Mateo 17
17
Ko Jesús tyëkatsy
1Ënät ja Jesús tpawooy ja Pedro, Santiago mëët ja y'uty Juan ets ojts pya'tëkëtë ma tu'uk ja kopkën. 2Ma ënäty jam jëtu'un yajpaatën ënät ojts ja Jesús tyëkatsy. Ajajp atë'kxp ja wyiin jyëjp ijxtëm ja xëëw y'änyën ets ja wyit ojts pyoopë ijxtëm ja ajajkën. 3Tääts t'ijxtë ja Moisés ets ja Elías ko mëët myëtya'aktë ja Jesús. 4Ënät ja Pedro t'ënëmaay ja Jesús:
Wintsën, oy koos yaa nyajpaatë. Pën mtsojkpy, minës tëkëëk yë ujts'aaytyëjk n'ëk kojy: tu'uk mijts mjä'ä, tu'uk yë Moisés yë jyä'ä ets tu'uk yë Elías yë jyä'ä.
5Tam ënäty ja Pedro jëtu'un kyäjpxy ko ja yoots mëti'ipë ajajpën nyiju'uxëtë ets jap yootsjoty yajmëtooy tu'uk ja ayuk mëti'ipë ënaanpën:
Ya'atës n'U'unk'ajtyp, mëti'ipës ni'ik ntsojkpyën. Ntukxoontäkpyës yë'ë. Mëtoow'itë, mëti'ipë nyikäjpxypën.
6Ko ja Jesús ja y'ijxpëjkpëtëjk tmëtoowtë, ënät nyäkyoxtënaaytyakëtë naaxkëjxy mëët ja mëktsë'ëkë. 7Tääts ja Jesús myëwinkoonëtë, ojts kyë'ënixajëtë ets y'ënëmaayëtë:
Pëtë'ëktë këtii mtsë'ëkëtë.
8Ko y'ijxë'ktëy ka'ap ojts ma pën t'ëk'ijxnëtë, nätyu'uk ja Jesús jamnë.
9Tam ënäty kyëta'aktë Kopkwinm ko ja Jesús ojts y'ënë'ëmxëtë:
Ka'ap pën xytyuk'ëwaanëtëty ko jëtu'un të xy'ixtë, jäänëm koos njuukpyëkëty, ëjts, naaxwiinyëtë ja'ay y'U'unk.
10Tääts ja y'ijxpëjkpëtëjk yajtëëwëtë:
¿Tii ko yë tsajptëkotyëtë yaj'ijxpëjkpëtëjk y'ëna'antë ko ja Elías jëwyiin myina'any?
11Ets ja Jesús y'ëtsooy:
Mëtëy yë'ë ko Elías jëyëjp myina'any ets tyaj'o'oyëtya'ajëty tu'kë'ëyë winë. 12Je'eyëp koos jëtu'unës n'ëna'any ko ja Elías tëë ja myiny ets yë'ë ka'ap të t'ixkaptë, ni'ikyë ëxëëk të tuntë ijxtëm ja jyot wyinma'anyëtyën. Näyjyëtu'un ja naaxwiinyëtë ja'ay ja y'U'unk ëxëëk tuna'antë mëët ja kyë'ë y'aawëty.
13Ënät ja y'ijxpëjkpëtëjk tja'akyujkëtyë, ko Jesús yë'ë tyijpy ja Juan Yajnëëpäjtpë ko y'Eliiësëty.
Ma ja Jesús tyajtso'okyën tu'uk ja yujkyeeky ëna'k ku'oypyëmëëtpë
Mr 9:14-29; Lc 9:37-43
14Ko ojts jya'të ma ja mayjyä'äyën, ënät tu'uk ja'ay myiiny ma ja Jesúsën ets nyäkyoxtënaaytyakë tääts y'ënëmaayë:
15Wintsën, pa'ëyoowkës ja n'u'unk. Mootyë pa'am myëët'ajtyp, nëkooyë y'ëyoownë. Jëna'ajëty y'akëtawë jëënjoty, ets jëna'ajëty nëëjoty. 16Tëës yaa njatuknimintë yë m'ijxpëjkpëtëjk ka'ap të myäyëtë tyajtso'oktëty.
