Матай 24

Һол сүмин хольврлһна туск әәлдхл

1Исус сүмәс һарч йовхла, сурһульчнр сүмин бәәшңгиг үзүлхәр Исус тал өөрдцхәв.

2– Цуг энүг үзҗәнт? Энд нег чигн бүтн чолун үлдшго гиҗ Би үнәр келҗәнәв. Цугнь хольврад, хамхрҗ одхинь тадн медх зөвтәт, – гиҗ Исус келв.

Зовлң, көөлһн хойрин тускар

3Исус һанцхарн Олив уулд суусн цагт сурһульчнр өөрдәд:

– Тана келснтн кезә учрхмб? Таниг хәрү ирҗ йовхин темдг цагин чилгчин темдг ямаран болхмб? Келҗ өгит маднд? – гиҗ сурцхав.

4– Хәлән бәәтн! Әмтн тадниг меклвзә! 5Кесгнь Мини нер зүүһәд, әмтиг мекләд, би Христос гиҗ келх. 6Тадн өөрхн болҗах, бас хол болҗах дәәнә тускар соңсхит. Зуг бичә әәтн! Тиим болх зөвтә. Зуг тер чилгч биш. 7Нег келн әмтн талдан келн әмтнә өмнәс босҗ дәврх. Нег орн-нутг талдан орн-нутгла дәәллдх. Ик харһнлһна, һазр чичрлһнә аюл энд-тенд учрх. 8Цуг эн үрн төрхин өмн экиннь элк мошклһна эклц мет болх. 9Тадниг басл зовах, дәкәд цокҗ алх. Келн-әмтн болһн Нанас көлтә таднд дурго болх. 10Кесгнь иткләсн цухрад, нег-негндән дурго болад урвх. 11Тер цагт кесг худл әәлдәчнр ирәд, олн әмтиг меклх. 12Хар үүлмүд немгдәд, кесгиннь дурнь киитрх. 13Күцднь тесснь авргдх. 14Зуг түрүләд келн әмтн болһнд һазрин зах күртл Теңгрин йосна туск Сән Зәңг делгрх. Орн-нутг болһнд Сән Зәңгиг авх арһ күртх. Тегәд чилгч ирх, – гиҗ Исус келв.

Хоосрулҗах җигшүртә юмна тускар

15– Һол сүмиг хоосрулҗах җигшүртә юмиг тадн әрүн бәәрнд үзхит. Энүнә тускар әәлдәч Даниэл бичсмн. (Эн юн гидг юмб? Умшач энүнә тускар ухалтха!) 16Тер цагт Йудья һазрин әмтн уул темцәд зулҗ һартха! 17Герин ора деер сууснь буухларн гер дотрас юм бичә автха! 18Кеер бәәсн күн дулан хувцан авхар, герүрн бичә хәртхә! 19Тер цагт ацата болн үр көкүлдг күүкд улс басл муулян эдлх! 20Тана зулҗ йовлһн үвләр, бемб өдрәр бичә болтха гиҗ зальвртн. 21Орчлң үүдснәс авн ода күртл болад уга, ик һашута өдрмүд учрх. Хөөннь чигн тиим юмн болшго. 22Кемр Бурхн тер өдрмүдиг эс ахрдулхла, нег чигн юмн әмд үлдҗ авргдшго билә. Зуг шүүҗ авгдсн улсин төлә тер өдрмүд ахрдх. 23Кемр таднд «Хәләтн, энд Христос бәәнә» эс гиҗ «Тенд бәәнә» гиҗ келхлә, бичә итктн! 24Юңгад гихлә, худл Христосмуд болн әәлдәчнр ирх йовдл учрхла, шүүҗ авгдсн улсиг чигн меклхәр ик өвәрц, онц темдгүд үзүлх. 25Соңсҗант? Би таднд цуг энүг эртәснь келҗәнәв. 26Тегәд кемр: «Хәләтн, Христос көдәд бәәнә!» – гиҗ таднд келхлә, бичә тиигәрән одтн. Эс гиҗ: «Хәләтн, эн герт Тертн бултҗ йовна» – гихлә, бичә күүнд итктн. 27Теңгрин аһуг дорд үзгәс барун үзг тал цәкллһн керчснлә әдл Күмни Көвүн хәрү ирх. 28Үксн цогц кевтсн һазрт бүргд шовуд цуглрх.

