Hechos 11
11
Pedro nicowajnʉu
1Imaraugau apóstojlat mit hermanujat jeme tsʉ̱ngaway Judeajway na̱s̈ ni'c we'ney iguicupʉ́jcajaj Dios ipalabra ayé jayajwat jeme caje'jatway judíujat. 2Ipítucnuj Pedro pa Jerusalén, judíujat jeme cupʉjcaway imuninʉmgʉjʉu je', 3inʉmgajau:
—¿Tini'c is̈tʉcyo'ygʉs̈ jayajwat jeme caje'jatway judíujat? ¿Tini'c is̈mucaygʉs̈ je'jat?
4Mit cʉs̈ Pedro chu̱chiu igui-ampiugʉs̈a nu'pʉjʉn jeme jatway, inʉm:
5—Ʉ̱ tʉtsʉ̱nau nʉ'jcopac Jope mit tʉ-ora̱tpate, mit Dios tʉs̈actu-is̈ tu'c visión, mit tʉn-is̈ tu'c cosa as̈am tu'c manta mʉjway jeme manacpay tsajpni'c, mit tsumic itsʉ̱naj inimactas̈pij i-esquina, mit coy hasta mam tʉtsʉ̱naj. 6Mit tʉngu-e'pca̱t ayé cosa, mit cʉs̈ tʉpensa̱t ¿ti ayé? Mit tʉn-is̈ aníma̱jtat ojyatway mit aníma̱jtat ma̱jlatway, tsanajyat mit jonwájat. 7Mit tʉnmarau ni'c cotsp el Señor mit tʉs̈nʉjmau: “Ca's̈ʉ'c, Pedro, ago'c mit cay.” 8Mit tʉnyʉjmau: “Ca̱ Señor, ni'c nunca tʉnganicayp nejʉmay cosa jeme ca-oyway nas̈caywa'n ne jeme caje'way limpiu.” 9Mit wejpu'n tʉs̈po'nwatu desde tsajpni'c: “Jeme Dios inʉmway ni'c limpiu, camnʉmwit ni'c ca-oy nas̈caywa'n.” 10Mit jat we'n tu̱gup viaje, mit cʉs̈ nu'pʉjʉn ayé cosajat imunʉcs̈nuwatu pa tsajpni'c. 11Mit en ayé ratu icóygaj tu̱gup jayajwat en ayé tʉjc mam ʉ̱ tʉtsʉ̱́naj. Ayé jayajwat i-acmingau desde nʉ'jcopac Cesarea pa tʉs̈che'ngáj ʉ̱. 12Mit Espíritu Santu tʉs̈najau ni'c tʉnʉs̈ mit je'jat mit tʉgapensa̱t neti. Mit nʉs̈cawey mit ʉ̱ ayʉ̱́j seis hermanujat. Mit tʉcóygaj jem, tʉtʉgʉygau tu'c jayau itʉcm. 13Ayé jayau tʉs̈ampiugajau nat igui-is̈ tu'c ángel itujugum jeme tenaway mit iguinʉjmaway: “Ajyu'tcʉs̈ jayajwat pa nʉ'jcopac Jope, mit acmi'n Simón jeme inʉ'jywayey Pedro. 14Je' is̈nʉjmáj nat inyisalva̱tcʉjʉwa'n mi̱ mit nu'pʉjʉn intʉcm tsʉ̱ngapay.” 15Mit tʉchu̱chij cotspay, Dios imoygʉs̈wey Espíritu Santu as̈am primeru nas̈moygawey ʉjtsat. 16Cʉs̈ tʉnyijawiu lo que inʉmway el Señor Jesús, inʉm: “Iyacs̈ta'cway Juan nʉ'gutem mit nʉ', po Dios is̈moygáj Espíritu Santu.” 17Te Dios imoygʉs̈ey Espíritu Santu pa je'jat as̈am je' nas̈moygau ʉjtsat jeme nacupʉjcaway el Señor Jesucristu, ¿is̈jawiga ʉ̱ oyáj tʉs̈atuc Dios?
18Cʉs̈ ayé hermanujat iguimáraugaj ayé cosajat, cajacotscawu mit i-oyninʉmgau Dios, inʉmgau:
—¡Dios imoygʉs̈ laj hasta caje'jatway judíujat ma cuyaguiga ima̱lway to̱jwat pa ma aguepca vida cacʉs̈ámpay!
Cupʉcpajyat Antioquíajatway
19Cuandu igui-ago'jcaj Esteban, chu̱chigawey iguipo'ctánga japu̱t cupʉcpajyat, mit je'jat po'jcau hasta Feniciajway na̱s̈, Chiprejway na̱s̈ mit pa nʉ'jcopac Antioquía. Mit solo inʉmgajau Dios ipalabra pa judíujatu, mit pe'ta̱may jayajwat ca̱j. 20Mit entre je'jat it una̱c cupʉcpajyat Chiprejatway mit Cirenejatway. Icóygaj Antioquía, imucotscau jeme caje'jatway judíujat, mit inʉmgajau ayé oyway noticia iyacway el Señor Jesús. 21Mit el Señor iguimajyigau je'jat mit ipoder, mit mayo'c chu̱chigau iguicupʉjca el Señor.
22Mit cupʉcpajyat Jerusalénway imaraugau jeme jatway jem, mit i-ajyu'tcau Bernabé ma nʉs̈ hasta Antioquía. 23Icojy jem, Bernabé i-is̈ ni'c Dios imoygʉs̈ favor, mit ji'cta̱c ijo̱jt. Mit itsawigʉs̈ nu'pʉjʉn ma siguia̱tca iguicupʉjcawa'n el Señor Jesús mit nu'pʉjʉn ijo̱jtat. 24Mit Bernabé tu'c jayau oyway, mit tsʉ̱nau mʉgʉc Espíritu Santu ijo̱tni'c, mit icupʉc may Dios. Mit may jayajwat chu̱chigau iguicupʉjca el Señor Jesús.
25Mit cʉs̈ Bernabé nʉcs̈ pa Tarso pa iguiche'nwa'n Saulo, mit iguipa̱jt, imumin pa Antioquía. 26Mit je'jat tsʉ̱ngau tu'c s̈iwit mit cupʉcpajyat jemay, mit i-ajque's̈cajau may jayajwat. Mit wejpu'n ayé cupʉcpajyat chu̱chigau iguinʉ'jymoygap cristianujat en ayé nʉ'jcopac Antioquía, ni'c je'jat icupʉjcau Cristu.
27Mit en ayé s̈ʉjwat mingau profetajat Jerusalén hasta Antioquía. 28Mit mam itsʉ̱nga hermanujat, nitenda̱jcʉu tu'c profeta inʉ'jyway Agabo, mit je' igui-actujawiu Espíritu Santu ti jatámpay. Inʉm ni'c itáj tu'c yu' mʉgʉcway nu'pʉjʉn laj mam itsʉ̱nga jayajwat. Ayé yu' it cuandu imanda̱jt rey Claudio. 29Mit cʉs̈ cada cupʉcpay, según i-oyaj, ipensa̱tcau igui-ajyu'tcawa'n ayuda pa ayé hermanujat jeme tsʉ̱ngaway Judeajway na̱s̈. 30Mit we'n iguiwátcaj, mit i-ajyu'tcau Bernabé mit Saulo ma munʉs̈ca ayuda pa ayé jayajwat icuida̱tcapay cupʉcpajyat Judeajway na̱s̈.
Currently Selected:
Hechos 11: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
