El Apocalipsis 21
21
Namay tsajp mit namay na̱s̈
1Mit tʉn-is̈ namay tsajp mit namay na̱s̈, ni'c i-is̈togoygau ayé ampay tsajp mit ampay na̱s̈, mit lama̱t i-is̈togoygawey. 2Mit ʉ̱ Juan tʉn-is̈ ayé nʉ'jcopac icupi̱way Dios, ayé ijtʉp inʉ'jy namay Jerusalén. Mit ayé nʉ'jcopac Dios i-acmanac tsajpni'c, mit ayé nʉ'jcopac oyaguic itsʉ̱na as̈am tu'c novia adorna̱ticway pa iguimunipʉjcʉwa'n ina'u. 3Mit tʉnmarau tu'c jeme cotsway mʉgʉc tsajpni'c, inʉm:
—E'pnaj ni'c Dios iwatway itʉjc mam jayajwat, mit je' tsʉ̱náj mit je'jat, mit je'jat jatcáj ijayajwat, mit nije'yu Dios tsʉ̱náj mit je'jat, mit je' tanáj Dios pa je'jat. 4Mit Dios icupo'tcʉs̈á̱j iwinʉ'jat pa siempre, mit caja-o'jcáj, cajajʉygáj, mit cajapʉjcʉjʉ̱́j, ni'c nas̈way nu'pʉjʉn tristeza.
5Mit Dios jeme tsʉ̱napay itrononi'c, inʉm:
—Marau, tʉnyamwatp nu'pʉjʉn cosajat.
Mit tʉs̈najawey:
—Ja'y ayé, ni'c lo que tʉnyʉmpay ayé iyacs̈ta'cway, mit cumplia̱táj.
6Mit tʉs̈najau:
—Cumplia̱tway nu'pʉjʉn. Ʉ̱ tʉ-Alfa mit Omega, ayé inʉmo'jcʉp ni'c tʉtsʉ̱najʉ'c mit tʉgacʉs̈áj. Jeme nʉ-u̱go'jcʉ́mpay, tʉnmo'áj we'nujyu ayé nʉ' jeme mu'tí̱cpay pa ma ijtʉ vida cacʉs̈ámpay. 7Jeme vencia̱támpay, ipʉctsowáj nu'pʉjʉn cosajat, mit ʉ̱ tʉtanáj Dios pa je', mit ʉ̱ tʉnwayjatáj. 8Po pʉ̱tpayna'jat, cacupʉjcapay, jeme yo'ygapay mancha̱tic, ago'cpajyat, chajyo'ypajyat, tso'cna'jat, tiyu̱s̈wampajyat mit nu'pʉjʉn we̱tpajyat, je'jat Dios igui-actutso̱jcáj en ayé laguna jeme tinimpay mit jʉjn mit azufre. Ayʉ̱́j ayé últimu castigu.
Namay Jerusalén
9Mit cʉs̈ tʉs̈cutomiu tu'c de ayé siete ángejlat. Je'jat itcʉjʉu ayé siete vasujat patsijcatway mit ayé siete últimu castigujat, mit tʉs̈mucots, inʉm:
—Yam mi'n, tʉ-actu-e'páj ayé novia ipʉctsowámpay ayé borreguwáy Jesucristu, ayʉ̱́j inʉmo'jcʉp ni'c je' ipʉctsougʉs̈áj ijayajwat.
10Mit Espíritu Santu tʉs̈actu-is̈ tu'c visión, mit ayé ángel tʉs̈munʉcs̈ pa tu'c mʉjway copac yucmay, mit tʉs̈actu-is̈ ayé mʉjway nʉ'jcopac Jerusalén icupi̱way Dios, mit ayé Dios i-acmanac tsajpni'c. 11Mit jem itsʉ̱na Dios oymanac. Mit ayé nʉ'jcopac cuquijan oymanac as̈am tu'c tsa' oyway, as̈am jaspe-tsa' mit que's̈tunas̈ as̈am cristal. 12Mit ayé nʉ'jcopac ijtʉu tu'c mʉjway barda yucmay, mit ayé barda ijtʉu doce puertajat. Mit itey doce ángejlat tenagau en cada puerta, mit en cada puerta ijtʉu ja'yic tu'c nʉ'jy de ayé doce grupu de familiajat Israelway jayajwat. 13Mit it tu̱gup puertajat jeme e'pnʉs̈pay pa mam ipichin s̈ʉjw, pa norte tu̱gup puertajat, pa sur tu̱gup puertajat, mit itey tu̱gup puertajat jeme e'pnʉs̈pay pa mam itʉgʉynu s̈ʉjw. 14Mit ayé barda itway nʉ'jcopacni'c ijtʉwey doce basejat ni'pijcatway, mit en cada base ijtʉu ja'yic inʉ'jy tu'c de ayé doce apóstojlat jeme iservia̱tcajaway ayé borreguwáy Jesucristu.
