Матай 15

Өвк эцкнрин ном

1Тер цагт Ерусалимас Исус тал паршмуд болн закана багшнр ирцхәв.

2– Чини сурһульчнр өвк эцкнриннь заңшалан эвдҗәнә, тедн хотыннь өмн һаран уһахш, – гиҗ тедн келцхәв.

3– Юңгад тадн бийстн тана заңшалас көлтә Бурхна заавриг эвдәд бәәнәт? 4«Эк эцк хойран күндлҗ тевч», «Эк эцк хойран му келсн күн үкх зөвтә» гиҗ Бурхн келсмн. 5-6Зуг тадн әмтиг: «Эврәннь зөөрәсн эк-эцкдән өглго Бурхнд нерәдҗ өгдг күн, эк-эцкдән туслҗ тевчх йоснас сулдна» гиҗ дасхнат. Тиим кевәр тадна заңшал Бурхна заавриг уга кенә. 7Тадн хойр чирәтә улст! Тадна тускар Эшья әәлдәч чик келҗ: « 8Эн улс хоосн амарн Намаг күндлнә. Теднә зүркнь Нанас хол бәәнә. 9Эдн күүнә ухалҗ һарһсн номиг Бурхна ном гиҗ дасхна. Эднә сөгдлһн юмн биш», – гиҗ Исус хәрү өгв.

Бузрдуллһна туск ном

10-11Әмтиг дуудҗ авад Исус:

– Соңсад медҗ автн! Амар орсн юмн биш, амар һарсн юмн лавта күүг бузрдулна, – гив.

12– Тана үгмүд паршмудыг һундасинь Та меднт? – гиҗ сурһульчнр Исус тал өөрдәд келцхәв.

13-14– Мини Теңгрин Эцкин эс тәрсн урһмл болһн уңгтаһинь хамднь таслҗ хайгдх. Тедн эврәннь хаалһарн йовтха! Тедн сохр әмтнә сохр залачнр. Сохр сохран көтлҗ йовхла, лавта нүкнд унх! – гиҗ Исус хәрү өгв.

15– Эн үлгүрин тәәлвринь маднд келҗ өгит, – гиҗ Пётр сурв.

16– Тадн чигн мини келсим медҗ авсн угавт? 17Амар орсн юмн геснд орад, һазаран һарч одна. 18Амар һарсн юмн күүнә седкләс һарад, күүг бузрдулдг мөн. 19Юңгад гихлә, күүнә седкл дотрас хар санан, аллһн-буллһн, күүнә авальта дерән негдүлһн, аля йовдл, хулха, худл герчллһн, хов зөөлһн һарна. 20Цуг эн күүг бузрдулна, зуг кемр күн хотын өмн һаран эс уһахла, тертн күүг бузрдулхш.

Буру номта күүкд күүнә сүзг

21-22Цааранднь Исус Тир болн Сидон һазр эргәд йовсмн. Тер бәәрн Кенаана күүкд күн Исус тал ирв.

– Деед Эзн, Давидин Көвүн! #Давидин Көвүн гисн Давидин тохм. Намаг хәәрлит! Мини күүкн догшн хар сәкүснд эзлгдҗ. Тер дегд зовҗана! – гиҗ күүкд күн хәәкрв.

23Зуг Исус ә һарсн уга.

– Буйн болтха! Энүг цааран йовултн! Энтн мадниг дахҗ йовад, хәәкрәд бәәнә, – гиҗ сурһульчнр Исус тал өөрдҗ келцхәв.

24– Бурхн Намаг төөрсн хөд мет Израилин әмтн тал илгәв, – гиҗ Исус хәрү өгв.

25– Деед Эзн минь! Нанд нөкд болыт! – гиҗ күүкд күн саак ээрв.

26– Үрнәсн өдмг булаҗ авад, нохад хайхла, сән юмн биш, – гиҗ Исус келв.

27– Тиим-тиим, Деед Эзн минь, зуг Эзнә ширәһәс унсн хотын шавхрнь нохас иднә, тиим эсий? – гиҗ күүкд күн хәрүднь келв.

28– Чини сүзг ик! Эгч, чини сансн санаһар болтха! – гиҗ Исус келв.

Тер агчмд күүкн эдгәд одв.

Исус дала өвчтә әмтиг эдгәҗәнә

29Исус Һалилья нуурин көвәһәр йовҗ йовла. Тер уул деер һарад суув. 30Кесг доһлң, сохр, эрмдгтә, келн уга болн нань чигн улсиг Исус тал авч ирәд көлднь тәвцхәв. Исус тедниг эдгәв. 31Келн угань келнд орад, эрмдгтәнь эдгәд, доһлңгнь йосндан йовдг болад, сохрнь үздг болв. Тер йовдлыг олн әмтн үзәд йир икәр өврцхәв. Тедн Израилин Бурхиг магтҗ ханлт өргцхәв.

Дөрвн миңһн кү цадхлһн

32– Эн әмтнд Би сана зовҗанав, эдн һурвн өдрт Нанла бәәлә, хотнь чилҗ. Эдниг цадхал уга тәвхән седҗәхшв. Хаалһд эднд му болвза, – гиҗ Исус сурһульчнран дуудҗ келв.

33– Эн эҗго көдәд эн олн әмтиг цадхах тиим дала өдмг альд бәәх билә? – гиҗ сурһульчнр Багштан хәрү өгв.

34Исус:

– Кедү өдмгтәвт? – гиҗ сурв.

– Долахн өдмг болн цөөкн бичкн заһсн бәәнә, – гиҗ тедн хәрү өгв. 35-36Исус әмтиг һазрт суулһад, долан өдмг болн заһс авад, Бурхнд ханлт өргв. 37-39Дәкәд өдмгиг хуваһад, сурһульчнртан түгәҗ өгв, тедн әмтнд хуваҗ өгв. Әмтн хотан эдләд цадцхав. Дәкәд үлдсн хот долан савд цуглулцхав. Күүкд улсиг болн бичкдүдиг эс тоолхла, хот эдлҗәснь дөрвн миңһн күн бәәҗ. Исус әмтиг тәвәд, оңһц дотран орад, Магадан һазрур темцҗ йовв.

Currently Selected:

Матай 15: ХКО_ӘБ

Highlight

Copy