Әмтнә то авлһн 13
13
Арвн хойр гетәч Канана һазриг шинҗлҗәнә
1Дәкәд тедн Хацеротыг үлдәһәд Паран гидг көдәд ирәд зогсцхав. 2Деед Эзн Мошед келнә:
3– Израилин улст Мини өгчәх Канана һазриг хәләтхә гиһәд әмтиг йовул. Отг болһнас неҗәһәд һардачнриг илгә.
4Паран гидг көдә һазрас Моше Деед Эзнә заасар теднәс эн әмтиг түрүләд йовулв. Тедн цугтан Израилин әмтнә һардачнр билә. 5Теднә нерд эн:
Рубена отгас – Закурин көвүн Шамуа;
6Шимона отгас – Хорин көвүн Шафат;
7Йудан отгас – Ефунен көвүн Калев;
8Исахарин отгас – Йосипин көвүн Игал;
9Эпримин отгас – Навина Осия;
10Беняминә отгас – Рафун көвүн Палти;
11Завулуна отгас – Содин көвүн Гадиэл;
12Йосипин отгас (Манашен отгас) – Сусин көвүн Гадди;
13Дана отгас – Гемалин көвүн Амиэл;
14Ашерин отгас – Михаилин көвүн Сетур;
15Напталин отгас – Вафсин көвүн Нахби;
16Гәдин отгас – Махин көвүн Геуэл.
17Канана һазриг хәләтхә гиҗ йовулсн әмтнә нерд эн. (Навина көвүн Осияд болхла, Моше Ешуа гидг шин нер өгв.) 18Канана һазриг хәләтхә гиһәд йовулхларн Моше теднд келв:
– Негев дәврәд уулта һазр тал йовтн! 19Тер һазриг шинҗләд хәләһәд ямаранинь медҗ автн. Ямаран әмтн тенд бәәдгинь: чаңһ-чиирг угаһинь, тооһарн баһий, эс гиҗ олн бәәнү? 20Тер әмтнә һазр ямаран: сән, муй? Тер әмтн альд бәәцхәнә: селәдәр эс гиҗ батлгдсн балһсдарий? 21Тендк һазр ямаран: сән урһцтай эс гиҗ өслт угай? Модд тенд урһдг угаһинь медҗ автн. Тер һазрин темснәс эрк биш авч иртн.
Тер цагт уста үзмин түрүн урһц цуглулҗ авчасмн.
22Йовулгдсн улс Цин көдә һазрас Лево-Хаматын өөр бәәх Рехов күртл һазриг шинҗләд хәләцхәнә. 23Негев һазриг давад тедн Хевронд күрнә. Тенд Анакин хөөт үйнр#13:23 Анакин хөөт үйнр, анакмуд – Израилин әмтн ирхәс урд, Хеврон әәмгт Кананд бәәрлҗ бәәсн улсин негнь. Тедн ик оврта әмтнә хөөт үйнр анакмуд дегд чидлтә болн өндр нурһта бәәҗ. Ахиман, Шешай болн Талмай бәәцхәҗ. (Хеврон Египетин Цоан гидг балһснас долан җил эрт тогтагдҗ.) 24Тедн Эшкол гидг тиньгр һазрт ирәд үстә үзмин нег темстә ац керчҗ авна. Тер темсиг модн деер өргҗ йовхин төлә хойр күн кергтә болв! Тендәс тедн гранат модна темс болн инҗр бас авцхав. 25(Тер орм Эшкол гидг тиньгр һазрин нер зүүв. Тенд Израилин әмтн уста үзмин темс авсна тодлврта болв.) 26Одсн һазриг кевтнь хәләһәд йовулгдсн улс 40 хонад хәрү ирцхәв.
27Паран көдәд бәәсн Кадеш тал ирәд, Мошед, Ахаронд болн Израилин улсин цуг хамцанд үзсән келҗ өгәд, тер һазра темсд үзүлцхәв. 28Мошед иигҗ келцхәв:
– Чини илгәсн һазрт бидн одвидн. Тер һазр үнндән үсәр болн балар байн. Теднә темсд эн! 29Хәрнь, тенд бәәх әмтн чаңһ-чиирг, балһсднь ик, бат. Бидн тенд Анакин хөөт үйнриг чигн үзвидн! 30Амалекин улс Негевд бәәцхәнә, хетмүд, евүсмүд болн амореймүд уулмудт бәәцхәнә, кананахн – теңгсин көвәд дәкәд Йордана эрг көөһәд.
31Мошег бүслҗ зогсҗасн әмтиг Калев тогтнулхар седнә.
– Йовад тер һазриг булаҗ авхмн! – гицхәв тедн. – Бидн тедниг диилхвидн!
32Зуг Калевлә хамдан тиигәрән одсн улс зөвшәрсн уга:
– Бидн теднлә дәәлдҗ чадшговидн. Тедн маднас чидлтә!
33Израилин улс дунд тедн үзсн һазрин тускар му зәңг һарһад бәәв.
– Мадна йовад хәләсн һазр тенд бүүрлсн әмтиг зальгдг чигн! Тенд мана үзсн улс цугтан өндр ик нурһта. 34Бидн тенд әвр ик цогцта улсиг үзвидн (Анакин көвүд баатр тохма күн). Терүнә хаҗуд бидн царцахан бәәдлтә болвидн, теднә нүднд царцахас болҗ үзгдвидн.
Currently Selected:
Әмтнә то авлһн 13: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
