Әмтнә то авлһн 8
8
Өргә герин герлин гегәнә тускар
1Деед Эзн Мошед келв:
2– Зулын цөгцсиг Ахарон орм ормднь тәвтхә гиҗ за. Долан цөгц герлин гегәнә өмн герл һарһдгар тәвтхә.
3Ахарон тиигҗ кев. Деед Эзн Мошед заасар цөгцсиг герлин гегән деер тәвв. 4Герлин гегән алтнас цутхгдсмн, һоласн цецгүд күртл цутхгдсмн. Моше эн герлин гегәг Деед Эзнә үзүлсәр цутхад кев.
Левитмүдиг нерәдлһн
5Деед Эзн Мошед келнә:
6– Левитмүдиг Израилин улсас салһад теднд цеврллһнә авъяс ке. 7Цеврлхин төлә чи иим юм күцәх зөвтәч: теднд цеврллһнә усар цацл цац, тедн цогц-махмудан кевтнь хустха, хувцан уһатха – тегәд тедн цевр болцхах. 8Тедн бүрүг болн буудян һуйрар элдәд олив тосар элдсн өдмгин бәрц автха. Килнцәс цеврллһнә бәрцин төлә бас хойрдгч бүрү мал автха. 9Левитмүдиг Харһлтын Шатрин өмн зогсаһад Израилин әмтнә хамцаг цугтаһинь цуглултн. 10Левитмүдиг Деед Эзнә өмн зогсаһад, Израилин әмтн тедн деер һаран тәвтхә. 11Тегәд Ахарон левитмүдиг Деед Эзнд Израилин әмтнә белг гиҗ орулҗ өгтхә, эннь Деед Эзнд өрггдҗәнә. Энүнә дарунь левитмүд Деед Эзнд көдлмш кеҗ чадҗана.
12Левитмүд һаран эр бүрүсин толһа деер тәвтхә, тер бүрүсиг бәрцд орултха. Нег бүрүг килнцәс цеврллһнә бәрцд орултха, хойрдгч бүрүг Деед Эзнд шаталһна бәрцд орултха. Эннь левитмүдин гемән хәрүллһнә бәрц болҗана.
13Левитмүдиг Ахарона болн терүнә көвүдин һардврт орул. Тедниг Деед Эзнд нерәдсәр белг гиҗ өг. 14Тиигҗ левитмүдиг Израилин әмтнәс салһ: левитмүд Мини болхмн.
15Чамаг левитмүдиг цеврләд Деед Эзнд белг гиҗ өргснә хөөн, тедн ирәд Харһлтын Шатрт көдлмш кеҗ чадҗана. 16Тедн Нанд Израилин әмтн дундас өггдв. Би тедниг экин гесндк түрүн үрнә ормд авув, Израилин әмтнә цуг түрүн үрдин ормд. 17Израилин әмтнә түрүн үрд цугтан – әмтнә түрүн үрнь, малын түрүн төлнь – Мини: Египетин түрүңксинь цугтаһинь алхларн, Би тедниг салһад Бийиннь төлә әрүслләв. 18Ода Би Бийдән левитмүдиг Израилин әмтнә түрүңк үрдин ормд авув. 19Израилин талдан цуг әмтнәс левитмүдиг салһад Би тедниг Ахаронд болн терүнә көвүдт орулҗ өгүв. Левитмүд Израилин цуг әмтнә ормд Харһлтын Шатрт көдлмш кех зөвтә. Тедн Израилин әмтнә төлә гемән хәрүллһнә бәрц болх. Израилин әмтн зовлңла харһдгоһар әрүн орм тал өөрдшго.
20Моше, Ахарон болн Израилин әмтнә хамцан кевтән левитмүдлә Деед Эзн Мошед кетхә гисиг кевтнь күцәв. 21Левитмүд бийән цеврләд эврәннь хувцдан уһацхав. Ахарон тедниг Деед Эзнд нерәдәд өргсн белг гиҗ орулҗ өгв. Тегәд теднә төлә гемән хәрүллһнә авъяс күцәһәд бузр юмнас цеврлв. 22Терүнә хөөн левитмүд Харһлтын Шатрт Ахарона болн терүнә көвүдин һардврар зүсн-зүүл көдлмш кедг болв. Деед Эзнә левитмүдин тускар даалһсинь Моше цугинь күцәв.
23Деед Эзн Мошед келв:
24– Левитмүдин диг-даран эн: 25 настаһасн авн левит күн Харһлтын Шатрт көдлмш кех зөвтә. 25Тәвн настадан эврәннь көдлмшән төгсәх зөвтә, дәкҗ көдлмш кешго. 26Харһлтын Шатрт көдлҗәх ахнр-дүүнртән дөң болҗ чадҗана, болв эврән көдлмш давулшго юмн. Көдлмшин туск тиим заавр чи левитмүдт өгх зөвтәч.
Currently Selected:
Әмтнә то авлһн 8: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
