Santiago 5
5
Iche'jcʉs̈p ricujat
1Márauga ricujat, jʉ́yga mit ma tu'nga injo̱jtat ni'c mi'náj tiempu pa is̈tunas̈cawa'n. 2Pu̱tscada'guic intumi̱jnat itsʉ̱na, mit injamujcat iguicaygap na̱s̈wech. 3In-orojat mit implatajat chijtito'gaj itsʉ̱nga, mit ayé servia̱tp pa testigu contra mijchat, mit por ayé chijtit is̈condena̱tcáj jʉngʉtʉm. Natsʉ̱ngap últimu s̈ʉjwat po mijchat más inwatcap cuenta is̈apʉcmujca may tumi̱n. 4Inyos̈watpajyat jeme i-ajca's̈ʉ'jcaway incosechajat, jʉygap ni'c ingatso̱jcap, inwe̱jta̱jcapu. Mit Dios jeme imanda̱tpay nu'pʉjʉn imarap ijʉyga ayé yos̈watpajyat. 5En ayʉ̱́j mundu mitsʉ̱ngap oy mit inaguepcap tiyu inwangapay. Inwatcap lo que iyo'tpay injo̱jtat as̈am aníma̱t i-acye'cpʉjcapay pa igui-ago'jcawa'n. 6Inactunas̈cau mit inago'jcau tu'c jayau igawatway neti, mit je' ca-oyawu inicowajnʉ.
Na-atsʉ̱́nga mit calma mit na-orá̱tca
7Jemni'c hermanujat, atsʉ̱́nga mit calma hasta imi'nwa'n el Señor. E'pca as̈am tu'c camwatpay i-atsʉ̱nap tu'c cosecha oyway mit may calma hasta imi'nwa'n primer tu̱ mit jatu'c tu̱ ituye'gámpay ayé cosecha. 8Atsʉ̱́nga-ey mijchat mit calma. Nimajmóygʉjʉ ni'c tomo'ganu pa imi'nwa'n el Señor. 9Hermanujat, camniqueja̱tcʉjʉ mijchat pa pigatsʉ̱nga castiga̱tic mit Dios, ni'c je' ayé Juez mit tomo'c itsʉ̱na. 10Tʉnhermanujat, pʉjca ejemplu mit ayé profetajat jeme cotscaway pa el Señor, ni'c itunas̈cau may po imajmoygau mit calma. 11Injawigap ni'c oyninʉmijcat ayé jeme imajmoygapay cuandu iguitunas̈ca. Inmaraugaway nat Job iguimajmojy cuandu iguitunas̈. Mit injawigap ni'c cʉs̈ iguitunas̈, el Señor iguimajyiwatu, ni'c el Señor ayo̱wis̈o'cp mit jayawano'cp.
12Tʉnhermanujat, más oy pi nijawiga ayʉ̱́j: Camtʉ'tsjura̱tcayu, ne por itpay tsajpni'c, ne por itpay na̱s̈ni'c, ne por jatu'c juramentu. Te inyʉmgap jo̱, nʉmga ni'c jo̱. Te inyʉmgap ca̱j, nʉmga ni'c ca̱j, pi is̈cacondena̱tcac Dios.
13Te itunas̈p tu'c jayau mam intsʉ̱nga, ma ora̱t. Te ji'cp ijo̱jt tu'c jayau, ma ʉu pa iguimʉjninʉmwa'n Dios. 14Te tu'nij tambʉn mam intsʉ̱nga, ma ya̱s̈ca jayajwat jeme icuida̱tcapay cupʉcpajyat, ma igui-ora̱tcajac mit ma iguijatscajac aceite, mit ma yo'tcaja el Señor ma iguimajyiyac. 15Mit te cupʉjcap mʉgʉc cuandu i-ora̱tca, el Señor i-ac-oytanáj ayé tu'nijway mit i-ajca's̈ʉ'gáj. Mit te iwat mal, Dios iguiperdona̱jtáj. 16Nu'pʉjʉn mijchat ajque's̈ca ayé mal inwatcaway, mit orá̱tca pa pi oytanga. Te tu'c jayau yo'ypay yacs̈ic ora̱tp mʉgʉc, Dios oyap iguipo'jnap jaran. 17Ayé profeta Elías tu'c jayau as̈am ʉjtsatey, mit ora̱t mʉgʉc pa magami'n tu̱, mit caminu tu̱ na̱s̈ni'c pa tu̱gup s̈iwit mit seis meses. 18Mit cʉs̈ ora̱twatu, mit min tu̱, mit na̱s̈ i-acye'gatu nu'pʉjʉn cosecha.
19Hermanujat, te tu'c jayau mam intsʉ̱nga pichimp yacs̈icto̱uni'c, mit te tambʉn igui-acpitucpatu, 20jawiga ni'c te i-acpitucp ayé maljayau jeme pichinway yacs̈icto̱uni'c, imajyiyáj magatogoy pa siempre, mit Dios iguiperdona̱jtáj ayé mal iwatway.
Currently Selected:
Santiago 5: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