15Mit ayé ángel jeme tʉs̈mucotsway, imuyo'y tu'c pʉ̱yan waticway de oro jeme ituquips̈pay. Mit ayé imuyo'yp pa iguituquips̈wa'n ayé nʉ'jcopac, ipuertajat mit ibarda. 16Mit cuadra̱tic itsʉ̱na ayé nʉ'jcopac, iyagachic mit i-awa'tsic ni-as̈amu. Mit ayé ángel ituquips̈ ayé nʉ'jcopac ayé pʉ̱yan, quinientos cincuenta kilómetros cada laj, ni'c iyagachic mit i-awa'tsic ni-as̈amu. 17Mit iquips̈ey ayé barda mit iyucmij ijtʉu sesenta y cuatro metru. Mit ayé ángel iquips̈an as̈amu jayajwat ituquips̈capay. 18Mit ayé barda watic de jaspe-tsa', po ayé nʉ'jcopac watic mit oro finuway, mit cuta'cs̈ as̈am is̈tic finuway. 19Mit ayé barda nʉ'jcopacni'cway ijtʉu ibasejat adorna̱tijcat mit nu'pʉjʉn tsa' oymanajcatway. Primeruway base tsʉ̱nau adorna̱tic mit jaspe-tsa', imumechcway base adorna̱tic mit zafiro-tsa', imutu̱gupay base adorna̱tic mit ágata-tsa', imumactas̈pay base adorna̱tic mit esmeralda-tsa', 20imucincuway base adorna̱tic mit ónice-tsa', imuseisway base adorna̱tic mit cornalina-tsa', imusieteway base adorna̱tic mit crisólito-tsa', imu-ochoway base adorna̱tic mit berilo-tsa', imunueveway base adorna̱tic mit topacio-tsa', imudiezway base adorna̱tic mit crisoprasa-tsa', imu-onceway base adorna̱tic mit jacinto-tsa', mit imudoceway base tsʉ̱nau adorna̱tic mit amatista-tsa'. 21Mit ayé doce puertajat doce perlajat ayé, ni'c cada puerta watic mit tu'c perla. Mit ayé calle nʉ'jcopacni'cway watic mit oro finuway, mit que's̈tunas̈ as̈am is̈tic.
22Mit tʉnga-is̈u netu'c templu en ayé nʉ'jcopac ni'c jem itsʉ̱na el Señor Dios jeme ijtʉpay nu'pʉjʉn poder, mit jemey itsʉ̱na ayé borreguwáy Jesucristu, mit je'jatu i-adora̱tcáj. 23Ayé nʉ'jcopac iganesita̱tp ne s̈ʉjw ne po' ma toy jem, ni'c ta'cs̈p jem Dios i-oymanagui, mit ayé borreguwáy Jesucristu ita'cs̈cʉs̈pey. 24Mit nu'pʉjʉn jayajwat jeme tsʉ̱ngaway salva̱tic yo'ygáj mit ayé luz iyacpay ayé nʉ'jcopac, mit tʉgʉygáj rejyat ayʉ̱́j mundujway mit imunʉs̈cáj jem nu'pʉjʉn cosa oymanacway. 25Mit s̈ʉ̱m iga-atujcáj ayé puertajat, ni'c jem ca-itáj tsu'. 26Mit tʉgʉygáj jem nu'pʉjʉn jayajwat jeme yo'ygapay oymanac mit jeme tsʉ̱ngapay mʉjninʉmic. 27Po catʉgʉygáj jem nejʉmay cosa caje'way limpiu, ne jeme iwatcapay mal, ne jeme we̱tcapay. Solo tʉgʉygáj jeme tsʉ̱ngapay ja'ygu'tic ilibruni'c ayé borreguwáy Jesucristu ni'c je'jat itcʉjʉp vida cacʉs̈ámpay.
Currently Selected:
El Apocalipsis 21: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
