Әмтнә то авлһн 15
15
Немр бәрцин тускар
1Деед Эзн Мошед келнә:
2– Израилин улст кел: Тадн Мини өгчәх бәәрләд бәәх һазрт ирхләрн, 3Деед Эзнд бәрц бәрхәр бод эс гиҗ үүрмг мал авч ирхләрн, шаталһнд орулгдну эс гиҗ андһар өгснә бәрц болну, эс гиҗ дурарн авч ирсн бәрц болну, эс гиҗ байрин бәрц болну – Деед Эзнд таасгдх каңкнсн үнр өргхләрн, – 4тиигхлә Деед Эзнд бәрҗәх бәрцд өдмгин бәрц орултха. Буудян һуйрин ефән нег арвнань болх. Тер һуйрин гина нег дөрвнәнь олив тосар элдтхә. 5Шаталһнд орулҗах хурһн болһнла хамдан болн бәрцлә хамдан асхх чаһрин гина нег дөрвнәһинь авч иртн.
6Кемр хуцар бәрц бәрҗәхлә, өдмгин бәрц ефән арвн әңгин хойрнь буудян һуйрар элдсн, олив тосна гина һурвдгч әңгднь хольгдх зөвтә. 7Чаһрин бәрцд орулхин төлә гина һурвдгч әңгнь болх. Эннь Деед Эзнд таасгдх каңкнсн үнр.
8Кемр Деед Эзнд бух малар бәрц бәрҗәхлә – шаталһнд орх эс гиҗ андһарар күцәҗәх бәрц болну эс гиҗ эвцлһнә бәрц болну – 9тегәд тер бух деер өдмгин бәрц немгдх йоста: буудян һуйрин ефән арвна һурвдгч әңгнь олив тосна гина өрәлднь хольгдх зөвтә. 10Чаһрин гина өрәлинь асхх кергтә. Эннь Деед Эзнд һалын бәрц, каңкнсн үнр Терүнд тааста. 11Кемр бухар, хуцар, хурһар эс гиҗ ишкәр бәрц бәрҗәхлә кезә чигн тиигҗ тадн кех йостат. 12Кедү малар бәрц бәрҗәнәт, тооһарн тиим өдмгин бәрц болн чаһрин бәрц болх йоста. 13Деед Эзнд һалын бәрц бәрхләрн, Терүнд таасгдх каңкнсн үнр һарһхларн бәәрн күн болһн энүг күцәх зөвтә.
14Кемр нүүҗ ирсн күн эс гиҗ тадн дунд бәәх, тадна хөөт үйнр дунд бәәх бас кен чигн күн Деед Эзнд һалын бәрц бәрхәр, каңкнсн үнр Терүнд таасгддгар тархахар седхләрн, тер кергиг таднла әдләр күцәх зөвтә. 15Хамцанд таднд болн нүүҗ ирсн улст нег диг-даран бәәтхә. Эннь таднд мөңкинд үйәс үйд бәрх зокал. Нүүҗ ирсн күн Деед Эзнә өмн таднла әдләр бийән бәртхә. 16Нег диг-даран, нег закан тадна төлә болн тадн дунд бәәх нүүҗ ирсн улсин төлә.
Шин урһцин һуйрар болһсн өдмгин дееҗ авч ирлһн
17Деед Эзн Мошед келнә:
18– Израилин улст келҗ өг: «Мини күргҗ йовх һазрт ирхләрн тадн 19тер һазрт урһҗах тәрә-темс идхит. Деед Эзнд бәрц бәртн. 20Деед Эзнд шин урһцин һуйрар болһсн өдмгин дееҗ өргтн. Терүг тәрәнә бәәрнәс гиҗ нерәдтн. 21Үйәс үйд түрүн болһсн өдмгәрн Деед Эзнд бәрц бәрх зөвтәт».
