1 Pedro 1
1
Tu'c saludu
1Ʉ̱ Pedro tʉs̈-apóstol Jesucristu ni'c je' tʉs̈ajyu't. Tʉja'ygʉs̈ap mijchat mitsʉ̱ngapay s̈is̈cada'guic jayna̱s̈ni'jcat. Mitsʉ̱ngap Ponto, Galacia, Capadocia, Asia mit Bitiniajway na̱s̈. 2Dios Nate̱jat is̈cupiugau desde ámbanu pa is̈watcawa'n lo que je' iwampay, mit jinap Espíritu Santu is̈-aparta̱tcau pa is̈jayaumaygawa'n Jesucristu, mit je' iyac inipin pa is̈chi'tcajáj nu'pʉjʉn mal inwatcaway. Dios pi is̈acmingajac may favor mit paz.
Na-atsʉ̱ngap jeme cacʉs̈pay
3Na-oyninʉ́mga Dios, el Señor Jesucristu ite̱t. Como je' nas̈-ayo̱wis̈o'jcap, nas̈moygau nam vida. Jat we'n ni'c Jesucristu jutucta̱c mam itsʉ̱nga á̱nimajat. 4Mit jinap na-atsʉ̱ngap lo que Dios nas̈moygámpay, ni'c je' i-aparta̱t tu'c lugar pa ʉjtsat mam je' itsʉ̱na tsajpni'c, mit ayé lugar catogoyáj, camancha̱tic mit ma̱jlat, mit ayé nunca cacʉs̈áj. 5Mit Dios nas̈cuida̱tcap mit ipoder ni'c nacupʉjcap je'. Mit je' nas̈cuida̱tcáj hasta natsʉ̱ngawa'n libra̱tic en ayé lugar i-oyacway Dios, mit ayé jatáj en ayé últimu s̈ʉjw cuandu imi'nwa'natu Cristu.
6Jemni'c ji'cp injo̱jtat. Jinap pa tu'c tiempujyu itp ti is̈tunas̈cawa'n mit may pruebajat. 7Intunas̈cap pa pi jawiga te micupʉjcap iyacs̈ta'cway, ni'c lo que incupʉjcapay ayé as̈am oro, ni'c ayé oro iproba̱tcap mit jʉjn pa ma pichin oy. We'ney mijchat Dios is̈proba̱tcap pa pi pichinga oy, mit ayé más oy que oro jeme togoypay. Te mipichingap oy, Dios is̈-oyninʉmgáj mit mitsʉ̱ngáj oy mit je' en ayé s̈ʉjw ique's̈ta'cwa'n Jesucristu.
8Ingani-e'pcap Jesucristu po inwangap je' mit incupʉjcap. Jemni'c ji'go'cp injo̱jtat ni'c mitsʉ̱ngáj tsajpni'c mam i-oymanagui. 9Mit impʉctsougáj premiu tsajpni'c, ni'c mitsʉ̱ngáj salva̱tic pa siempre. Jatáj we'n ni'c incupʉjcap Jesucristu.
10Mit ayé profetajat inʉmgau ámbanu ni'c Dios nas̈acmingajáj favor. Mit je'jat iwano'jcau iguijawigawa'n jutim imi'nwa'n Jesucristu pa nas̈salva̱tcáj. 11Mit Cristu imajyigʉs̈ ayé profetajat, mit i-actujawigʉs̈ desde ámbanu ni'c je' itunas̈áj mit cʉs̈wa'n tsʉ̱náj mʉjninʉmic mit Dios. Mit ayé profetajat iwangau iguijawigawa'n jutim imi'nwa'n Cristu mit jutim ijatwa'n lo que inʉmway ayé Espíritu. 12Mit Dios i-actujawigʉs̈ ayé profetajat ni'c ca-oyáj igui-e'pca nat imi'nwa'n Cristu ni'c ayé nʉmic pa ʉjtsat nas̈-e'pcawa'n. Mit Dios i-ajyu't Espíritu Santu desde tsajpni'c mit imoygʉs̈ poder ijayajwat pa ma nʉmdacyo'yga oyway noticia, mit jinap je'jat is̈ajque's̈cajawey mijchat. Mit ayé hasta ángejlat iwangapey igui-e'pcawa'n lo que Dios iwatpay pa mijchat.
