Romanos 1
1
Pablo isaluda̱tcʉs̈p Romajatway
1Ʉ̱ Pablo. Tʉnservia̱jtap Jesucristu. Dios tʉs̈ya̱s̈ pa tʉjatwa'n apóstol, ayé inʉmo'jcʉp ni'c Dios tʉs̈ajyu't, mit tʉs̈cupi̱u pa tʉs̈nʉmdacyo'jyawa'n i-oyway noticia. 2Dios inʉm ámbanu ni'c iyagáj ayé oyway noticia, mit Dios i-actunʉmgʉs̈ iprofetajat mit ija'ygau lo que Dios inʉmway. 3Ayé oyway noticia nas̈actu-is̈cap el Señor Jesucristu, Dios iway, mit je' min David ifamiliani'c, mit min as̈am jayau. 4Najawigap ni'c Jesucristu Dios iway ni'c ito'jcʉp poder, mit je' ijtʉu Espíritu Santu mit yo'y limpiu en ayʉ̱́j mundu, mit jutucta̱c mam itsʉ̱nga á̱nimajat. 5Mit Jesucristu tʉs̈moygau favor ni'c tʉs̈yajcau pa apóstol. Tʉs̈ajyu'tcau pa tʉs̈nʉmgajawa'n nu'pʉjʉn jayajwat jʉmgapa'tu ma cupʉjca Jesucristu mit ma jayaumayga. 6Mit we'ney mijchat Dios is̈ya̱s̈cau pa is̈je'jatcáj Jesucristu.
7Tʉja'ygʉs̈ap nu'pʉjʉn mitsʉ̱ngapay mʉjway nʉ'jcopac Roma. Dios is̈wangap mit is̈ya̱s̈cau pa inyo'ygawa'n mit je'. Dios Nate̱jat mit el Señor Jesucristu pi is̈moygac favor mit paz.
Pablo iwamp ivisita̱twa'n Roma
8Primeru tʉnyʉjmʉ'gáj ni'c Jesucristu nas̈moygap favor, mit jemni'c tʉs̈nʉ́jma Dios ni'ctiyu̱s̈ pa mijchat minu'pʉjʉjnat. Ni'c jʉmgapa'tu inʉmgap ni'c micupʉjcap mʉgʉc. 9Dios ijawip ni'c tʉ-ora̱tí̱jcajap, mit tʉnservia̱jtap Dios mit nu'pʉjʉn tʉnjo̱jt mit tʉnyʉmdacyo'jyap i-oyway noticia Dios iway. 10Tʉnyo'tí̱jcap Dios ma oya tʉs̈acnʉs̈áj mam intsʉ̱nga, te je' iwamp. 11Ni'c tʉnwano'cp tʉ-e'pcʉs̈wa'n. Tʉnwamp tʉmajyigʉs̈wa'n mit ayé favor tʉs̈moyway Espíritu Santu, pa we'n mitsʉ̱ngáj más mʉgʉc mit Dios. 12Mit we'n nani-anima̱tcʉjʉ̱́j nanu'pʉjʉjnat ni'c nacupʉjcap ni-as̈amu.
13Hermanujat, tʉnwamp pi jawiga ni'c mayap veces tʉnʉs̈o'jcʉj mam mijchat po hasta jinap cani-oyap tʉnʉs̈. Tʉnʉs̈o'jcʉp pa tʉs̈watwa'n tu'c oyway yos̈ pa Dios mam mijchat intsʉ̱nga, mit we'ney tʉs̈wato'jcʉ mam itsʉ̱nga japu̱t jayajwat jʉmgapa'tu en ayʉ̱́j mundu. 14Tʉtsʉ̱nap obliga̱tic tʉs̈ajque's̈cʉs̈awa'n jeme i-is̈capcapay mit jeme iga-is̈capcapay. 15Jemni'c ʉ̱ tʉtsʉ̱nap dispuestu pa tʉs̈nʉmdacyo'ywa'n oyway noticia pa mijchatey mitsʉ̱ngapay Roma.
Dios i-ajque's̈p ipoder mit ayé oyway noticia
16Tʉgawinchu̱gap tʉs̈nʉmwa'n ayé oyway noticia. Ni'c Dios i-ajque's̈p ipoder mit ayé oyway noticia, pa ma nisalva̱tcʉjʉ nu'pʉjʉn jeme cupʉjcapay. Dios iwan primeru ma nisalva̱tcʉjʉ judíujat mit iwampey ma nisalva̱tcʉjʉ-ey jeme caje'jatway judíujat. 17Ayé oyway noticia nas̈actujawip ni'c Dios nas̈yacs̈icninʉmgap ni'c nacupʉjcap, mit solo te nacupʉjcap je'. As̈am itsʉ̱na ja'yic Dios ilibruni'c: “Dios iyacs̈icninʉmp tu'c jayau jeme cupʉcpay, mit je' tsʉ̱náj oy.”
