Hechos 17
17
Iwatcau tu'c ya's̈na̱s̈ en Tesalónica
1Inás̈caj nʉ'jcopajcat Anfípolis mit Apolonia, coygau nʉ'jcopac Tesalónica mam judíujat i-ítcʉjʉj itʉjcat mam i-adora̱tca. 2Mit Pablo, as̈am iguiwatí̱c, tʉgʉy mam je'jat, mit imucotscʉs̈ tu̱gup viaje po'cs̈ans̈ʉuni'jcat. 3Mit i-actujawigʉs̈ ti inʉmo'jcʉp Dios ilibru, ni'c Cristu it ti iguitunas̈ mit ijutucta̱jc mam itsʉ̱nga á̱nimajat. Mit inʉm:
—Ayé Jesús jeme tʉnʉmgʉs̈apay, ayé ayé Cristu i-ajyu'tway Dios.
4Mit una̱c judíujat icupʉjcau Jesús, mit imunipʉjcʉjʉu Pablo mit Silas. Mit cupʉjcawey mayo'c griegujat jeme i-adora̱tcaway Dios, mit mayo'c to's̈ajyat jeme mʉjninʉ́mijcatway. 5Wejpu'n judíujat jeme igacupʉjcaway Jesús, awa'nigau, mit i-apʉcmujcau una̱c maljayajwat jeme ca-itcʉjʉway yos̈. Igui-apʉcmújcaj tu'c jayaujuc, iwatcau tu'c ya's̈na̱s̈ nʉ'jcopacni'c, mit nʉs̈cau tuwitic Jasón itʉcm, ni'c iwangau igui-acpichingawa'n Pablo mit Silas mam itsʉ̱nga jayaujuc. 6Po igapa̱tcawu jem. Mit cʉs̈ imunʉs̈cau Jasón mit una̱c hermanujat pa mam itsʉ̱nga autoridajat en ayé nʉ'jcopac, mit ya̱s̈cau, inʉmgau:
—Mingawey yam jeme imunyajcapay nu'pʉjʉn jayajwat en ayʉ̱́j mundu. 7Mit Jasón ipʉctsougʉs̈ ayé jayajwat, mit nu'pʉjʉn as̈am je'jat igawatcap as̈am iguimanda̱jt rey César, po inʉmgap ni'c itp jatu'c rey inʉ'jyway Jesús.
8Mit iguimáraugaj lo que inʉmgaway judíujat, ya̱s̈cada̱jcau nʉ'jcopac jayajwat, mit pensa̱to'jcau autoridajat en ayé nʉ'jcopac. 9Jasón mit ayé jayajwat jeme tsʉ̱ngaway mit je' iyajcau fianza, mit cʉs̈ i-acjo'ngau.
Bereajwayna'jat ipʉctsougajau Dios ipalabra
10Mit cʉs̈ hermanujat tsu'm igui-acnʉ́s̈caj jaran Pablo mit Silas hasta nʉ'jcopac Berea. Icóygaj jem, tʉgʉygau mam judíujat i-adora̱tca. 11Mit Bereajwayna'jat más oyjayajwat que Tesalónicajatway ni'c ipʉctsougajau jaran Dios ipalabra, mit cada s̈ʉjw iche'ngau Dios ilibruni'c pa igui-e'pcawa'n te iyacs̈ta'cway lo que inʉmgapay Pablo mit Silas. 12Jemni'c iguicupʉ́jcaj Jesús mayo'c Bereajwayna'jat. Mit may griegujat cupʉjcau, to's̈ajyat oyninʉ́mijcatway mit jayajwat. 13Mit judíujat Tesalónicajway ijawigau ni'c Pablo inʉmdacyo'yey Dios ipalabra en Berea. Mit cʉs̈ nʉs̈cau, mit jem i-acya̱s̈cada̱jcawey nʉ'jcopac jayajwat. 14Mit cʉs̈ hermanujat i-acnʉs̈cau jaran Pablo pa lama̱t-auni'c, po Silas mit Timoteo tangau jem. 15Mit jeme nʉs̈caway mit Pablo, imunʉs̈cau pa nʉ'jcopac Atenas. Mit Pablo inʉmgʉs̈au ma nʉ́mgaja Silas mit Timoteo ma minga jaran mam je'. Cʉs̈ nʉs̈cau.
Pablo imucotscʉs̈ Atenaswayna'jat
16Mit Pablo i-atsʉ̱ngʉs̈ jem Atenas, mit tu'no'c ijo̱jt igui-is̈ ni'c it mayo'c tiyu̱s̈at en ayé nʉ'jcopac. 17Jemni'c iguimucotscʉs̈ judíujat mam i-adora̱tca, mit japu̱jtat jeme i-adora̱tcaway Dios. Mit cada s̈ʉjw iguimucotscʉs̈ jeme imunipa̱tcʉs̈ʉway plazani'c. 18Mit jem itsʉ̱ngaj una̱c i-estudia̱tcaway lo que i-ajque's̈capay epicúreojat, mit ja-una̱c i-estudia̱tcau lo que i-ajque's̈capay estoicojat. Mit je'jat imu-ampiugau Pablo. Mit una̱c inʉmgau:
—¿Ti nas̈nʉmgajáj ayʉ̱́j jayau jeme cotso'cpay?
