1 Tesalonicenses 4
4
Dios iwamp nayo'yga limpiu
1Jinap hermanujat, como tʉs̈ajyu'tcau el Señor Jesús, tʉyo'tcajap mit tʉtsawigap pi yo'yga as̈am tʉ-ajque's̈cajaj pa is̈watcawa'n lo que Dios iwampay. Mit we'n is̈wátca po cuji'cs̈iga más pa inyo'ygawa'n más oy.
2Ni'c injawigap nat tʉmandá̱tcaj mijchat as̈am tʉs̈manda̱tcawey el Señor Jesús. 3Mit ayʉ̱́j ayé lo que Dios iwampay, iwamp pi yo'yga limpiu, mit camchajyo'yga. 4Ni'c cada jayau ma pensa̱t iguirespeta̱twa'n ito's̈ay, caje' pa iguichajyo'jyawa'n. 5Pigawánga ma̱jlat iyo'tpay injo̱jtat as̈am iguiwátca ayé jayajwat cacupʉjcapay ni'c je'jat iga-is̈capcap Dios. 6Nepʉn magawajta mal ihermanu ne magawe̱t en ayʉ̱́j asuntu tʉnʉmgajaway. Tʉ-ajque's̈cajau ni'c el Señor icastiga̱táj nu'pʉjʉn iwatcapay ayé ma̱jlat. 7Ni'c Dios nas̈ya̱s̈cau pa nayo'ygawa'n limpiu, caje' pa nas̈watcawa'n mal. 8Jeme imalninʉmpay ayʉ̱́j tʉnajque's̈pay, ʉjtsat tʉs̈camalninʉmgap, solo imalninʉmp Dios jeme nas̈moygapay Espíritu Santu.
9Mit ca-itp ti tʉnʉmgʉs̈awa'n más pa inyiwangʉjʉwa'n, ni'c Dios is̈actujawigaway pi niwangʉjʉ minu'pʉjʉjnat. 10Mit we'n is̈wátca ni'c inwangap nu'pʉjʉn hermanujat tsʉ̱ngapay nu'pʉjʉn laj Macedoniajway na̱s̈. Hermanujat, tʉtsawigap pi niwangʉjʉ más. 11Che'nga pa intsʉ̱ngawa'n tranquilu. Cada jayau ma wat iyos̈, mit yos̈wátca as̈am tʉmandá̱tcaj. 12Mit we'n miyo'ygáj yacs̈ic mam is̈-e'pcáj jayajwat cacupʉjcapay, mit we'n is̈catogoygáj neti.
Nat imi'nwa'n Jesús
13Hermanujat, tʉnwamp pi jawiga nat ijatcawa'n ayé jeme o'guijcatway, magatu'nga injo̱jtat as̈am japu̱t jayajwat jeme iga-atsʉ̱ngapay vida cacʉs̈ámpay. 14Mit como nacupʉjcap ni'c Jesús o'c mit jutucta̱c, wename-ey nacupʉjcap ni'c Dios i-acjutucta̱jcʉs̈áj ayé cupʉcpajyat jeme o'jcaway, as̈am igui-acjutucta̱jc Jesús.
15Tʉnʉmgajap lo que inʉmway el Señor, ni'c ʉjtsat jeme natangámpay nijutuc imi'nwa'n el Señor Jesús, naganʉs̈cáj jʉpm de ayé cupʉcpajyat jeme o'guijcatway. 16Ni'c nije'yu el Señor Jesús managáj tsajpni'c mit cotsáj as̈am tu'c manda̱tpay, mit cotsáj mʉgʉc tu'c mʉjway ángel, mit Dios i-acya's̈áj trompeta. Mit o'guijcatway jeme icupʉjcaway Cristu jutucta̱jcʉ'jcáj. 17Cʉs̈wa'n ʉjtsat natangámpay nijutuc, Dios nas̈munʉs̈cáj tuwitic mit je'jat pa wintucjugum pa nas̈munipa̱tcʉjʉwa'n el Señor Jesús es̈pu̱t tsajp. Mit natsʉ̱ngáj pa siempre mit el Señor Jesús. 18Mit jemni'c tʉnʉ́mgajaj ayʉ̱́j cosajat, pa pi ni-animá̱tcʉjʉ más.
Currently Selected:
1 Tesalonicenses 4: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
