës xymyëpëjkpën, nikë oy jeexyë ja paantaak yajtukyo'ktsumy ets kyinëty këkmejyjoty. 7Ëxëëk tjapaaty ko yaa naaxwiiny naaxkëjxy yi'iyë jää'ajtp wi'ix ja'ay pyokytyunëtyën. Jää'ataanp yë xëmë, je'eyë ko ja ja'ay mëti'ipë ja myëku'uk yajpokytyuunpyën ëxëëk ja jyata'any kyëpäta'any.

8Paaty n'ënëëmë, pën myajpokytyuunëp yë mkë'ë ëkë yë mteky, katspux ets jëkäm pëjkta'ak; nikë oy ko mtëkëty kë'ëtu'uk ëkë tekytyu'uk ma ja Tios ja kyutujktaknën ets këtii ko myajpëjkta'akëty ëyoowtakntujp xëmëkyëjxm mëët ja mkë'ë ëkë ja mteky mäjtsk. 9Ets pën myajpokytyuunëp yë mwiin, juut ets ixka'ats; nikë oy ko mtëkëty wiintu'uk ma ja Tios ja kyutujktaknën këtii ko myajpëjkta'akëty ëyoowtaknjoty mëët ja mwiin mäjtsk.

Ja ijxpäjtën ko ja kupixyny tyëkoy'ity

10Këtii pi'k ëna'k jëkäm xypyëjkta'aktëty. Jä'ä ko yë'ëty myëët'ajtëp yë y'anklësëty jam tsajpjotm mëti'ipë yajpatëpën xëmë Tios wintum. 11Jä'ä ko yë naaxwiinyëtë ja'ay yë y'U'unk yë'ë të tniminy ets tyajtso'oka'any mëti'ipë të tyëkoyën.

12¿Wi'ix miits m'ëna'antë? Pën tu'uk ja'ay nimëko'px yë kyupixyny ets tu'uk tyëko'oyxyëtëty ¿këtii t'ëxmatsëty ja nimajkta'px majkmokx majktaxkpë jam kopkëjxm ets nëjkx t'ixta'ay mëti'ipë të tyëkoyënë? 13Tëy n'ënëëmëtë ko tpaatëty ja mëti'ipë tëkoy'ijtpën, wäänëni'ik tukxoonta'aka'any këtiinëm ja majkta'px majkmokx majktaxkpë mëti'ipë ka'ap ye'eytyëkoytyën. 14Näyjyëtu'un ja Tios, miits ja mTeetyëty tsajpjotmëpë ka'ap tsoky ets nitu'uk y'u'unk y'ëna'k mutskpë ye'eytyëkoyëty.

Wi'ix ja nmëku'uk'ajtëm nmëmä'kxtujkmëtyën

15Pën tëë mmëtëkoyë ja mmëku'uk, mëmëtya'ak ets tuk'ënëëmë wi'ix të mmëtëkoyën. Ko tja'akyukëty wi'ix xy'ënëëmën, tëë ënäty jatëkok xymyëku'ukpëky. 16Pën kajts tmëjpëjktä'äky wi'ix ënäty xyjya'ënëëmën wow tu'uk mäjtsk ja ja'ay ets t'ixtëty nijawëtëty wi'ix ënäty xim yam ja mpoky mnätyukwinmëtowëtën. 17Ets pën ka'ap näjyëtu'un yajmëjpëjkta'aktë, ënëëmë ja mëpëjkpëtëjk ma ye'eymyuktën. E pën kajts näjyëtu'un yajmëjpëjkta'aktë, jëtu'un tääpë ja'ay nëjkx xyajnajxnëtë tä mëti'ipë ka'ap myëpëkyën, ëkë ijxtëm ja yajkukëpäjtpëtyën mëti'ipë Roma myëtuuntëpën.

18Tëy miits n'ënëëmëtë, pën tii mkutsuumtëp yaa naaxwiiny, näjyëtu'un kutsumy wyë'ëmëty tsajpjotm; ets pën tii mmëkäjëtyëp yaa naaxwiiny, näjyëtu'un mëkäjë wyë'ëmëty jam tsajpjotm.