Jayajwat culpa̱tijcat
18Dios jeme tsʉ̱napay tsajpni'c nas̈actujawigap ni'c je' icastiga̱tcʉs̈áj nu'pʉjʉn jayajwat cacupʉjcapay, mit jeme igawatcapay oy. Je'jat i-atujcap jayajwat maga-is̈capca lo que iyacs̈ta'cway, ni'c je'jat iwatcap puru mal. 19Je'jat ijawigap lo que iwatpay Dios, ni'c Dios i-actu-e'pcʉs̈p. 20Ni'c desde Dios iguiwajt ayʉ̱́j mundu, jayajwat ca-oyap igui-e'pca Dios po i-e'pcap lo que je' iwatway. Ijawigap ni'c je' Dios, mit je' ijtʉp maj mit je' tamp pa siempre. Jemni'c jayajwat culpa̱tic itsʉ̱nga. 21Ijawigap ni'c itp Dios po iga-oyninʉmgap as̈am imerecia̱t, ne iganʉmgajap ni'ctiyu̱s̈. Mit jalmanu lo que ipensa̱tcapay ijo̱tni'jcat, mit nunca ca-oyap ipensa̱tca oy. 22Inʉmgap ni'c i-is̈capcap may, po jatcau tontojat. 23Igawangawu ayé Dios jeme mʉjninʉmicway jeme ca-o'cpay, más iwangau iguicupʉjcawa'n tiyu̱s̈at jeme que's̈capay as̈am jayajwat jeme o'jcapay. Mit hasta iwatcau tiyu̱s̈at as̈am jojnat, aníma̱jtat, mit as̈am tsanajyat.
24Jemni'c Dios icuyaguigʉs̈ ma watca mal as̈am iguiyo't ijo̱jtat, mit iwatcau mal hasta je'jatu ni-is̈capcʉjʉu. 25Je'jat icuyaguigau cosa yacs̈icway inʉmway Dios, más iwangau puru we̱t. Mit i-adora̱tcau mit iservia̱tcajau ayé cosajat wátijcatway. Igaservia̱tcajawu Dios jeme iwatcʉs̈way ayé cosajat. Más oy na-oyninʉ́mga Dios pa nu'pʉjʉn tiempu. Amén.
26Jemni'c Dios icuyaguigʉs̈ ma watca mal sin winchu̱jc, hasta to's̈ajyat tigatscawey mit ni-is̈capcʉjʉu je'jatu. 27Mit we'ney jayajwat iwatcau ni-as̈amu. Igaja-is̈capcawu ito's̈ajyat. Más iwangau ini-is̈capcʉjʉwa'n je'jatu. Jayajwat iwatcau mal mit jayajwat mit ca-itcʉjʉwu winchu̱jc, mit ipʉctsougau castigu icuerpuni'jcat ni'c we'n iguimerecia̱tcau, ni'c icuyaguigau Dios.
28Igajawangawu igui-is̈capcawa'n Dios, jemni'c Dios icuyaguigʉs̈ ma pensa̱tca mal, pa ma watca lo que ca-oyway nas̈watwa'n. 29Iwatcap nu'pʉjʉn mal, chajyo'ygap, iwatí̱jcap mal, iwangap jayje', iwatcap mal, i-angap jeme itcʉjʉpay, ago'jcap, tsuguinwatcap, we̱tcap, ipensa̱tcap mal, 30tu-ampiugap, tucotscap, i-angap Dios, apes̈cap, nimʉjninʉ́mgʉjʉp, niwatcʉjʉp mʉjayajwat, i-acchu̱chigap mal cosajat, igajayaumaygap ite̱jtat, 31iga-entendia̱tcap neti, igacumplia̱tcap lo que inʉmgapay, cajayawangap, igaperdona̱tcap nepʉn, iga-ayo̱wis̈cap jayajwat. 32Ijawigap nat iguinʉm Dios ni'c ma o'jca jeme iwatcapay wename, po majawe'naj siguia̱tp iguiwatca mal mit iwangap japu̱t jayajwat ma watca-ey ni-as̈amu.
Currently Selected:
Romanos 1: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
