Hebreos 6
6
1Jemni'c nasiguiá̱tca pa jʉpm pa napíchinga oy mit Dios, mit itp ti nas̈yajcawa'n lo que napʉctajnʉ'jcaway cuandu nas̈-is̈cápcaj Cristu, mit nagamechpacchú̱chiga nije'yu ama̱s̈an. Jemni'c tʉgajanʉmgʉs̈ap jeme injawiganupay. Jinap incuyaguigaway ayé mal jeme caservia̱tway mit incupʉjcau Dios. 2Mit is̈ajque's̈cajau tu'c ama̱s̈an pi ninʉ'gutemgʉjʉ, mit is̈yajcajau icʉ'jat na'waywájat, is̈nʉmgajau ni'c jutucta̱jcáj á̱nimajat, mit is̈nʉmgajawey ni'c Dios juzga̱táj, mit lo que inʉmpay Dios tamp pa siempre. 3Mit nasiguia̱tcáj pa jʉpm mit Dios, ni'c je' nas̈majyigap.
4Mit una̱c jayajwat caja-oyáj inamjátca ni'c icuyaguigaway lo que icupʉjcaway. Ni'c i-is̈capcaway ayé oyway noticia, iproba̱tcaway ni'c oy lo que iyacpay Dios, mit ipʉctsougau Espíritu Santu. 5Mit iproba̱tcawey ni'c oy ayé palabra iyacpay Dios, mit ijawigau ni'c Dios i-ajque's̈áj ipoder en ayé tiempu mi'námpay. 6Mit como icuyaguigau ayé icupʉjcaway, nunca caja-oyáj inamjátca pa iguiyajcawa'natu ima̱lway to̱jwat, ni'c ayé jayajwat je'jatu ipensa̱tcap iguiyajcawa'natu Dios iway cunu̱s̈ni'c, mit por je'jat itucotscap Cristu. 7Ni'c ayé as̈am na̱s̈ cuandu ica'u tu̱, i-acs̈o'cp oymanac, mit i-acs̈u̱mp nu'pʉjʉn cosecha ojyatway pa jeme iyos̈watcajapay, ni'c Dios ibendiciona̱t ayé na̱s̈. 8Po te ayé na̱s̈ iyacp puru apit mit po'pwa̱tsan, ayé caservia̱tp, mit Dios imaldiciona̱táj, mit no'ctíninic icʉs̈cawa'n ayé.
Na-atsʉ̱ngap ayé premiu
9Po mijchat tʉwangʉs̈pay, maja tʉs̈nʉmwa'naj we'n, tʉtsʉ̱ngap seguru ni'c mijchat ingawatcáj we'n ni'c mitsʉ̱nganup salva̱tic. 10Ni'c Dios caje' as̈am maljayajwat. Je' iganijawiyo'tp lo que inwatcapay, ni'c inwangajap ijayajwat as̈amu is̈wánga je', ni'c inmajyigajau ijayajwat mit ayé inwatcap hasta jinap. 11Mit tʉnwangap cada jayau mam mijchat ma cuji'cs̈i más pa isiguia̱twa'n mit Dios, pa we'n tsʉ̱náj seguru pa iguipʉctsowa'n lo que i-atsʉ̱napay. 12Mit camcucandʉ'niga, más oy pi watca as̈am jeme ipʉctsougaway ayé promesa iyacway Dios. Je'jat ipʉctsougau ayé promesa ni'c cupʉjcau mit i-atsʉ̱ngau mit calma.
13Ni'c cuandu Dios iguiyájcaj promesa Abraham, Dios je'yu jura̱t ni'c ca-itu jatu'c más mʉjninʉmicway inʉ'jutámpay. 14Inʉm Dios: “Iyacs̈ta'cway mi̱ tʉbendiciona̱táj may, mit tʉmo'áj pi aguep may infamiliajat.” 15Mit como Abraham i-atsʉ̱nau mit may calma, ipʉctso̱u ayé promesa iyacway Dios. 16Ijura̱tcawa'n jayajwat, inʉ'jutcap tu'c más mʉjninʉmicway, mit je'jat jura̱tcap pa ma cʉs̈ nu'pʉjʉn tsuguin, mit itp ti icumplia̱twa'n. 17Dios iyajcʉs̈au tu'c promesa ijayajwat, mit iwan ma jawiga ni'c je' icumplia̱táj ipromesa, mit catigatsp lo que je' inʉmpay, jemni'c je'yu ijura̱t pa ma jawiga ni'c pichináj iyacs̈ta'cway. 18Mit ayé promesa mit ayé juramentu catigatscap ni'c Dios ca-oyap iwe̱t. Jemni'c na-aguepcap tu'c mʉjway consuelu ni'c Dios nas̈actsʉ̱ngap seguru, mit na-atsʉ̱ngáj ayé premiu iyagámpay Dios pa ʉjtsat. 19Mit como na-atsʉ̱ngap ayé premiu, jinap natsʉ̱ngap mʉgʉc mit Dios ni'c je' nas̈actangap. Mit jinap oyap nas̈cutómiga Dios as̈am ámbanu ayé mʉjpa̱nijat iguicutómigaj Dios cuandu itʉ́gʉygaj templutujugum. 20Po en ayé lugar tsajpni'cway mam itsʉ̱na Dios, tʉgʉjyʉ'c Jesús pa ʉjtsat natʉgʉygawa'ney. Mit je' tʉgʉy pa itanwa'n meru mʉjpa̱nij pa siempre, as̈am itajn mʉjpa̱nij Melquisedec.
Currently Selected:
Hebreos 6: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