Тоолвр угаһар һарһсн килнц
22Деед Эзн Мошед келсн зааврас эндүрәд негинь эс күцәсн болхла, 23таднд Мошеһәр дамҗад Терүнә зааврас ямаран чигинь эс күцәхлә, тиигхлә иигҗ кех кергтә (Деед Эзнә эн заавр өгсн өдрәс авн хөөннь, үйәс үйд күцәтн).
24Кемр хамцана хәләвр тату болад эндү һарсн болхла, тиигхлә хамцан кевтән бүрү малар шаталһна бәрц бәртхә. Терүнә каңкнсн үнр Деед Эзнд таасгдх. Бас бәрцд өдмг болн чаһр орултха, килнцәс цеврллһнә бәрцд нег тек орултха. 25Израилин әмтнә цуг хамцана төлә гемән хәрүллһнә авъяс гелң күцәтхәг. Тегәд теднә гемнь тәвгдх. Юңгад гихлә тернь эндү болҗасмн. Терүнә төлә тедн бәрц авч ирцхәв – Деед Эзнд һалын бәрц, бас килнцәс цеврллһнә бәрцән Терүнд бәрцхәв. 26Израилин улсин цуг хамцана болн тедн дунд бәәх нүүҗ ирсн улсин гемнь тәвгдх. Яһад гихлә әмтн цугтан эндүһәр му йовдл һарһцхав.
27Кемр нег күн эндүһәр гем һарһсн болхла, тер күн килнцәс цеврллһнә бәрцд нег җил күрсн яма авч ирх зөвтә. 28Тер эндүһәр му йовдл һарһсн күүнә төлә гемән хәрүллһнә авъясиг гелң Деед Эзнә өмн күцәтхә. Тер күүнә төлә гемән хәрүллһнә авъяс күцәх, тегәд терүнә гемнь тәвгдх. 29Эндүһәр гем һарһсн кен чигн күүнд нег диг-даран бәәх зөвтә: Израилин улсин бәәрн күн болну, тедн дунд бәәх нүүҗ ирсн күн болну нег диг-дарата болх.
Зөрц һарһсн килнцин тускар
30Болв кемр кен чигн күн – бәәрн күн эс гиҗ нүүҗ ирсн күн болв чигн – зөрц килнц һарһсн болхла, тернь Деед Эзиг һутаҗах темдг. Тиим күн эврәннь келн-улс дундас уга кегдх. 31Тиим күн Деед Эзнә үгиг басад, Терүнә заквр эвдв. Тер күн эврәннь келн-улс дундас уга кегдх, килнцәсн көлтә засглгдх.
Бемб өдр амрлһна диг-дара эвдсн күн алгдв
32Израилин улс көдә һазрт бәәхләрн бемб өдр нег күн түлә цуглулҗ йовсинь үзцхәҗ. 33Үзсн әмтн тер күүг дахулад Моше, Ахарон болн хамцан тал авч одна. 34Түлә цуглулҗ йовсн күүг бәрәнд орулна. Яһад гихлә терүг яһҗ бәрх диг-даран уга бәәҗ.
35Деед Эзн Мошед келв:
– Эн күн алгдх йоста. Хамцана әмтн цугтан терүг чолуһар шивтхә.
36Тер күүг хамцана әмтн цугтан бәәрнәс һарһад чолуһар шивәд алцхав. Тиигтхә гиҗ Деед Эзн Мошед закв.
Хувцна көвән цацгин тускар
37Деед Эзн Мошед келнә:
38– Израилин улст кел: үйәс үйд тедн эврәннь хувцна көвәһәр цацг уйтха. Тер цацгудт көк утц орулх зөвтәт. 39Тер цацг хәләһәд тадн Деед Эзнә заавриг санад күцәх зөвтәт. Тегәд тадна зүрк болн нүд авлх дүңгә цалдң йовдл һарһшгот. 40Тадн Мини заавриг цугтаһинь тодлад күцәхит. Тегәд эврәннь Бурхндан әрүн болхит. 41Би Деед Эзн, тадна Бурхн болхар тадниг Египетәс дахулад һарһлав. Би Деед Эзн, тадна Бурхн.
Currently Selected:
Әмтнә то авлһн 15: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