17Tääts ja Jesús y'ëtsooy:
Miitsëty jä'ä mja'ay'atë mëpëjkëntuk ets je'eyë ja m'ëxëëkjot m'ëxëëk winma'anyëty. ¿Jëna'a jëtu'un xyä'äkyukëja'antë koos nyajpaaty ma miitsëtyën? ¿Maapaat jëtu'un mëk näpyëjkta'akëtëtyës ko miitsëty ka'ap mja'akyukëtë? Yaa yajmintë ja yujkyeeky ëna'k.
18Ënät ja Jesús ojts t'ojpëtsëmy ja ku'oypyë ma ja yujkyeeky'ënakën ets ënätyë tsyoky y'akëtäky.
19Oknëm ja Jesús ojts ja y'ijxpëjkpëtëjk myëkäjpxyë ëpëky ets yajtëëwëtë:
¿Tii ko yë ku'oypyë të xykyamaytyës etsës n'ixkäxtëty?
20Tääts ja Jesús y'ënëmaayëtë:
Jä'ä ko miitsëty ka'ap oy mmëpëktë. Tëy n'ënëëmëtë, ko jeexyë mmëpëktë, oy tyim yi'inëmëty, jëtu'un tä mostasë pajkën, mnëmaaytyëp jeexyë xiipë kopk: Jëwa'ak yaa, ximtsow nëjkx ets ja kopk jëwa'kp ja jeexyë. Nitii jeexyë tsip xykyajawëtë. 21Yë ku'oypyë jëwa'kp näjyëtu'un ko ja'ay Tios tja'amyetsy ets ko ja'ay y'ayuu'aty.
Ko Jesús tnikäjpxy mëmäjtsk ok ja y'o'kën
22Tam ënäty të ye'eymyuktë ja Jesús mëët ja y'ijxpëjkpëtëjk Galilea y'itjotm, ko ja Jesús y'ënëmaayëtë:
Yajkë'ëyakaanp yë naaxwiinyëtë ja'ay yë y'U'unk ma mayjyä'äyën, 23ets tyaj'ooka'antë, je'eyëp ko kom tëkëëk xëëw jyuukpyëka'any jatëkok.
Ko jëtu'un ja aaw ayuk tmëtoowtë, mon tuk ojts wyë'ëmtë.
Tsajptëjk kukëpäjtën
24Ko ja Jesús ets ja y'ijxpëjkpëtëjk jyajtë jam Capernaúm. Ja ja'ayëty mëti'ipë yajkukëpäjtëpën ma ja tsajptëjk yaj'ajuuytyukyën ojts ninëjkxtë ja Pedro ets tyajtëëwtë:
Yë mwintsën ¿Këtii yë tsajptëjk yë y'ajuuytyuk tyajkë?
25Tääts ja Pedro y'ëtsooy:
Kyukëpejtyp yë'ë.
Ko ja Pedro tyëjkëy tëkoty yë'ë ojts ëka'any yajtëyë ja Jesús ets y'ënëmaayë:
¿Mijts Simón wi'ix m'ëna'any? ¿Pën ja yajkutujkpëtëjk ets ja yajkëpäjtpëtëjk yaapë naaxwiiny yajkëpäjtëp: ja jyä'äy ëkë jaaypyaat jaaypyo'kxyë?
26Tääts ja Pedro y'ëtsooy:
Jaaypyaat jaaypyo'kxy. Tääts ja Jesús y'ënäny: Paaty n'ënëëmëtë, ko yë ja'ay mëti'ipë kunaax'ajtp kukajpn'ajtpën ka'ap kyopkpëkyëty kyëpätëty. 27Je'eyëp ko këtiipë pën tka'oyjyawëty, nëjkx mnëë jëyujk matsy jap nëë ëkë'p ets ja nëë jëyujk mëti'ipë ëka'any mxuupyën, jap y'aawjoty xypyaata'any yë meeny mëti'ipës nkëpäjtën'atëpën ets mijts yë mjä'ä, tääts nëjkx xykyujuy ja këpäjtën.
Currently Selected:
Mateo 17: QUETZMIXE
Highlight
Copy
Compare
Share
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
