2 Tesalonicenses 2
2
Cristu imutsuguin
1Hermanujat, mi'náj el Señor Jesucristu, mit en ayé s̈ʉjw nani-apʉcmujcʉjʉ̱́j mit je'. 2Po tʉnʉmgajap camtʉ'tscupʉ́jcayu jaran ne campensa̱tca te inʉmgap ni'c coynup ayé s̈ʉjw itumi'námpay el Señor. Camcupʉjca jeme inʉmámpay we'n, ne jeme i-acotstujcapay tiempu, ne jeme anuncia̱tcapay, ne camcupʉjca-ey tu'c noc jeme inʉmgámpay ni'c ʉjtsat tʉnja'ygau. 3Nes̈ʉ̱n cammoyga laj is̈we̱tcáj nepʉn, ni'c itáj ti imijnʉ'cwa'n tu'c mal tiempu ni'c jayajwat imutsuguinwatcáj Dios, mit que's̈ta̱jcʉ'gáj Cristu imutsuguin, jeme nʉmicway pa itogoywa'n. 4Mit je' ca's̈ʉ'gáj mit imutsuguinwatáj Dios mit we'ney nu'pʉjʉn cosa inʉmgapay ni'c diosat, mit igawa'náj nu'pʉjʉn cosa na-adora̱tpay. Mit je' nitsʉ̱nda̱jcʉ̱́j en ayé laj mam igui-adorá̱tca Dios, mit je' niwajtʉ̱́j as̈am Dios.
5¿Inganijawigap ni'c we'n tʉnʉmgʉ́s̈aj cuandu tʉtsʉ̱́naj mit mijchat? 6Mit injawigap ti ayé igui-atucpay ayé maljayau pa magami'n jaran. Mit que's̈ta'gáj po hasta iguicojyáj itiempu. 7Ni'c yos̈watnup anu'mu Cristu imutsuguin, po i-atsʉ̱nap hasta ipichinwa'n ayé jeme jinap igui-atucpay. 8Cʉs̈wa'n que's̈ta'gáj Cristu imutsuguin, po ique's̈ta'cwa'n oymanac el Señor, i-actogoyáj jaran mit ipalabra jeme ijtʉpay maj, mit itu'mbajcʉs̈áj jaran ayé maljayau. 9Cristu imutsuguin mi'náj ni'c iguimo'áj poder Awayagatsna'. Mit ijtʉ̱́j may poder, mit iwatáj milagrujat mit i-acnigu-epigʉs̈ʉ̱́j jayajwat pa iguiwe̱jta̱jcʉs̈wa'n. 10Mit icomgʉs̈áj nu'pʉjʉn we̱t ma̱lway pa jeme togoygámpay ni'c ayé jayajwat igawangawu lo que iyacs̈ta'cway pa inisalva̱tcʉjʉwa'n. 11Jemni'c Dios imoygʉs̈p laj ma niwe̱tcʉjʉ, pa más macupʉjca ayé we̱t, 12pa ma tsʉ̱nga condena̱tijcat nu'pʉjʉn jeme igacupʉjcaway lo que iyacs̈ta'cway, ni'c más iwangau nu'pʉjʉn ma̱jlat.
Cupʉcpajyat cupíwijcat pa inisalva̱tcʉjʉwa'n
13Hermanujat, is̈wangap el Señor, mit ʉjtsat itp ti tʉs̈nʉmi̱jcajawa'n Dios ni'ctiyu̱s̈ por mijchat ni'c Dios is̈cupiugau desde ámbanu pa pi nisalva̱tcʉjʉ ni'c is̈limpia̱tcau Espíritu Santu mit ni'c incupʉjcawey lo que iyacs̈ta'cway. 14Mit Dios is̈ya̱s̈cau ni'c incupʉjcau ayé oyway noticia tʉnʉmgajaway, mit is̈ya̱s̈cawey pa is̈aguepcawa'n parte mit el Señor Jesucristu mam jinap itsʉ̱na mʉjninʉmic.
15Hermanujat, jemni'c pi siguia̱tca mʉgʉc, mit mutánga ayé ama̱s̈an tʉ-ajque's̈cajaway, te tʉnʉmgajap o te tʉja'ygajap nocni'c. 16Mit el Señor Jesucristu mit Dios Nate̱jat nas̈wangap, nas̈consola̱tcap pa siempre, mit nas̈actu-atsʉ̱ngap tu'c cosa oyway ni'c nas̈moygau favor, 17pi is̈-animá̱tcac, pi is̈moygac maj injo̱tni'jcat pa is̈nʉmgawa'n nu'pʉjʉn cosa oyway mit pa is̈watcawa'n nu'pʉjʉn cosa oyway.
Currently Selected:
2 Tesalonicenses 2: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
