Йона 1
1
Йона Деед Эзнәс зулҗана
1Деед Эзн Амиттаян көвүн Йонад келнә:
2– Хаалһд һарч йов! Ниневе гидг ик балһснур од. Тенд бәәсн әмтиг илдкәд, теднә хар саната йовдлын тускар Намаг меднә гиҗ цугтаднь күргәд зәңгл.
3Зуг Йона Деед Эзнәс һарч зулхар шиидәд, Таршиш балһснур йовна. Яфа гидг балһснд тер күрәд, керм олҗ авад, мөңгинь өгәд, теңсчнрлә хамдан сууһад, Деед Эзнәс күрх балһснур йовна.
4Болв Деед Эзн теңгст ик сальк көөһәд, догшн һалв сальк көдлгв. Керм хамхрхдан күрв. 5Теңгсчнр әәцхәв. Күн болһн эврәннь бурхндан мөргәд, әмән аврхиг сурҗ зальврцхав. Кермиг гииглүрхәр, күнд ацаһинь теңгст хайна. Йона болхла, керм дотр орад, тенд кевтәд унтҗ одна.
6Кермин ахлач терүн тал өөрдәд келнә: – Юңгад унтад кевтнәч? Бос, эврәннь Бурхан дууд! Тер мана тускар санхмн болвза, тиигхлә бидн үкхн угавидн.
7Теңгсчнр нег-негндән келцхәв: – Кенәс көлтә мадн эн аюлла харһҗанавидн? Энүг илдкҗ медхин төлә, җирв хайх кергтә! Җирв хайцхав – болв эн җирв Йонад тусна.
8– Чамас көлтә мадн эн аюлла харһҗахла, маднд келҗ өг, чи кембч? – гиҗ тедн терүнәс сурцхав. – Ю кедвч? Альдас йовҗ йовнач? Төрскн һазрчн альдв? Ямаран келн-улсин күмбч?
9– Би еврейв, – гиҗ тер келв. – Би теңгс болн хүүрә һазр тогтасн Теңгрин Бурхиг, Деед Эзиг күндлнәв.
10Деед Эзнәс зулҗ йовхан келҗ өгхлә, теңгсчнриг ик әәмшг авлв. – Ю һарһснчн энви! – гиҗ тедн келцхәв.
11Һалв салькн улм чаңһрад бәәсн учрар, тедн Йонас сурцхав: – Теңгс тогтнҗ уурулхин төлә, чамла ю кехмб?
12– Эргндк теңгс тогтнтха гиһәд, намаг өргәд, теңгст хайчктн, – гиҗ тер хәрү өгв. Нанас көлтә тиим ик һалв салькн тадниг дәврсиг би меднәлм.
13Теңгсчнр усна көвә тал эклҗ хәәвдәд темцв, зуг арһ уга болад бәәв: һалв салькн улм догшрад ирв.
14Тиигхлә тедн Деед Эзиг дуудна: – Деед Эзн! – гиҗ тедн келнә. – Эн күүнә үкләс көлтә мадниг бичә засгла харһул! Буру уга күүнә цус һарһснд бичә шоод! Та – Деед Эзн: Тана седвәр тиим билә.
15Тедн Йонаг теңгст хайна – тиигхлә теңгс деер дольгаллһн тогтнҗ одна. 16Теңгсчнр Деед Эзнәс икәр әәцхәв. Деед Эзнд тедн бәрц бәрәд, андһаран өгнә.
Currently Selected:
Йона 1: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
