Соломона хамгин сән дун 8
8
[Күүкн:]
1– Ай, чи мини ах болад,
Мини экин көк көксн болхлаг!
Чамла һаза харһад,
Чамаг би үмсх биләв.
Намаг күн гемшәшго билә.
2Би чамаг дахулад,
Бийим өсксн экиннь герт орулх биләв.
Чамаг би амтта чаһрар тоох биләв,
Чамаг би гранатын шүүсәр тоох биләв.
3Терүнә зүн һарнь –
мини толһа дор бәәтхә.
Терүнә барун һарнь –
минь ода намаг тевртхә!
4Ерусалимин күүкд, тадниг
Йир сурҗанав:
Дуриг бичә серүлтн,
Дурн эврән эс сертл,
Дуудад бичә бәәтн!
Зурһадгч дун
[Ерусалимин күүкд:]
5– Көдә һазрас аашхнь кемб?
Иньгән һараснь бәрҗ йовна.
[Күүкн:]
– Чамаг би альмна модн дор серүлв,
Чамаг экчнь тенд һарһла,
Тенд чамаг тер һарһла.
6Намаг зүркндән тамһ мет бәр,
Намаг һартан тамһта билцг мет бәр.
Дурн үкл мет бат.
Дурнд авлгдхла үкллә әдл күчр;
Терүнә сумн – һал мет,
Дурн шатҗах һал мет.
7Дуриг буслҗах усн чигн унтрашго,
Дуриг урсхул чигн авшго.
Дурна төлә бәәсн зөөрән өгхәр седсиг
Делкә терүг һәәлх билә.
[Күүкнә ахнр:]
8– Мана дү басл бичкн:
Терүнд көкн чигн уга.
Тегәд худнр болхар седхлә
Бидн тиигәд яахмб?
9Кемр тер бат эрс болсн болхла,
Терүг цаһан мөңгәр кеерүлх биләвидн.
Кемр тер үүдн болсн болхла,
Терүг хошун модар ширх биләвидн.
[Күүкн:]
10– Би бат эрсв,
Мини хойр көкн башнь мет.
Тегәд би терүнд
Насн күцсн болҗ медгднәв!
[Күүкн:]
11– Баал-Гамон гидг һазрт
Соломона уста үзмин тәрән бәәлә.
Терүг тәрәчнрт нәәмәдлҗ өгдмн,
Тегәд күн болһн миңһәд мөңг
Өгх йоста болдмн.
12Уста үзмин тәрән нанд бәәнә.
Миңһнь – Танд, Соломон,
хошаһад зунь – тәрәчнрт!
[Көвүн:]
13– Тәрәнд бәәдг күүкн,
Чини ду мини үүрмүд соңсҗана,
Чамаг соңсх зөв нанд бас өгич!
[Күүкн:]
14– Баахн буһ-марл кевтә,
Бичкн гөрәснә хурһн кевтә
Каңкнсн үнртә уулмуд дотраһар,
Дурта иньгм, гүүһәд йов!
Currently Selected:
Соломона хамгин сән дун 8: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
