1 Tesalonicenses 5
5
1Hermanujat, ca-itp ti tʉja'ygʉs̈awa'n ti tiempu o ti s̈ʉjw imi'nwa'n Jesús. 2Ni'c bien is̈jawiga ni'c icojawa'n ayé s̈ʉjw itumi'námpay el Señor Jesús, mi'náj de repente as̈am tu'c nu'mpay imi'n tsu'm. 3Iguinʉmgawa'n ni'c itp paz mit cajatáj neti, cʉs̈wa'n itunas̈cáj de repente mit tu'c pʉ̱tna̱s̈. Iguijatcáj as̈am tu'c to's̈ay de repentejyu iguipʉcta̱cp itinchay pa ita'cwa'n, mit ca-oyáj ipo'jca. 4Po hermanujat, mijchat migatsʉ̱ngap as̈am jayajwat cacupʉjcapay. Ayé s̈ʉjw is̈camingajáj de repente as̈am tu'c nu'mpay imi'n tsu'm. 5Ni'c nu'pʉjʉn mijchat miyo'ygap Dios iluzni'c mit mitsʉ̱ngáj oy en ayé s̈ʉjw imi'nwa'n Jesús, ni'c ingawatcap mal as̈am jayajwat cacupʉjcapay, ni'c je'jat as̈am jeme yo'ygapay tsu'm chitimicni'c. 6Jemni'c nagama̱gawit as̈am japu̱jtat, po natsʉ̱́nga prepara̱tic mit siempre nagawatcadá̱jca neti. 7Ni'c jeme ma̱gapay, ma̱gap tsu'm. Mit jeme mu̱jcʉjʉpay, mu̱jcʉjʉp tsu'm. 8Po ʉjtsat nayo'ygapay s̈ʉ̱m, siempre natsʉ̱́nga prepara̱tic. Nacupʉ́jca mit naniwángʉjʉ ni'c yename natsʉ̱ngáj oy as̈am tu'c soldaj tsʉ̱napay bien arma̱tic. Mit na-atsʉ̱ngap nas̈salva̱tcáj Dios ni'c yename natsʉ̱ngámpey oy as̈am tu'c soldaj jeme icompay ipus̈ancumo'n. 9Ni'c Dios nas̈caya̱s̈cawu pa nas̈condena̱tcáj. Je' iwamp nanisalva̱tcʉjʉwa'n, mit i-acmin el Señor Jesucristu pa nas̈salva̱tcáj. 10Mit je' o'c pa ʉjtsat, mit te natsʉ̱ngap o te na-o'jcap, najawigap ni'c je' o'c pa natsʉ̱ngawa'n tuwitic mit je' pa siempre. 11Jemni'c ni-animá̱tcʉjʉ minu'pʉjʉjnat mit nimájyigʉjʉ pa incupʉjcawa'n más, ni'c yename is̈watí̱jca.
Pablo itsawigʉs̈p cupʉcpajyat
12Hermanujat, tʉnʉmgajap pi respeta̱tca ayé jayajwat jeme yos̈watcapay mit mijchat. Je'jat is̈cuida̱tcap mit is̈tsawigap mijchat inmutʉgʉygaway el Señor. 13Respetá̱tca may mit wanga ayé jayajwat ni'c oy lo que iwatcapay. Tsʉ̱́nga en paz minu'pʉjʉjnat.
14Hermanujat, tʉnʉmgajapey pi tsawiga jeme candʉ'jnatway pa iyos̈watcawa'n, pi anima̱tca jeme yo'ygapay desanima̱tic, pi majyiga jeme cacupʉjcapay oy, pi aguepca calma mit nu'pʉjʉn jayajwat.
15Nicuidá̱tcʉjʉ pigawatcaja mal jeme is̈watcajapay mal. Po siguiá̱tca is̈watcawa'n oy minu'pʉjʉjnat, mit watí̱jcaja oy nu'pʉjʉn jayajwat.
16Ma ji'c siempre injo̱jtat. 17Ora̱tí̱jca siempre. 18Nʉmí̱jcaja Dios ni'ctiyu̱s̈ pa nu'pʉjʉn cosa, ni'c jemé ayé Dios iwampay nawátca ni'c nacupʉjcap Cristu Jesús.
19Camatújca lo que iwatámpay Espíritu Santu. 20Cammalninʉmga ayé jayajwat jeme i-ajque's̈cajapay Dios ipalabra. 21Probá̱tca te oy nu'pʉjʉn i-ajque's̈capay, mit pʉctsóuga jeme oyway. 22Niju'ptángʉjʉ de nu'pʉjʉn mal.
23Mit ayé Dios nas̈moygapay paz pi is̈limpia̱tcajac nu'pʉjʉn mal, pi is̈cuida̱tcajac nu'pʉjʉn, in-espíritu imvida mit incuerpu, pa nepʉn ma is̈caculpa̱tcac hasta ayé s̈ʉjw imi'nwa'n el Señor Jesucristu. 24Dios icumplia̱tp mit je' nas̈ya̱s̈cau. Mit je' nas̈actuwatcáj nu'pʉjʉn ayʉ̱́j cosa oyway.
Pablo isaluda̱tcʉs̈p cupʉcpajyat
25Hermanujat, orá̱tcaja Dios pa ʉjtsat.
26Saludá̱tca nu'pʉjʉn hermanujat mit tu'c ame'tamuc ni'c miniwangʉjʉp.
27Tʉmanda̱tp el Señor inʉ'jyni'c pi cotscaja ayʉ̱́j noc pa ma marauga nu'pʉjʉn cupʉcpajyat.
28Pi is̈moygac favor el Señor Jesucristu pa mijchat minu'pʉjʉjnat. Amén.
Currently Selected:
1 Tesalonicenses 5: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
