2 Tesalonicenses 3
3
Orá̱tca pa ʉjtsat
1Mit jinap, hermanujat, orá̱tca pa ʉjtsat pa tʉnʉmdacyo'yga jʉmgapa'tu el Señor ipalabra pa ma pʉctsouga oy as̈am mijchat is̈pʉctsóugaj. 2Orá̱tca-ey pa Dios ma tʉs̈libra̱tcac mam i-it jayajwat ma̱lo'jcatway, ni'c caje' nu'pʉjʉn jayajwat icupʉjcap Dios iyacs̈ta'cway. 3Mit el Señor Dios icumplia̱tp, mit je' is̈moygáj maj, mit je' is̈cuida̱tcáj mam i-it ma̱jlat. 4Tʉconfia̱tcap mit mijchat ni'c nacupʉjcap el Señor, ni'c inwatcap as̈am tʉmandá̱tcaj, mit siguia̱táj is̈wátca. 5Mit el Señor pi is̈actujawigac injo̱tni'jcat ni'c je' is̈wangap, mit is̈actumajmoygámpey nu'pʉjʉn pruebajat as̈am Cristu iguimajmojy.
Itp ti nayos̈watwa'n
6Hermanujat, tʉmanda̱tcap mijchat as̈am el Señor Jesucristu tʉs̈manda̱tcau ʉjtsat, pigamunipʉjcʉjʉ tu'c hermanu candʉ'nway pa iyos̈watwa'n, ne igasiguia̱jtap lo que tʉ-ajque's̈cajaway. 7Mijchat injawigap ni'c itp ti is̈watcawa'n as̈am ʉjtsat tʉs̈wátcaj, ni'c cuandu tʉtsʉ̱́ngaj mit mijchat, tʉgacandʉ'nwatcawu. 8Tʉgacaygawu nejʉm we'nu, po tsu'm mit s̈ʉ̱m tʉyos̈watcau mʉgʉc hasta cʉs̈ tʉnjo̱jtat pa pigatunas̈ca is̈mantenia̱tcáj. 9Mit tʉnaguepcapate derechu is̈mantenia̱tcáj, po tʉyos̈watcau pa tʉyajcajawa'n ejemplu pa pi watca as̈am ʉjtsat tʉs̈wátcaj. 10Ni'c cuandu tʉtsʉ̱́ngaj mit mijchat tʉnʉmgajau ni'c te tu'c jayau igawamp iyos̈watwa'n, magacay. 11Tʉnmaraugap ni'c cʉjtu'c jayajwat mam mijchat candʉ'jnat pa iyos̈watcawa'n, solo itunitʉgʉygʉjʉp jayje'. 12Mit as̈am ayé jayajwat tʉnmanda̱tcap mit tʉntsawigap as̈am tʉs̈manda̱tcau el Señor Jesucristu, ni'c ma yos̈watca tranquilu je'jat iyos̈ni'jcat pa icaygawa'n.
13Mit mijchat, hermanujat, camyajca is̈watcawa'n oy. 14Te tu'c jayau igamarap lo que tʉnyʉmgapay nocni'c, ajcuque's̈ca ayé jayau mit cammunipʉ́jcʉjʉ je' pa ma winchu̱ga. 15Po inga-e'pcáj je' as̈am inmutsuguijnat, po intsawigáj as̈am tu'c inhermanujat.
Pablo ibendiciona̱tcʉs̈p
16Mit el Señor nas̈moygapay paz pi is̈moyí̱jcac paz jʉmgapa'tu mam intsʉ̱ngawa'n. El Señor pi is̈mutangac mijchat minu'pʉjʉjnat.
17Ʉ̱ Pablo tʉnajyu'táj ayʉ̱́j saludu ja'yic tʉncʉ'ni'c, mit we'n tʉs̈firma̱t nu'pʉjʉn noc. 18El Señor Jesucristu pi is̈moygac favor pa mijchat minu'pʉjʉjnat. Amén.
Currently Selected:
2 Tesalonicenses 3: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
