Әмтнә то авлһн 9
9
Песахин нәр
1Израилин улс Египетәс түрүн сар урһхла хойрдгч җилд һарсна дарунь Синайин көдәд Деед Эзн Мошед келв:
2– Израилин әмтн Песахин нәәриг цаглань кетхә. 3Эн сарин 14-ч өдрт, цаглань, бүрүллә кетн. Терүг батлсн зокалмудар болн закадар күцәтн.
4Моше Израилин әмтнд Песахиг күцәтхә гив. 5Тедн Песахиг Синайин һазрт кев. Тернь түрүн сарин 14-ч өдрт бүрүл болсн цагт күцәгдв. Израилин улс Деед Эзн Мошед заасар кевтнь кев.
6Тедн дунд үксн күүнә цогц көндәсн әмтн бас бәәҗ. Тер әмтн тер өдр Песах нәр кеҗ чадсн уга. Тегәд тедн тер өдр Моше Ахарон хойр тал ирәд 7келв:
– Бидн үксн күүнә цогц көндәсндән цевр бишвидн. Израилин әмтнлә хамдан бидн Деед Эзнд бәрцән цаглань бәрҗ чадшго болҗану?
8Моше хәрү өгнә:
– Тадн энд зогсҗатн, би одад Деед Эзнәс ю кехинь соңсад ирсүв.
9Деед Эзн Мошед келнә:
10– Израилин әмтнд кел: кемр кен-негнь эс гиҗ тадна хөөт үйнр үксн күүнә цогц көндәһәд бузрдхла, эс гиҗ гертәсн холд хаалһдан йовхла, тер күн бас Деед Эзнә Песахиг күцәх йоста. 11Хойрдгч сарин 14-ч өдрлә бүрүл болсн цагт кетхә. Тер күн Песахин хурһна махиг эс искәсн һуйрта болн һашун ноһата хамднь идтхә. 12Терүнә махинь өрүн күртл бичә үлдәг, ясинь бичә хамхлг. Песахин туск зокалмудыг күццднь тер кех зөвтә. 13Кемр кен-негнь цевр болад хаалһд эс йовсн бийнь Песахиг келго бәәсн болхла, тер күн цагтан Деед Эзнд бәрц бәрлго бәәсндән эврәннь келн-улс дундас уга кегдх. Тер күн килнц һарһсндан засглгдх. 14Кемр тадн дунд бәәрләд бәәх нүүҗ ирсн күн Деед Эзнд Песах кехәр седҗәхлә, Песахин туск зокалмудыг болн закадыг тер кевтнь күцәх зөвтә. Тадна орн-нутгт һарсн әмтнә, эс гиҗ нүүҗ ирсн әмтнә зокал негн болх зөвтә.
Өргә гер деерк үүлн болн һал
15Өргә гериг босххла, терүг – Бооцана Шатриг – үүлн бүркв. Асхнас авн өрүн күртл өргә гер деер һал шатад бәәсн болв. 16Тер кемәс авн мел оньдинд тиигәд бәәв: өдрәр өргә гериг үүлн бүркәд, сөөднь һалын бәәдл һарсн болна. 17Үүлн Шатрас деегшән өөдлх саамд кезә чигн Израилин әмтн хаалһдан һардг болв. Үүлн зогссн һазрт тедн сүүрән кедг болв. 18Деед Эзнә зааврар Израилин әмтн хаалһдан йовна, Деед Эзнә зааврар зогсна. Үүлн өргә гер деер бәәтл тедн ормасн көндрхш. 19Кемр үүлн өргә гер деер удан бәәхлә, Израилин әмтн Деед Эзнә заавр күцәдг билә, бәәсн ормдан хаалһд һарлго үлднә. 20Кемр үүлн өргә гер деер цөөкн хонгт бәәхлә, тиигхлә Израилин әмтн Деед Эзнә заасар ормдан бәәнә. Дәкәд Деед Эзнә зааврар хаалһдан һардмн. 21Кемр үүлн нег ормдан асхнас өрүн күртл бәәхлә, тиигхлә өрүнднь өөдлхләнь тедн һарад йовна. Кемр үүлн ормдан нег өдр болн нег сө зогсхла, дәкәд өөдлхләнь, тедн тер дарунь хаалһдан һарад йовна. 22Үүлн өргә гер деер кедү цагтан эс бәәв чигн – хойр өдр, эс гиҗ сардан, эс гиҗ терүнәс удан – Израилин әмтн тер цагин туршарт нег ормдан бәәһәд хаалһд һардго билә. Үүлн өөдлхлә тедн һарад йовдмн. 23Деед Эзнә зааврар тедн зогсад, Деед Эзнә зааврар хаалһдан һарад йовдмн. Тиигҗ тедн Деед Эзнә Мошеһәр дамҗад өгсн заавриг күцәдмн.
Currently Selected:
Әмтнә то авлһн 9: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
