Әмтнә то авлһн 14

Олн-әмтнә шууган

1Хамцана әмтн цугтан чаңһар хәәкрцхәв. Дарук сөөни дуусн әмтн уульцхав. 2Израилин улс Мошелә болн Ахаронла керлдв. Тер хойрт хамцана әмтн келв:

– Бидн Египетд эс гиҗ эн көдә һазрт үксн болхла сән болх билә! 3Ю хәәҗ Деед Эзн мадниг тер һазр тал авч йовхмб? Тенд бидн үлдәс үкхин төләй? Мадна гергд болн үрд бәрәнд авгдх. Хәрү Египет тал йовсн деер болвза?

4Әмтн хоорндан күүндцхәв:

– Һардачан шүүҗ авад, хәрү Египет талан орхмн!

5Моше Ахарон хойр хамцана әмтнә өмн түргүр унцхав. 6Тер һазр хәләхәр одсн әмтнлә хамдан Навина көвүн Ешуа болн Ефунен көвүн Калев хойр хувцан шуулцхана. 7Тедн Израилин улсин хамцана әмтиг иткүлхәр келцхәв:

– Мана йовад хәләсн тер һазр йир сән, йир сән! 8Кемр бидн Деед Эзнд кергтә болхла, Тер мадниг тиигәрән күргх, тер үсәр болн балар байн һазриг маднд өгх. 9Зуг Деед Эзнә өмнәс бичә буцтн! Тер һазра әмтнәс бичә әәтн – бидн диилхвидн! Тедн эврәннь харслтан геецхәв, маднла болхла Деед Эзн. Бичә теднәс әәтн!

10Болв хамцана әмтн тедниг чолуһар цокхар седцхәв. Тиигхләнь Харһлтын Шатрин өөр Израилин улст Деед Эзнә туурмҗ буув.

11Мошед Деед Эзн келв:

– Кедү цагтан эн әмтн Нан тал дурго болҗ хәләхмб? Тедн дунд Би өвәрц йовдл һарһсн бийнь Нанд итклго бәәхмб? 12Би теднд маальг гем өгәд алнав. Чамас Би шин әмт һарһнав. Тедн улм олн болн чаңһ-чиирг болх.

13Болв Моше Деед Эзнд келв:

– Энүнә тускар Египетин улс соңсх. Теднә үлмәһәс күчәр Та, Эврәннь чидләрн эн улсиг дахулҗ һарһсн эс болҗану? 14Учрсн йовдлын тускар тедн тер һазрин әмтнд келҗ өгх. Таниг, Деед Эзн, эн әмтн дунд бәәһәд Бийәрн үзгдҗәхиг, Тана үүлн эн әмтн деер бәәхиг, Та эврән өдртнь үүлн дотр, сөөднь һал һарһад эднә өмн йовхиг тедн соңсҗ. 15Кемр Та эн әмтиг нег чигн кү үлдәлго алхла, Тана туск зәңг соңссн әмтн иигҗ келх: 16«Өгнәв гиһәд андһаран тәвсн һазрт эн улсиг Деед Эзн күргҗ чадлго көдә һазрт тедниг алв!» 17Деед Эзнә күчн тууртха! Та Эврән келләлт: 18«Деед Эзн тесвртә болн хәәрлтә! Тер күүнә буруг болн килнциг даана, болв бурутаһинь бурута биш гиҗ Тер тоолхш. Эцкнрин һарһсн гемд үрдинь засглна, ачнринь, җичнринь засглна!» 19Египетәс һарсн өдрәс эндр күртл яһҗ Та геминь тәвҗ йовснла әдләр Эврәннь алдр хәәрлтәрн эн әмтнә килнцинь тәвҗ өгтн!