Mit ja-una̱c inʉmgau:
—Ayʉ̱́j i-ajque's̈tacyo'yp nam diosat.
Inʉmgau we'n ni'c Pablo inʉmdacyo'jyau Jesús i-oyway noticia, mit inʉm ni'c Jesús jutucta̱c. 19Mit imunʉs̈cau Pablo pa tu'c laj inʉ'jyway Areópago mam iguiwatí̱jca asamblea. Mit inʉmgajau:
—¿Jawi te is̈nʉmgajáj ti inʉmo'jcʉp ayʉ̱́j namay ama̱s̈an inajque's̈pay? 20Ni'c is̈actumaraugap cosajat nunca tʉnganimaraugapay. Tʉnwangap tʉs̈jawigawa'n ti inʉmo'jcʉp ayʉ̱́j cosajat.
21Inʉmgau we'n ni'c nu'pʉjʉn Atenaswayna'jat mit pe'ta̱majyat jemay inas̈cap tiempu puru pa iguinʉmgawa'n o iguimaraugawa'n tu'c cosa namay.
22Mit Pablo nitenda̱jcʉu es̈pu̱tum mam je'jat en ayé laj inʉ'jyway Areópago, inʉmgʉs̈au:
—Jayajwat Atenasatway, tʉn-e'p ni'c más inwano'jcap tiyu̱s̈at. 23Ni'c cuandu tʉnas̈, tʉn-is̈ intempluni'jcat, mit tʉmpa̱t tu'c altar mam itsʉ̱na ja'yic yename: “PA DIOS NAGA-IS̈CAPCAPAY”. Mit ayé Dios inadora̱tcap mmit inga-is̈capcap pʉn ayé. Mit jinap ayé Dios tʉ-actu-is̈capcʉs̈áj.
24’Dios iwat mundu mit nu'pʉjʉn cosa itpay yam, mit je' imanda̱tp tsajp mit na̱s̈. Je' igatutsʉ̱nap templujat cʉ'wátijcatway. 25Mit ʉjtsat ca-oyap nas̈májyiga Dios. Je' igawamp neti, ni'c je' imoygʉs̈p vida pa nu'pʉjʉn, mit je' ayé nas̈moygapay s̈e'm pa natsʉ̱ngawa'n oy, mit je' nas̈moygap nu'pʉjʉn cosajat.
26’Mit Dios iwatcʉs̈ nu'pʉjʉn jayajwat ni-as̈amu pa ma tutsʉ̱nga nu'pʉjʉn na̱s̈, mit je' iyac tu'c tiempu pa itutsʉ̱ngámpay, mit iyac ayé lugar mam itsʉ̱nawa'n cada jayau. 27Dios iwat we'n pa jayajwat ma iguiche'ngac je', mit te iche'ngap oymanac ipa̱tcáj Dios, ni'c Dios tom itsʉ̱na mam nu'pʉjʉn ʉjtsat. 28Ni'c je' ayé nas̈moygapay vida, mit por je' nayo'ygap, mit na̱itcau por je', as̈am iguinʉ́mgaj poetajat inyʉ'jcopacni'cway. Mit inʉmgawey: “Ʉjtsat nas̈wajyatey Dios.” 29Como ʉjtsat nas̈wajyat Dios, naganʉmgawit ni'c Dios as̈am tu'c tiyu̱s̈ cʉ'waticway de oro, plata o tsa'. Dios caje' as̈am jayajwat iguipensá̱tca. 30Mit ampay jayajwat iwatcau mal po Dios igawatcʉs̈u cuenta ni'c iga-is̈capcawu neti, po jinap imanda̱tp nu'pʉjʉn jayajwat jʉmgapa'tu ma cuyaguiga ima̱lway to̱jwat. 31Ni'c Dios icupi̱u tu'c s̈ʉjw itujuzga̱tcʉs̈ámpay nu'pʉjʉn jayajwat en ayʉ̱́j mundu, mit ijuzga̱tcʉs̈áj yacs̈ic nat je' iguijawi natsʉ̱́nga. Mit Dios iyac Jesús pa nas̈juzga̱tcáj. Dios nas̈actujawigap ni'c iyacs̈ta'cway ayé ni'c i-acjutucta̱c Jesús mam itsʉ̱nga á̱nimajat.
32Mit ayé jayajwat imaraugau Pablo iguinʉjm ni'c á̱nimajat jutucta̱jcáj, mit una̱c itus̈i̱jcau, mit ja-una̱c inʉmgajau:
—Tʉnmaraugáj jatu'mbac ayʉ̱́j is̈nʉmgajaway.
33Mit cʉs̈ Pablo pichin mam je'jat. 34Po una̱c icupʉjcau Jesús, mit imunipʉjcʉjʉu Pablo. Cupʉjcawey Dionisio Areópagojway, mit tu'c to's̈ay inʉ'jyway Dámaris, mit we'ney japu̱jtat mit je'jat.
Currently Selected:
Hechos 17: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