Dios is̈ya̱s̈cap pi tsʉ̱nga limpiu
13Pensá̱tca oy pa intsʉ̱ngawa'n prepara̱tic, mit camwatcada̱jca tigapa'tu. Atsʉ̱́nga mit may calma lo que Dios iyagámpay, mit ayé impʉctsougáj ique's̈ta'cwa'n Jesucristu, ni'c Dios nas̈moygap favor. 14Mijchat Dios is̈wajyat ni'c injayaumaygap je'. Jemni'c camjawanga mal cosajat as̈am is̈wajnʉ'jcaj cuandu inganijawigap neti. Jinap camjawatca ayé mal iyo'tpay injo̱jtat. 15Dios nas̈ya̱s̈cau mit je' limpiu itsʉ̱na, jemni'c oy nayo'yga-ey limpiu. 16Ni'c ja'yic itsʉ̱na Dios ilibruni'c, inʉm Dios: “Yo'yga limpiu ni'c ʉ̱ limpiu tʉtsʉ̱́na.”
17Dios niwe'nu igui-e'pcʉs̈ nu'pʉjʉn jayajwat, mit je' ijuzga̱táj cada jayau as̈amu iguiwajt. Mit te inyo'tcajap Dios as̈am inte̱jtat, oy pi pʉ̱tca je' nu'pʉjʉn tiempu inyo'ygawa'n en ayʉ̱́j mundu, ni'c en ayʉ̱́j mundu natsʉ̱ngap as̈am jeme yo'ygapay jayna̱s̈ni'c. 18Dios is̈libra̱tcau ni'c ámbanu jalmanu-ate inyo'ygaj. Inwano'jcau ayé mal costumbrejat is̈yajcajaway inte̱jtat. Injawigap ni'c Cristu itso̱c pa nama̱jlat, po caje' mit oro ne plata jeme togoygapay. 19Je' itso̱c nama̱jlat mit inipin jeme valia̱tpay más. Ambanu icotscajau Dios tu'c borreguwáy limpiuway pa iguitso̱jcawa'n ima̱jlat, po como Cristu igawatu mal, je' nicotstʉgʉjyʉu mit Dios as̈am tu'c borreguwáy ca-ijtʉpay mancha ne cajinic mit ma̱jlat. 20Dios inʉm desde iguiwajt ayʉ̱́j mundu ni'c Cristu itso'gáj nama̱jlat, mit jinap je' min en ayʉ̱́j últimu tiempu pa natsʉ̱ngawa'n oy. 21Jinap nacupʉjcap Dios ni'c Cristu nas̈salva̱tcau, mit Dios i-acjutucta̱c Cristu mam itsʉ̱nga á̱nimajat, mit i-oyninʉm, pa we'n nacupʉjcáj más mit na-atsʉ̱ngáj hasta nas̈pʉctsougáj Dios.
22Ayé Espíritu Santu is̈majyigau pa is̈jayaumaygawa'n ayé oyway noticia jeme iyacs̈ta'cway, mit jinap limpia̱tic itsʉ̱na imvidajat, pa we'n inwangáj iyacs̈ta'cway inhermanujat, mit jemni'c niwángʉjʉ may mit nu'pʉjʉn injo̱jtat. 23Dios is̈namwatcau ni'c impʉctsougau lo que je' inʉmway. Ni'c Dios ipalabra catogoyp, caje' as̈am semilla na̱s̈ni'cway jeme togoypay, po je' ipalabra is̈moygap vida mit tamp injo̱tni'jcat pa siempre. 24Ni'c ja'yic itsʉ̱na Dios ilibruni'c:
Nu'pʉjʉn jayajwat as̈am ma'jts,
mit as̈am ique's̈ oymanac tu'c jayau, ayé as̈am tu'c ma'jts ipijic.
Ni'c ayé ma'jts cutʉ̱chip, mit ipijic cuca'p,
25po el Señor ipalabra tamp pa siempre.
Mit ayé palabra inʉmo'jcʉp ayé oyway noticia jeme is̈ajque's̈cajaway.
Currently Selected:
1 Pedro 1: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
