Матай 25

Арвн гиҗгтә күүкдин тускар

1– Теңгрин йосн иим болх. Арвн гиҗгтә күүкд һартан шам авчксн күргиг тосхар һарч ирҗәнә. 2Тавн күүкн ухата бәәҗ, наадк тавнь ухан уга. 3Ухан угань шам авад, шамин тосинь авхан мартчкҗ. 4Ухатань шамта хамднь тоста сав авсн бәәҗ. 5Күргн оратад ирхлә, күүкд үргләд унтҗ одна. 6Сөөни өрәллә: «Күргн аашна, һарад тостн!» – гиҗ хәәкрсн дун соңсгдна. 7Тер кемд күүкд серлдәд, шам сәәнәр герл өгтхә гиҗ түүгән ясҗ белдцхәнә.

8– Шамин тос өгит, мана шамвидн унтрн гиҗәнә, – гиҗ ухан угань ухата күүкнәс сурцхана.

9– Тосан таднд өгхлә, маднд күртшго. Лавкур одад, бийдән тос хулдҗ автн, – гиҗ ухата күүкд хәрүднь келцхәнә.

10Зуг тедниг тос авхар лавкур йовсн хөөн күргн ирҗ. Күргнлә харһхар седәд, белн бәәсн күүкд терүнлә хамдан хүрмин нәәрт йовцхана. Теднә ардаснь үүдн хаагдна. 11Үлдсн күүкд хөөннь ирәд:

– Деед Эзн! Деед Эзн! Үүдән тәәлит! – гиҗ сурцхана.

12– Үнәр келҗәнәв, Би тадниг медхшв, – гиҗ күргн хәрү өгв.

13Тер учрар оньдин бийән сергг бәртн, юңгад гихлә, тадн Күмни Көвүнә ирх өдринь чигн, цагинь чигн медхшт.

Һурвн зарцин тускар

14– Теңгрин йосна тускар дәкәд нег үлгүр соңстн. Нег нойн хол һазрт йовхин өмн эврәннь зарцнран дуудҗ авад, зөөрән теднд даалһҗ үлдәҗ. 15Нег зарцдан тер тавн миңһн алтн мөңг өгч, дарукднь – хойр миңһн, һурвдгчднь – нег миңһн алтн мөңг өгч. Күн болһнд арһ чадсарнь өгәд, хол һазрт йовҗ одна. 16Тавн миңһн алт авснь мөңгән кергт орулад, немҗ дәкәд тавн миңһн олз авч ирнә. 17Хойр миңһн алт авсн зарцнь бас олз авч, тернь дәкәд хойр миңһ болв. 18Нег миңһн алт авснь эврәннь эзнә мөңгән кеер авч одад, һазрт булад хадһлна. 19Кесг цаг давсна хөөн эзнь ирәд, зарцмудас тооца авчана. 20Тавн миңһ авснь дәкәд тавн миңһ немәд авч ирнә.

– Эзн минь, хәләтн, та нанд тавн миңһн алтн мөңг өгвт, би танд дәкәд тавн миңһн олз авч ирүв, – гиҗ тер келнә.

21– Сән, чи нәәлвртә сән зарц. Чамаг бичкн юмнд итклтә болсн төләд, би чамд энүнәс ик керг даалһнав. Мини нәәрт ир, – гиҗ эзн келнә.

22Дарукнь хойр миңһн олзта ирәд:

– Эзн, та нанд хойр миңһ өгләт, би танд дәкәд хойр миңһн олз кеһәд авч ирүв, – гиҗ келнә.

23– Сән, чи нәәлвртә сән зарц. Чамаг бичкн юмнд итклтә болсн төләд, би чамд энүнәс ик керг даалһнав. Мини нәәрт ир, – гиҗ эзн терүнд келнә.

24Нег миңһн алтн мөңг авсн зарц ирв.

– Эзн, таниг догшн гиҗ би меднәв. Та эр үкр сааҗ, үснәснь тарг кетн гиҗ әмтнд зәрлг өгдг күнт. 25Би танас әәһәд, мөңгитн кеер булҗ хадһллав. Тертн эн бәәнә.

