Әмтнә то авлһн 16
16
Корахин, Датана болн Авирамин буцлһн
1Корах Ицхарин көвүн, Кахатын ач, Левин җич, Датан болн Авирам Элиавин хойр көвүн, Пелетин көвүн Он – дәкәд эдн Рубена хөөт үйнр – 2эдн цугтан Мошен өмнәс буцлт кенә. Тедниг Израилин 250 әмтн дөңнв. Тедн цугтан хамцана һардачнр, хургудын толһачнр болн күндтә улс бәәҗ. 3Тедн Мошег болн Ахарониг бурушаһад өмннь зогсад иигҗ келцхәв:
– Таднд болҗана! Хамцанд цугтан әрүн, Деед Эзн тедн дунд бәәнә. Яһад тадн бийән Деед Эзнә хамцанас деер тоолҗахмт?
4Теднә келсиг соңсчкад Моше түргүр унв. 5Корахт болн хаҗһр кергт орлцҗах улст тер келв:
– Өрүндән Деед Эзн кен Терүнәһинь, кен әрүнинь болн кениг Бий талан өөрдүлхинь үзүлх! Тер Эврән шүүҗ авх күүнд Бий талан өөрдх зөв өгх. 6Тадн күҗин сав авад, 7һал шатаһад, каңкнсн үнр һарһад Деед Эзнә өмн зогсцхатн. Деед Эзнә шүүҗ авсн күн әрүн болх. Левин әмтн, болҗана! Дегд давҗанат.
8– Левин улс, соңстн! – гиҗ Моше Корахт келнә. – 9Израилин Бурхн таднд шишлң орм Израилин әмтн хамцанд өгв, Терүн тал өөрдх зөв өгв, Деед Эзнә өргә герт көдлмш кех болн хамцанд заргдх зөв өгв. Эннь таднд баһ болҗану? 10Деед Эзн чамд болн чини ахнр-дүүнрт, левитмүдт, Бий талан өөрдх зөв өгв. Тадн гелңгүд болхар седәд бәәнәт! 11Чи болн чини нөкднр Деед Эзнә өмнәс буцлт кеввт! Ахаронд гем уга. Яһад тадн терүнә өмнәс буцҗанат?
12Моше Датаниг болн Авирамиг – Элиавин көвүдиг – авч иртхә гиҗ кү йовулв. Болв тедн келнә:
– Бидн одшговидн! 13Мадниг көдә һазрт үктхә гиҗ үсәр болн балар байн һазрас дахулҗ һарснчн баһдҗану? Чи мадна эзн болхар седҗәнчи? 14Үсәр болн балар байн шин һазрт чи мадниг күргсн угач, тәрәнә болн уста үзмин һазр маднд өгсн угач. Әмтн сохр гиҗәнчи? Бидн чам тал одшговидн!
15Моше дегд уурлад Деед Эзнд келнә:
– Теднәс бичә бәрц автн! Би теднәс нам элҗгн чигн авсн угав, нег чигн күүнд му юм кесн угав!
16Моше Корахт келнә:
– Маңһдур чи болн чини нөкднр Деед Эзнә өмн зогстн: чи, тедн болн Ахарон. 17Күн болһн эврәннь савд күҗ тәвәд Деед Эзнә өмн авч иртхә: 250 күҗин сав авч иртхә. Чи бас эврәннь күҗин саван авч ир, Ахарон – эврәһән.
18Тедн цугтан эврәннь савдан һал орулад, күҗ тәвәд Харһлтын Шатрин үүднд Мошелә болн Ахаронла хамдан зогсцхав. 19Моше Ахарон хойрин өмнәс Корах хамцана әмтиг цугтаһинь хураһад Харһлтын Шатрин үүднд зогсав. Тегәд теднә нүүрт Деед Эзнә туурмҗ буув.
20Деед Эзн Мошед болн Ахаронд келв:
– 21Эн хамцанас хооран һартн. Би эдниг нег агчмд уга кенәв!
22Болв Моше Ахарон хойр түргүр унад келнә:
– О, Бурхн минь, цуг әмтә-киитәд әм өгчәх, Бурхн! Килнциг негхн күн һарһв, Та цуг хамцанд ууран һарһҗанта?
23Деед Эзн Мошед келнә:
24– Корахин, Датана болн Авирамин бәәх бәәрнәс хамцана әмтн цугтан холд һартхаг гиҗ заквр өг.
25Моше Датана болн Авирамин бәәрн тал йовв. Терүнә ардас Израилин медәтнр дахцхав. 26Моше хамцана әмтнд келв:
– Эн килнцтә му әмтнә бәәрнәс хооран һартн, теднә юмс бичә көндәтн. Эс гиҗ теднә һарһсн килнцәс көлтә тадн үкхит.