Күмни Көвүнә ирлһн

29Тер һашута өдрмүдин хөөн генткн «Нарн унтрад, сар герл өгдгән уурх. Одд теңгрәс унад, теңгрин күчнь көндрх». 30Тиигхлә теңгр деер Күмни Көвүнә онц темдг үзгдх. Келн әмтн болһн һашудад оркрх. Тегәд Күмни Көвүг үүлн заагар алдр күчтә болн туурмҗта йовҗ йовхиг келн-әмтн болһн үзх. 31Алдр бүрә-бүшкүрин дун һархла, орчлңгин дөрвн үзгәс, һазрин нег захас талдан зах күртл бәәсн Эврәннь шүүҗ авгдсн улсан цуглулхин төлә Күмни Көвүн элчнрән лавта кевәр йовулх.

Инҗр модна тускар

32Эн инҗр модыг хәләҗ үлгүр автн. Терүнә бүчр дүүрәд, көк шин хамтхасн һархла, зуна цаг өөрдҗ йовхинь тадн меднәт. 33Тедү мет тадн: Цуг энүг үзәд медтн. Тер өөрхн, үүднә өөр. 34Үнәр келҗәнәв, эн үйнр сольгдад уга бәәтл цугнь бүтх. 35Теңгр һазр хойр уга болҗ одх, зуг Мини келсн үгмүд сольгдшго.

Күмни Көвүнә ирх цагинь күн медхш

36Тер өдрин болн цагин тускар келхлә, энүнә тускар күн медхш: Теңгрт бәәсн Бурхна элчнр чигн, Көвүн чигн медхш, һанцхн Эцк меднә. 37Ноах бәәсн цагт юн учрла, тиим юмн Күмни Көвүг хәрү ирхлә учрх. 38Тер өдрмүдт усна аюлын өмн әмтн хотан идлдәд, уулдад, гер авлдад, хәрд һарлдад бәәлә. Тиигәд тедн Ноах кермдән ортл бәәһәд бәәҗ. 39Усна аюл ирәд, тедниг уга кетл, тедн тиим юмн болх гиҗ сансн уга. Күмни Көвүг хәрү иртл бас тиигҗ болх. 40Тер цагт кеер бәәсн хойр күүнәс негнь авгдх, наадкнь үлдх. 41Һуйр теермдсн хойр күүкд улсас негнь авгдх, наадкнь үлдх. 42Бийән сергг бәртн! Тадна Эзн ямаран өдрт ирхинь тадн медхшлмт. 43Медтн! Кемр герин эзн хулхачиг гертнь орҗ ирхинь медсн болхла, тер сөөни дуусн унтлго, хулхачиг герүрн орулшго билә. 44Тер учрар бас белн бәәтн! Күмни Көвүн тадниг эс күләҗәсн цагт лавта күрәд ирх.

Нәәлвртә зарц

45Нәәлвртә ухата зарц гисн кемб? Талдан зарцмудыг ахлҗ, цагтнь хот өгх эзнә өгсн даалһврта зарц. 46Эзән хәрҗ ирсн цагт көдлмш кеҗәсн зарц хүвтә. 47Эврәннь һазран чигн Эзн терүнд лавта даалһҗ өгх, – гиҗ Би үнәр келҗәнәв. 48«Эзн кесгтән иршго», – гиһәд, 49наадк зарцнриг цокад, үүртәһән хот-хоолан эдләд, әркән ууһад бәәдг зарц – ухан уга зарц болҗана. 50Эзнь зарц эс күләҗәсн өдрт болн эс медсн цагт хәрҗ ирх. 51Тер зарцан догшн кевәр цааҗлад, хойр чирәтә улс бәәсн һазрур орулх. Тенд әмтн ик зовлң эдләд, шүдән хәврҗ оркрҗ уульх.

Currently Selected:

Матай 24: ХКО_ӘБ

Highlight

Copy