Левит 20
20
Килнц засгллһн
1Деед Эзн Мошед келнә:
2– Израилин улст күргәд кел: «Израилин улсин кен чигн, эс гиҗ тедн дунд бәәх нүүҗ ирсн әмтн эврәннь үрән Молох бурхнд тәклд бәрхлә, тиигхлә тиим күн алгдх зөвтә. Хамцана әмтн цугтан терүг чолуһар шивтхә. 3Би тер күүнд ууран күргнәв, терүг эврәннь келн-улс дундас уга кехүв. Яһад гихлә Молохд тер эврәннь үрән өгснд, Мини әрүн бәәрн болн Мини әрүн нер һутаснд. 4Кемр эн хамцана улс терүг һарсн үрән Молохд өгснд эс медсн болад бәәхлә, терүг эс алхла, 5тиигхлә Би бийиннь ууран тер күүнд һарһнав, терүнә төрл-саднд һарһнав. Тер күүг болн терүнлә хамдан Молохд мөргсинь кевтнь эврәннь келн-улс дундас уга кенәв.
6Кен чигн күн өңгрсн улсиг, сүмсинь дуудад тедниг дахад бәәхлә, Би тер күүнд Эврәннь ууран һарһнав. Би терүг эврәннь келн-улс дундас уга кенәв.
7Әрүн болтн, эврәннь әрүнән хадһлтн, яһад гихлә Би – Деед Эзн, тадна Бурхн. 8Мини зокалмудыг бәртн, тедниг күцәтн. Би – Деед Эзн, тадна әрүн бәәдлин булгнь.
9Кемр кен-негнь эцкән эс гиҗ экән харахла – үкх зөвтә. Тер күүнә цусна гемнь бийднь бууҗана, яһад гихлә эцкән эс гиҗ экән харасн болҗана.
10Кемр залу күн талдан күүнә гергнлә, өөрхн күүнәннь гергнлә нииләд кевтсн болхла, тиигхлә хойраһинь алх кергтә – тер залуг болн тер гергиг. 11Эцкиннь гергнлә нииләд кевтсн күн эцкән һутав. Хоюрн алгдх зөвтә. Теднә гемнь бийсднь бәәнә. 12Кемр залу күн берләһән нииләд кевтсн болхла, тиигхлә хойраһинь алх кергтә. Тедн җигшүртә юм һарһв. Теднә гемнь теднд бийстнь бәәнә.
13Кемр залу күн талдан залута, күүкд күүнлә әдләр, нииләд кевтсн болхлаг, тедн хойр җигшүртә юм һарһв. Тедниг алх кергтә. Теднә гемнь теднд бийстнь бәәнә.
14Кемр кен-негнь күүкд кү болн терүнә экинь гергән кехәр авхла, тернь килнц. Тер залуг болн хойр гергиг шатаһад алтха. Тиим килнц тадн дунд бичә үзгдтхә.
15Мал-адуснла ниилсн залуг алх кергтә, мал-адуснь бас алгдх зөвтә. 16Кемр күүкд күн мал-адуснла ниилсн болхла, тиигхлә тер гергиг болн мал-адусиг ал. Тедниг алх кергтә, теднә гем теднд бийстнь бәәнә.
17Кемр кен-негнь эврәннь эгч-дүүһән, эцкиннь күүк, эс гиҗ экиннь күүк авад, терүнә нүцкн бәәдл үзхлә, тернь көвүнә нүцкн бәәдл үзхлә, эннь йир ичр уга йовдл. Тиим улс эврәннь төрл-садна нүүрт уга кегдтхә! Эн күн эврәннь дү күүкнә ичринь үзүлв. Тер бурута болв.
18Кемр кен-негнь сарин кир ирсн күүкд күүнлә нииләд кевтәд, терүнә нүцкн бәәдл илдксн болхла, терүнәс һарчах цусинь үзүлсн болхла, тер күүкд күн бийәсн һарчах цусан үзүлсн болхла, тиигхлә тедн хоюрн эврәннь келн-улс дундас уга кегдх.
19Экиннь эгч-дүүһин нүцкн бәәдл бичә үзүл болн эцкиннь эгч-дүүһин бәәдл бас. Тиим юм һарһсн күн бийиннь нүцкн бәәдл үзүлснлә әдл. Хоюрн бурута болх. 20Авһиннь гергнлә нииләд кевтсн күн эврәннь авһин нүцкн бәәдл үзүлснлә әдл. Тедн хоюрн килнцд орх – үрн угаһар үкцхәх. 21Кемр кен-негнь ах-дүүһиннь герг авхла, эннь бузр юмн. Тер күн ах-дүүһиннь нүцкн бәәдл үзүлҗәнә. Тедн хоюрн үрн уга болх.
22Мини зокалмудыг болн закадыг бәртн, тедниг күцәтн, тиигхлә Мини дахулад одҗах тадна бәәх һазр тадниг һарһҗ шившго. 23Таднас Мини көөҗәх келн-әмтнә авъяс бичә бәртн. Эдниг цугтаһинь тедн кеҗәв. Тегәд тернь Нанд җигшүртә болв. 24Би таднд келләв: „Тадн теднә һазрин эзн болхит. Тер һазр үсәр болн балар дүүрң. Терүг Би таднд өгнәв“. Би – Деед Эзн, тадна Бурхн. Тадниг Би талын улсас йилһҗәнәв.
25Тадн цевр малыг цевр биш малас болн цевр шовуг цевр бишәснь йилһтн. Би урднь таднд бөдүн мал, нисдг юмсиг, үүрмг әмтә һазр деегүр гүүдг юмсиг бузр гиҗ тоолтха гиләв. Тадн Мини келсн юмсар бийән бичә бузрдатн. 26Мини төлә әрүн болтн. Яһад гихлә Би – Деед Эзн, әрүнв. Би тадниг талдан келн-улсас йилһҗәнәв. Тадн – Мини.
27Өңгрсн күүнлә болн сүмснлә күүнддг залусиг болн күүкд улсиг алх кергтә. Тедниг чолуһар шивтхә, теднә бурунь бийиннь цусар һарчана».
Currently Selected:
Левит 20: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
