Hechos 12
12
Herodes i-ago'c Jacobo, mit Pedro cuytʉjcomic
1En ayé nije'yu tiempu rey Herodes chu̱chiu iguiwatcʉs̈a mal una̱c cupʉcpajyat. 2Mit i-ac-ago'jcʉu mit espada Jacobo, Juan imajtsʉc. 3Igui-is̈ Herodes ni'c iguigusta̱tcap we'n judíujat, je' siguia̱t mit i-actanwey Pedro. Jat we'n en ayé ma̱s̈ʉjw cuandu iguicáygaj ma̱s̈anʉ̱n sin levadura. 4Mit igui-actángaj Pedro, Herodes icom cuytujugum, mit i-entrega̱tcʉs̈ mactas̈p grupu de mactas̈p soldájat ma cuida̱tca. Mit Herodes ipensa̱t igui-acpichinwa'n Pedro inas̈wa'n ma̱s̈ʉjw pascua, mit i-ac-ago'jcʉ̱́j jayau-awa'tsam. 5Jemni'c Pedro iguicuidá̱tcaj cuytujugum, po cupʉcpajyat i-ora̱ti̱jcajau Dios pa ma majyi Pedro.
Tu'c ángel i-acpichin Pedro cuytujugum
6Mit Herodes i-ac-ago'jcʉ̱́jate Pedro icus̈ʉwiwa'n, po nije'yu tsu' ma̱p Pedro entre mechc soldájat, mit cutsumda'guic itsʉ̱naj mit mechc cadena, mit cuida̱tpajyat tsʉ̱ngau pe'ta̱m tʉc-auni'c, icuida̱tcap presutʉjc. 7Mit cʉs̈ que's̈ta̱c el Señor Dios i-ángel, mit anangada̱c tu'c luz cuytujugum. Iguipás̈aj Pedro icabapni'c, i-acjutuc, inʉm:
—Ca's̈ʉ'c jaran.
Mit cʉs̈ cadenajat iguica'ugajau icʉ'ni'jcat. 8Iguinʉjmau ángel:
—Actsʉ'cs̈ incinturón mit com incʉ'ac.
Mit we'n iguiwajt Pedro. Cʉs̈ iguinʉjmau:
—Com inma'nchec mit natspoguiyac.
9Mit Pedro pichin mit inatspoguiu ayé ángel, mit canimojyʉpate cuenta ni'c iyacs̈ta'cway lo que iwatpay ayé ángel, po je' inʉmpayta ni'c cucma̱p. 10Iguinás̈caj primeruway mit segunduway grupu de soldájat, coygau pa mam i-it tu'c pus̈antʉc-ajw jeme pichimpay pa nʉ'jcopacni'c. Ayé tʉc-ajw je'yu ni-awa̱jtsʉu, mit ipíchingaj, ituyo'ygau tu'c calle, mit cʉs̈ ayé ángel iyac Pedro itu'gumu. 11Mit cʉs̈ Pedro nimojyʉu cuenta, inʉm:
—Jinap que tʉnjawinup ni'c iyacs̈ta'cway el Señor Dios i-ajyu't i-ángel mit tʉs̈acpichin Herodes icʉ'jugum, mit tʉs̈acpichiney judíujat icʉ'jugujmat, ni'c je'jat iwangapate tʉs̈ago'jcáj.
12Ipensa̱jt wename, Pedro coy tʉc María, Juan Marcos ima̱m, mit mayo'c ni-apʉcmujcʉjʉu jem mit ora̱tcau. 13Mit Pedro ipas̈ tʉc-ajw pe'tni'cway, mit pichin igui-e'p tu'c quis̈aywáy inʉ'jyway Rode. 14Mit ayé quis̈ay iguijawij ni'c cotsp Pedro, ji'cta̱c ijo̱jt, po iga-awa̱tsu jaran tʉc-ajw. Je' nʉcs̈ pujʉ'c pa tujugum, mit inʉmgʉs̈au ni'c Pedro tsʉ̱nap tʉc-auni'c. 15Mit je'jat iguinʉmgajau:
—Mi̱ miloca.
Po je' inʉmgʉs̈au ni'c iyacs̈ta'cway. Mit cʉs̈ je'jat inʉmgau:
—Dejuru i-ángel ayé iguicuida̱tpay.
16Po Pedro siguia̱t iguipas̈ tʉc-ajw, mit igui-awa̱jts, i-is̈cau ni'c je' ina̱mac, mit nigu-épigʉjʉu. 17Po je' iwatcʉs̈au seña magacotsca, mit i-ampiugʉs̈au nat igui-acpichin el Señor Dios cuytujugum. Mit inʉmgʉs̈au:
—Actujawiga-ey Jacobo mit hermanujat ti tʉs̈jatway.
Cʉs̈ pichin Pedro, mit nʉcs̈ jatu'c laj.
18Icus̈ʉwij, ni-ucyo'tcʉjʉu soldájat, ni'c igajawigawu jʉm inʉjcs̈ Pedro. 19Mit Herodes iche'n Pedro, mit como igapa̱tu, i-ucyo'tcʉs̈ ayé cuida̱tpajyat, mit cʉs̈ manda̱t ma ago'jca je'jat. Mit cʉs̈ Herodes pichin Judeajway na̱s̈ pa inʉs̈wa'n Cesarea, mit jem itajn.
O'c Herodes
20Mit Herodes imu-awa'nigʉs̈ ayé jayajwat jeme tsʉ̱ngaway Tiro mit Sidón, po je'jat mimbʉ'ngau mam je' mit i-amigujatcau Blasto ni'c je' ijtʉu mʉjway cargu mit rey Herodes, mit iyo'tcajau ma iguigacomgajac tsuguin, ni'c je'jat caygap reyna' ina̱s̈ni'c. 21Mit Herodes iyajcʉs̈au tu'c s̈ʉjw itucoygámpay jem, mit wejpu'n Herodes tsʉ̱nau cutigatsic mit puru jamuc oyway, mit nitsʉ̱nda̱jcʉu itrononi'c mit imucotscʉs̈ nu'pʉjʉn jayajwat. 22Mit nu'pʉjʉn jayajwat chu̱chigau ya̱s̈pay, inʉmgau:
—¡Cotsp as̈am tu'c dios, mit caje' jayau!
23Mit cʉs̈ igui-actu'jnʉu jaran el Señor Dios i-ángel, ni'c iga-oyninʉmu Dios, je'yu nimʉjninʉjmʉu. Mit ijo̱jtugum iguicaygau tsugujtat, mit cʉs̈ o'c.
24Mit hermanujat más i-ajque's̈cajau Dios ipalabra, mit inʉmdacyo'ygau nu'pʉjʉn parte.
25Mit Bernabé mit Saulo cʉs̈ iguimájyigaj, pichingau Jerusalén. Mit imunʉs̈cawey Juan Marcos.
Currently Selected:
Hechos 12: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