20Тиигхлә Деед Эзн келв:

– Би тедниг чини сурсар хәәрлҗәнәв. 21Болв Бийәрн болн цуг һазр дүүргҗәх Эврәннь туурмҗар андһар өгчәнәв: 22Мини туурмҗиг болн өвәрц йовдл үзсн әмтн Намаг соңслго бәәцхәв, арв дәкҗ Намаг сөрцхәв. Тиим йовдлыг Би Египетд болн көдә һазрт үзүлләв. 23Теднә өвкнрт Мини андһар өгсн һазриг кен чигн күн теднәс эн һазриг үзшго! Нанд дурго болҗах улс терүг үзшго. 24Болв Мини мухла Калев седкләрн тиим күн биш. Нанд тер иткв. Би терүг ачлад үзәд медсн һазртнь күргнәв. Терүнә хөөт үйнр эн һазриг эзлх! 25…Тер орн-нутгин тегш һазрт Амалекин улс болн Канана улс бәәцхәнә. Маңһдур хәрү эргәд Улан теңгсин хаалһар көдә һазрт одтн.

Буцлт кесн улст Деед Эзнә засгллһн

26Деед Эзн Мошед болн Ахаронд келнә:

27– Кедүдән эн керг уга әмтнә хамцан Нанд һундлан келәд бәәхмб? Израилин улс яһҗ һундлан келҗәхинь Би соңсҗ бәәнәлм! 28Теднд Нанас кел: «Бийәрн андһар тәвҗәнәв. Авхар седсән тадн Нанас авхит! 29Тадна күш эн көдәд үлдх. Нанд һундҗасн тадна тохма 20 наста болн терүнәс ах настань тоолгдснаннь күш цугтан тенд үлдх! 30Тадниг бәәлһх болад Мини андһар өгсн һазрт Ефунен көвүн Калевәс болн Навина көвүн Ешуас талдан күн оршго. 31Бәрәнд бичә ортха гиҗ әәҗәсн тадна үрдиг Би тадна һолсн һазрт авч однав. Ямаран һазр бәәсинь тедн үзх! 32Тадна күш болхла эн көдәд үлдх. 33Эн көдәд тадна үрд 40 җилдән мал хәрүлх. Тадна ухаһан сольснас көлтә сүүлин күн эс үктл үрдтн засглгдх. 34Дөчн өдр тадн һазриг шинҗлҗ хәләввт. Эн өдрмүдин тооһар, өдрин ормд нег җилдән килнц һарһсндан шоодврт орхит – 40 җилдән! Тегәд тадн Мини цухл медхит». 35Эннь Би, Деед Эзн, келҗәнәв! Мини өмнәс буцсн эн керг уга әмтнә хамцаг Би тиигҗ кехүв. Эн көдә һазрт теднә чилгчнь болх. Тедн энд үкх!

36Канана һазриг хәләтхә гиһәд Мошен йовулсн улс хәрү ирәд му зәңг тарав. Хамцана улс цугтан Мошег керлддг болв. 37Тер һазрин тускар хорта зәңг һарһсн улс үкв. Деед Эзн тедниг засглв. 38Тер һазриг хәләхәр одсн улсас Навина көвүн Ешуа болн Ефунен көвүн Калев әмд үлдцхәв.

Канана һазрт одх саам учрсн уга

39Моше Деед Эзнә келсиг Израилин улст соңсхв, тедн һундрхв. 40Маңһдуртнь тедн уул тал йовцхав.

– Деед Эзнә йовтн гисн тал бидн йовнавидн. Бидн килнц һарһвидн! – тиигҗ тедн келцхәв.

41Моше келв:

– Яһад тадн Деед Эзнә заасиг эс күцәнәт? Таднд күцәмҗ уга болх. 42Кемр Деед Эзн таднла эс йовхла, бичә йовтн. Хортн тадниг диилх. 43Тенд өмнтн – Амалекин улс болн Канана улс. Тадн үлдәс үкхит! Тадн Деед Эзнәс салвт, Деед Эзн таднла дәкҗ бәәшго.

44Болв тедн уул деер һархар зөрцхәв. Деед Эзнә Бооцана хәәрцг болн Моше теднә бәәрнднь үлдв. 45Уулын бәәрн улс Амалекин болн Канана әмтн тедниг тосад уулас бууцхав. Ирҗ йовх улсиг тедн тосад ка цокад, Хорм гидг балһсн күртл көөцхәв.

Currently Selected:

Әмтнә то авлһн 14: ХКО_ӘБ

Highlight

Copy