26Тиигхлә эзн терүнд келҗәнә:

– Залху, муульта зарц! Чи намаг эр үкр сааҗ, үснәснь тарг кетн гиҗ әмтнд зәрлг болдгнь меддг болхла, 27чи мөңгән хоршаллһна герт өгәд, олз юңгад эс авсмч? 28Эн күүнәс нег миңһ авад, арвн миңһн алтн мөңгтә күүнд өгчктн. 29Тер учрар бәәснднь дәкәд немгдх, тер ик олзта болх. Угарад бәәснәснь бәәсинь булаҗ авгдх. 30Эн керго залху зарциг харңһу һазрт хайчктн. Тенд әмтн ик зовлң эдләд, шүдән хәврҗ оркрҗ уульх, – гиҗ тер нойн зарцнртан зәрлг болв.

Сүл өдрин зарһ

31Күмни Көвүн хан болад ирх, Терүнлә хамдан Бурхна элчнр ирх. Тер хаана ширәд суух. 32Күмни Көвүнүр келн әмтн болһнас цуг улс ирх. Хөөдиг ямадас йилһҗәсн хөөч мет Тер әмтиг хойр багд хувах. 33Хөөдиг барун бийд, ямадыг зүн бийд зогсах. 34Барун бийд зогсҗасн әмтнд Хан:

– Мини Эцкәс әдс авсн әмтн наартн. Орчлң үүдәсн цагас авн таднд нерәдгдсн алвт эзлтн. 35Юңгад гихлә, Намаг өлн бәәсн цагт тадн хот өгәд цадхалат, ундассн цагтм ундм хәрүлләт, хонх һазр хәәҗәсн цагтм гертән хонуллат, 36нүцкн бәәсн цагтм хувцллат, гемнҗәхләм, асрҗ хәләләт, түүрмд суусн цагтм Намаг төвкнүлхәр ирләт, – гив.

37Тер цагт чик седклтә әмтн:

– Деед Эзн! Таниг өлсҗәсн цагт бидн кезә хот өгсмб, ундассн цагттн ундытн кезә хәрүлсмб, 38хәр күн болсн цагттн кезә хонулсмб, нүцкн бәәсн цагттн кезә хувцлсмб? 39Таниг гемтҗәхлә, кезә асрҗ хәләсмб? Түүрмд бәәсн цагттн кезә бидн ирсмб? – гив.

40Тиигхлә Хан хәрүднь:

– Мини хамгин бичкн дүүдм кесн сәәтн Нанд кесн сә болҗ һарла гиҗ үнәр келҗәнәв, – гив.

41Зүн бийд бәәсн әмтнд Тер:

– Нанас цааран йовтн, му йорта әмтн! Эрлг болн терүнә зарцнр орх мөңк һалд ортн. 42Юңгад гихлә, Намаг өлсҗәсн цагт тадн Нанд хот өгсн угат, ундасҗасн цагтм ундм хәрүлҗ ус өгсн уга биләт. 43Хонх һазр хәәсн цагтм гертән хонулсн угат, нүцкн бәәсн цагтм хувцлсн угат, гемнхләм болн түүрмд суусн цаглам нанд нөкд болсн угат, – гив.

44Тиигхлә тедн:

– Деед Эзн! Кезә бидн Таниг өлсҗәсн, ундасҗасн, хонх һазр хәәҗәсн цагттн, хувц хәәҗәсн цагттн, гемтә болн түүрмд суусн цагттн үзәд нөкд эс болвидн! – гиҗ хәрү өгцхәв.

45Тиигхлә хан:

– Мини хамгин бичкн дүүдм тусан күргҗ юм эс кесн болхла, Нанд тусан эс күргснлә әдл юмн гиҗ би үнәр келҗәнәв. 46Эдн мөңк цааҗла харһх. Чик седклтәнь мөңк җирһл әдлх, – гив.

Currently Selected:

Матай 25: ХКО_ӘБ

Highlight

Copy