Матай 14

Йохана үклин тускар

1-2Тер цагт Һалильян хан Херод Исусин туск зәңг соңсад, эврәннь зарцнртан:

– Эн уснд кирслдг Йохан үкәрәсн босҗ ирв, тегәд чигн Эн тиим өвәрц юм кедг күчтә, – гиҗ келв.

3Херод эврәннь Пилип дүүһиннь гергн Херодидас көлтә Йоханыг цевәр күләд, түүрмд хайсмн. 4Юңгад гихлә, Йохан терүг саглҗ:

– Эн гергнлә бәәх чамд зөв уга, – гиҗ оньдин келдг бәәсмн.

5Түрүн бийд Херод терүг алхар седҗ, зуг әмтнәс әәһәд үкллә харһулсн уга. Әмтн терүг Бурхна әәлдәч гиҗ тоолдг бәәсмн. 6Херодын һарсн өдр темдглҗәсн цагт Херодидин күүкн гиичнрин өмн биилҗәсмн. 7Терүнә биилҗәсн би Херодт икәр таасгдад, тер андһарлад:

– Сурх юман сур. Би цугинь күцәсүв, – гиҗ күүкнд келв.

8Тер күүкн экиннь заасн үгәр:

– Уснд кирслдг Йохана толһаг тәвүр деер тәвҗ, нанд авч ир, – гиҗ келҗ.

9-10Хан гейүрҗ ухалҗаһад, зуг гиичнрин өмн тәвсн андһаран күцәхәр, тер күүкнә сурсн юмиг өгхәр, түүрмд суусн Йохана толһаг хәәчлә харһултн гиҗ зәрлг болв. 11Толһаг тәвүр деер тәвәд, күүкнд авч ирҗ, тернь экдән авад одҗ. 12Йохана сурһульчнр Йохана цогцинь авад оршасна хөөн Исусур ирәд учрсн йовдлын тускар келсмн.

Тавн миңһн кү цадхлһн

13Исус энүг соңсчкад, оңһц дотр сууһад, эҗго һазр хәәҗ йовсмн. 14Зуг олн әмтн энүг медчкәд, эврәннь хотнас һарлдад, Исусиг дахҗ йовһар йовсмн. Исус оңһцас һарад, һазр ишкәд, олн әмтиг үзҗ. 15Исус теднд сана зовҗ, өвчтә улсиг эдгәв. Ора болҗ одхла, сурһульчнр Исусур өөрдцхәв.

– Багш, энд эҗго көдә. Ора болҗана, әмтиг тәвчктн. Эдн эргндк хотн болһнар йовад, идх уух хотан бийдән хулдҗ авг, – гиҗ тедн келцхәв.

16– Эдниг йовулх керг уга, тадн бийстн эднд хот өгтн, – гиҗ Исус хәрүднь келв.

17– Манад юмн уга. Тавхн өдмг, хойрхн заһсн, – гиҗ сурһульчнр келцхәв.

18– Түүгән Нан тал авч иртн, – гиҗ Исус келв.

19Исус әмтиг ноһан деер суулһад, тавн өдмг, хойр заһс авад, Бурхнд ханлт өргәд, өдмгиг хуһлҗ сурһульчнрт хуваһад өгв. 20Терүг күн болһнд түгәҗ өгцхәв. Цуһар хотан эдлҗ цадцхав. Энүнә хөөн үлдсн хот арвн хойр савд багтҗ. 21Күүкд улсиг, бичкн күүкдиг эс тоолхла, хот идснь тавн миңһн күн болҗ һарв.

Исус теңгсин усн деегүр йовҗана

22-23Энүнә хөөн тер дарунь Исус:

– Оңһц дотр орад, теңгс һатлҗ телтр көвәд күртн, – гиҗ сурһульчнртан закв.

Өөрк әмтән үлдәһәд, Исус һанцарн зальврхар уул деегшән давшҗ һарв. Асхн болад ирхлә, һанцарн үлдсн бәәҗ. 24Сурһульчнр йовсн оңһц көвәһәс хол бәәсмн. Ик салькн зөрүд өмнәснь үләһәд, усна дольган шуугад, оңһциг шивәд бәәв. 25Өр цәәхин өмн Исус сурһульчнр тал темцҗ усн деегүр йовҗ. 26Сурһульчнр Багшан усн деегүр йовҗ йовхинь үзәд, ик гидгәр сүрдцхәв.

27– Энтн ки үзгдл! – гиҗ тедн чочад хәәкрцхәв.

– Байрлтн! Бичә Нанас әәтн! Энтн бив, – гиҗ Исус тер дарунь ә һарв.

28– Деед Эзн! Кемр Та мөн болхла, усн деегүр Танур йовх зәрлг өгхнтн! – гиҗ Пётр Исуст келв.

29– Йов! – гиҗ Исус хәрү өгв.

Пётр оңһц дотрас һарад, усн деегүр Исус тал йовв. 30Зуг салькн шүрүтәһәр үләсинь медәд, Пётр әәһәд, уснд чивҗ:

– Деед Эзн минь! Намаг харсҗ авртн! – гиҗ хәәкрв.

31Исус һаран өгәд, терүг һараснь бәрәд, келв:

– Итклчн баһ бәәҗ! Юңгад маһдлад бәәнәч?

32Тедниг оңһц дотран орхла, салькн тогтнв. 33Тенд бәәсн сурһульчнр Исусин өмн өвдглҗ сөгдв.

– Та үнәр Бурхна Көвүн мөнт! – гиҗ тедн келцхәв.

Өвчтә әмтиг Генесәретд эдгәлһн

34-35Нур һатлҗ йовад, тедн Генесәрет һазрин көвәд өөрдҗ ирцхәв. Энүгинь медчкәд, тер бәәрн әмтн эргндән бәәсн күн болһнд зәңгләд, кесг өвчтә улсиг Исус тал авч ирцхәв. 36Тедн Исусин хувцна хормаднь күрх зөв сурцхав. Хормаднь күрсн әмтн тер дарунь эдгдг болв.

Currently Selected:

Матай 14: ХКО_ӘБ

Highlight

Copy