El Apocalipsis 17
17
Icondena̱tcap ayé malto's̈ay
1Cʉs̈ min tu'c de ayé siete ángejlat jeme itcʉjʉway ayé siete vasujat. Mit tʉs̈nʉjmau:
—Yam mi'n, mit tʉ-actu-e'páj nat iguicondena̱tcawa'n ayé malto's̈ay, mit je' tsʉ̱nap mam initsougʉjʉ lama̱jtat. 2Mit je' itumuwatcʉs̈ mal rejyat ayʉ̱́j mundujway mit i-actuwatcʉs̈ mal nu'pʉjʉn jayajwat hasta inatswanigau iguiwatcawa'n más mal.
3Mit Espíritu Santu tʉs̈actu-is̈ tu'c visión, mit ayé ángel tʉs̈munʉcs̈ pa mam igatsʉ̱na nepʉn. Mit tʉn-is̈ tu'c to's̈ay tsʉ̱nap aníma̱tyucuinm, mit ayé aníma̱t tsabats, mit ijtʉwey may nʉ'jyat mit ayé nʉ'jyat itucotscap Dios. Mit ayé aníma̱t ijtʉu siete icopac mit diez iwaj. 4Mit ayé to's̈ay tsʉ̱nau cutigatsic mit jamuc moraduway mit tsabatsjamuc, mit adorna̱tic itsʉ̱na mit oro, mit tsa' ojyatway, mit cʉjwat tsowajway. Mit icʉ'ni'c ijtʉu tu'c vasu waticway de oro, mit patsic itsʉ̱na mit ma̱jlat. Ayé inʉmo'jcʉp ni'c mayo'c mal iguiwajt ayé to's̈ay. 5Mit iwimpacni'c ijtʉu tu'c nʉ'jy ja'yic, mit ayé solo Dios nas̈actujawip ti inʉmo'jcʉp, mit ja'yic we'n: Mʉjway Babilonia, ayé ima̱jmat malto's̈ajyat, ni'c je' ayé i-acchu̱chipay nu'pʉjʉn ma̱jlat ayʉ̱́j mundujway. 6Tʉn-is̈ ni'c ayé to's̈ay itumu̱jcʉp inipijnat Dios ijayajwat, mit we'ney inipijnat ayé jayajwat jeme i-ago'jcaway ni'c icupʉjcau Jesús. Tʉs̈-is̈ we'n, tʉnigu-épijyʉu jaran. 7Mit ayé ángel tʉs̈najau:
—¿Tini'c inyigu-épijyʉ? Ʉ̱ tʉ-actujawiyáj ti inʉmo'jcʉp ayé to's̈ay in-is̈way, mit we'ney ayé aníma̱t itucu'tpay jeme ijtʉpay siete icopac mit diez iwaj. 8Mit ayé aníma̱t in-is̈way, ayé tsʉ̱najʉ'c mit cʉs̈ togoy, po majawe'naj pichinájatu cʉtʉm, mit cʉs̈wa'n togoyájatu. Mit nu'pʉjʉn tsʉ̱ngapay en ayʉ̱́j mundu nigu-epigʉjʉ̱́j igui-e'pcawa'n ayé aníma̱t, ni'c je' tsʉ̱najʉ'c mit cʉs̈ togoy, mit pichinatu cʉtʉm. Ayé jayajwat nigu-epigʉjʉ̱́j mit ayé aníma̱t ni'c inʉ'jyat catsʉ̱ngap ja'ygu'tic desde ichu̱chij ayʉ̱́j mundu en ayé libru ijtʉpay Dios, mit jemni'c ca-itcʉjʉ̱́j vida cacʉs̈ámpay.
9’Ayʉ̱́j solo ijawigáj jayajwat jeme i-is̈capcapay may. Ayé siete copac ijtʉpay ayé aníma̱tna' inʉmo'jcʉp ayé siete copajcat itutsʉ̱napay ayé to's̈ay. 10Mit inʉmo'jcʉpey siete rejyat. Cinco de je'jat actogoygaway, mit tu'c manda̱tpnaj, mit jatu'cway canicu'tp pa imanda̱twa'n. Mit cuandu icu'twa'n, cajegáj imanda̱twa'n. 11Mit ayé aníma̱t jeme tsʉ̱najʉ'cway mit togoy, je' ayé imu-ochoway rey, mit je' ijtʉpey parte mit ayé siete rejyat, mit ayé nʉmic pa itogoywa'n.
12’Mit ayé diez wajna'jat in-ís̈away ayé aníma̱t, ayé inʉmo'jcʉp diez rejyat, mit aye'jat canicu'tcap pa imanda̱tcawa'n. Mit imoygáj poder pa tu'c ratujyu, mit manda̱tcáj tuwitic mit ayé aníma̱t. 13Ayé rejyat pensa̱tcáj ni-as̈amu, mit i-entrega̱tcajáj ipodejrat ayé aníma̱t pa je'yu ma manda̱t. 14Je'jat imutsuguinwatcáj ayé borreguwáy Jesucristu, po je' ivencia̱tcʉs̈áj ayé rejyat, ni'c je' más manda̱tp que jayajwat, mit más manda̱tp que rejyat. Po jeme imutʉgʉygaway Jesucristu, Dios iguiya̱s̈cau, mit iguicupiugau, mit je'jat cumplia̱tcap.
15Tʉs̈najawey ayé ángel:
—Ayé lama̱jtat in-is̈way mam itsʉ̱na ayé malto's̈ay, ayé inʉmo'jcʉp nʉ'jcopajcat, jayaujuc, naciójnat mit jeme cotscapay jatu'c ajwat. 16Mit ayé diez wajna'jat in-ís̈away ayé aníma̱t, inʉmo'jcʉpey ni'c i-ampʉjcáj ayé malto's̈ay, mit icuyaguigáj itu'gumu sin jamuc. Mit icaygajáj is̈is̈, mit jeme atanámpay ino'ctiningáj. 17Ni'c Dios i-acpensa̱tcʉs̈ ayé rejyat ma watca as̈am je' iguiwa'n, ni'c ayé rejyat tsʉ̱ngáj de acuerdu pa iguimoygawa'n ma manda̱t ayé aníma̱t hasta icumplia̱twa'n lo que inʉmway Dios. 18Mit ayé to's̈ay in-is̈way, ayé inʉmo'jcʉp ayé mʉjway nʉ'jcopac jeme idomina̱tcʉs̈pay nu'pʉjʉn rejyat ayʉ̱́j mundujway.
Currently Selected:
El Apocalipsis 17: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