19Jëtu'un n'ënëëmëtë pën nimäjtskja'ay nyäkyäjpxyë ets tii t'amëtowa'antë ja nTeetyës tsajpjotmëpë, yajmo'otëp yë'ëjëty. 20Jä'ä ko ma nimäjtsk nitëkëëk ja'ay yajpaatyën ëjts nxëëwkyëjxmës, tamës ëjts itkujky nyajpaaty.

21Tääts ja Pedro ojts tninëjkxy ja Jesús ets tyajtëëy:

Wintsën, ¿jënaak okës ja nmëku'uk nmëmä'kxtukëty koos xymyëtëkoyëty? ¿Wëxtujk okë?

22Ets ja Jesús y'ëtsooy:

Ka'ap yam mijts n'ënëëmë ko wëxtujk ok. Jëtu'unës n'ëna'any ko wëxtujk'ok xynyiwinpitëty ja tëkë'px majkpë.

Ja ijxpäjtën ma tu'uk ja tuunpë ka'ap pyokynyime'kxyën

23Paatyës jëtu'un n'ëna'any: Yë tsajpjotmëpë kutujkën jëtu'un yë'ë ijxtëm tu'uk ja yajkutujkpë tmëtyoyën ja meeny mëët ja tyuunpëtëjk mëti'ipë të tyajtunyën. 24Tam ënäty tmëtyoowtsoony ja meeny ko yajmëja'ajty tu'uk ja ja'ay mëti'ipë kanaak millon ja nyu'kxyën. 25Ja ja'ay ka'ap ënäty tii ja myeeny mëti'ipë tyukëpätëpën ja nyu'kxy. Tääts ja yajkutujkpë y'ënäny ets yajtookëty tääpë ja'ay mëët ja tyo'oxytyëjk, ja y'u'unk y'ëna'k ets tu'kë'ëyë mëti'ipë myëët'ajtypyën, jëtu'un ja nyu'kxy tyaj'ëtukëty. 26Ojts ja ja'ay nyäkyoxtënaaytyä'äkyë ma ja yajkutujkpën ets tmënu'kxtäky: Wintsën, mëmä'kxtujkës. Jaakmooykyës wäänë tiempë etsës nkëpätëty mëti'ipë nmënu'kxy'äjtypyën. 27Ja yajkutujkpë pya'ëyoow ets nyimä'kx ja myënu'kxy, jëtu'un ëwaatsëtum ojts wyi'imy ja ja'ay.

28Ko ja tuunpë tsyo'ony, ënät ojts tpaaty ja myëku'uk mëti'ipë ënäty mënu'kxy'ajtëpën mëko'px xëëw nituny, ets tmajtsy ets tyo'kpeeny, tääts t'ënëmaay: Mëkëpäjtkës. 29Tääts ja mëtuunpë wyinkoxtënaaytyakë ets myënu'kxtakë: Mëmä'kxtujkës. Nkëpätëpës yë'ë. 30E ja tu'uk ka'ap tkupëjky, pujxn tëkoty ojts ja mëtuunpë tyajpëjktä'äkyë koonëm tkëpätëty ja nyu'kxy. 31Ko jëtu'un t'ijxtë ja wiinkëtypë ja tuunpëtëjk, ka'ap ojts oy t'ixtë, paaty ojts tninëjkxtë ja yajkutujkpë ets tukmëmëtyaktë wi'ix ënäty ja tuunpë ja myëku'uk të tunyën mëti'ipë të yajpokymye'kxyën. 32Tääts ja yajkutujkpë twoowtsooy ja tuunpë ets t'ënëmaay: Ninu'un kya'oyëty yë mjot mwinma'any. Tëë nime'kxy koos të xywyinkoxtänë ets të xy'amëtoy nänyimä'kxë, 33näjyëtu'un jeexyë mijts ja mmëëtmëtuunpë të xynyime'kxy ijxtëm mijts të nime'kxyën. 34Mëk ja yajkutujkpë jyoot'anpëjky ets ojts tni'ënä'ämë ets pujxn tëkoty yajpëjkta'akëty ja ja'ay koonëm tkëpäjta'ajëty mëti'ipë nyu'kxy'äjtypyën.

35Tääts ja Jesús jyaak'ënany:

Näjyëtu'un ja nTeetyës tsajpjotmëpë tuna'any ja ja'ay ma miitsëtyën, pën jää miitsëty ka'ap ja mmëku'uk xynyimä'kxtë.

Currently Selected:

Mateo 18: QUETZMIXE

Highlight

Copy

Compare