27Корахин, Датана болн Авирамин бәәрнәс әмтн хооран һарцхав. Датан Авирам хойр гергдтәһән, көвүдтәһән болн нилх үрдтәһән эврәннь шатрин үүднд зогсад үлдцхәв.
28Моше келв:
– Деед Эзн намаг илгәһәд цугинь кетхә гиҗ заксинь тадн ода медхит. Эннь мини дурар кегдҗәхшиг медхит. 29Кемр тедн цуг әмтн үкдг әдләр үкхлә, кемр теднд цугталань болдг хөвнь үзгдхлә, тиигхлә намаг тадн тал Деед Эзн илгәсн уга. 30Кемр Деед Эзн үзгдәд уга юм үзүлхлә, кемр теднә дор һазр шуурад цугтаһинь бәәсн зөөртәһинь зальгчкхла, әмдәр үклин һазрт тусхла, тегәд Деед Эзнд тедн дурго болсиг тадн медхит!
31Мошег келәд төгсәхлә, тер зогсҗасн әмтн дор һазр шуурва: 32ик нүкн һарад тедниг зөөртәһинь хамднь зальгчкв. Корахин әмтиг эдл-ахутаһинь кевтнь зальгчкв! 33Әмдәр тедн эврәннь эдл-ахутаһан үклин һазрт орв. Тедн деерк һазр бүтв, хурсн улс дунд тедн уга болв. 34Теднә хәәкрлһ соңссн әмтн һарад зулцхав. Һазр тедниг зальгчкх гиһәд әәцхәв.
35Дәкәд Деед Эзнәс һал бууһад 250 кү алв. Тедн күҗтә сав авч ирцхәҗ.
36Деед Эзн Мошед келнә:
37-38– Шатсн һазрт күҗин савиг һаласнь цеврләд цугтаһинь Ахарона көвүн Элеазар цуглулҗ автха гиҗ зааҗ кел. Ода тер күҗин савмуд килнцтә улсин әмәр әрүслгдв. Күҗин савиг хавтхалад тәклин орм хаадг бүркә кетхә. Тедниг Деед Эзнд авч ирдг бәәҗ, тегәд теднь әрүн болцхаҗ. Ода Израилин улст тедн темдг болтха.
39Һалд шатад үксн әмтнә улан мөңгн күҗин савиг Элеазар гелң цуглулҗ авна. Терүгәр тәклин ормин бүркә кенә. 40Мошеһәр дамҗад Деед Эзнә заасар Элеазар кев. Талдан әмтнә кен чигн күн, Ахарона хөөт үйнрәс талдан күн Деед Эзнә өмн күҗ шаташгог тер бүркә Израилин улст сана орулҗана. Эс гихлә Корахла болн терүнә нөкднрлә болсн йовдл теднлә учрх.
Моше Ахарон хойр олн-әмтиг харсна
41Маңһдуртнь хамцана әмтн цугтан Мошег болн Ахарониг гемшәһәд уурлцхана:
– Тадн Деед Эзнә әмтиг алвт!
42Мошен болн Ахарона өмнәс хамцан кевтән хурхла, тедн Харһлтын Шатр тал хәләхләрн үзцхәв: Шатриг үүлн бүркв, Деед Эзнә туурмҗ буув. 43Моше болн Ахарон Шатр тал одцхав. 44Деед Эзн Мошед келнә:
45– Тадн эн хамцанас хооран һартн. Би эдниг цугтаһинь нег агчмд уга кенәв!
Тер хойр түргүр унцхав. 46Моше Ахаронд келнә:
– Эврәннь күҗин саван авад тәклин ормас дотрнь шатчах һал, күҗ тәвәд хамцан тал адһад йов. Теднә төлә гемән хәрүллһнә авъяс күцә. Деед Эзнәс цухл ирҗәнә: үкл эклҗәнә!
47Мошен келсәр Ахарон кев: хамцан тал гүүв, үкл экләд ирв. Ахарон һал деер күҗ тәвәд гемән хәрүллһнә авъяс олн-әмтнә төлә кев. 48Үксн, әмд әмтнә хоорнд Ахарониг зогсхла, үкл уурв. 49Корахла хамдан үксн әмтиг эс тоолв чигн, ут тоодан 14 700 күн тиигхд үкв.
50Ахарон Моше тал Харһлтын Шатрин үүднд хәрү ирв. Әмтн үкдгән уурв.
Currently Selected:
Әмтнә то авлһн 16: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
