Левит 19
19
Бийән бәрлһнә кемҗән болн авъясмудын туск зааврмуд
1Деед Эзн Мошед келнә:
2– Израилин хамцана цуг әмтнд күргәд кел: «Цугтан әрүн бәәдләр бәәтн. Яһад гихлә Би әрүнв, Деед Эзн, тадна Бурхн.
3Эк эцк хойран күндлтн. Мини бемб өдр күцәтн. Би – Деед Эзн, тадна Бурхн.
4Худл шүтәнд бичә шүттн, бийдән бурхиг бичә цутхҗ кетн. Би – Деед Эзн, тадна Бурхн.
5Кемр Деед Эзнд эвцлһнә бәрц бәрҗәхлә, терүгән таасгддгар кетн: 6тер бәрциг авч ирсн өдртнь эс гиҗ маңһдуртнь идтн. Һурвдгч өдртнь үлдсинь шатах кергтә. 7Кемр тер бәрцәс үлдсинь һурвдгч өдртнь идхлә, тернь тааста болшго – махн үрҗ одх. 8Тиим мах идсн күн бурута болх. Тер күн Деед Эзнә әрүн юмиг бузрдаҗана. Тегәд тер эврәннь келн-улс дундас уга кегдх.
9Тадна һазрт тәрсн буудяһан хурахларн, тәрәнә захднь бичә күр. Хадлһна хөөн үлдсн буудян тәрәнә толһа бичә түүҗ ав. 10Уста үзм урһдг һазрт үзмиг умш күртлнь бичә цуглул, унсинь чигн бичә ав. Тедниг угатя болн нүүҗ ирсн әмтнд үлдә. Би – Деед Эзн, тадна Бурхн.
11Бичә хулха кетн, бичә худл келтн, бичә нег-негән меклтн. 12Мини нерәр батлҗ худл андһар бичә өгтн. Эврәннь Бурхна нериг бичә һутатн. Би – Деед Эзн.
13Өөрхн күүһән бичә шахҗ зова, бичә терүг тон. Нәәмәдлҗ авсн күүнә җалвинь өрүн күртл бичә бәр. 14Таңх күүг бичә наад бәр, сохр күүнд боомтг бичә ке. Би – Деед Эзн.
15Зарһ кехләрн, чикәр ке. Зарһд угатяһинь харсад, байн күүһинь өөдлүләд, бичә тиигҗ чирә хәләҗ ке. Өөрхн күүнә зарһинь чикәр ке. 16Эврәннь нутгин әмтн дунд бичә хов зө. Кемр өөрхн күн зеткртә йовдлла харһулгдҗахла, тиим йовдлд бичә орлц. Би – Деед Эзн.
17Эврәннь хамцана улст нуувчар бичә дурго бол. Өөрхн күүнәннь килнц даадгоһар терүнд илднь келҗә. 18Хамдан бәәх нег нутга кен чигн күүнәс бичә өшә көөлд, бичә терүнд уурлад бә. Өөрхн күүнд бийләһән әдләр дурл. Би – Деед Эзн.
19Мини зокалмудыг күцәҗә. Талдан хойр зүсн мал бичә ниилүлтн, нег тәрәнә һазрт хойр зүсн эк бичә тәртн, хойр зүсн утцар гүрсн хувц бичә өмстн.
20Кемр залу күн ялч күүкд күүнлә нииләд кевтсн болхла, тер күүкд күн талдан күүнд одх бәәсн болхла, терүг хулдҗ авад уга, сулдхгдад уга бәәсн болхла, тиигхлә мөшклһ кех кергтә. Тедниг бичә алтн, яһад гихлә тер күүкд күн сул күн биш. 21Тер залу Деед Эзнд, Харһлтын Шатрин үүднд, һаруһинь даалһна бәрц гиҗ хуц авч иртхә. 22Деед Эзнә өмн гелң гемән хәрүллһнә авъяс күцәтхә. Тер күүнә һарһсн гемин һаруһинь даах бәрц гиҗ хуц авч иртхә. Тегәд эн гемнь тәвгдх.
23Таднд Деед Эзнә өгчәх тер һазрт ирәд темснә модд тәрхләрн, теднә темсинь идҗ болшго гиҗ тоолтн. Һурвн җилдән теднә темсинь бичә идтн. 24Дөрвдгч җилдән тер темсд цугтан әрүн болх, Деед Эзнд нәәрин бәрц болх. 25Тавдгч җилдән эн темсдиг идтн. Тегәд тадна урһц йир элвг болх. Би – Деед Эзн, тадна Бурхн.
26Махиг цустаһинь бичә идтн. Бичә белг бәртн, бичә илв кетн. 27Толһа деерк үсиг төгрглҗ бичә хәәчлтн. Сахлыннь үзүриг бичә хәәчл. 28Үксн күүнә төлә махмудтан керчҗ сөрв бичә һарһтн, бичә эврәннь махмудтан темдгүд зуртн. Би – Деед Эзн.
29Эврәннь күүкнд аля йовдл бичә һарһул – бийән хулддг гергн бичә болтха. Эс гиҗ һазр аля бәәдләр дүүрх, җигшүртә йовдл икдх.
30Мини бемб өдр бәртн, Мини әрүн бәәр хәәрлтн. Би – Деед Эзн.
31Өңгрсн күүг дууддг, сәкүсн-сүмсиг дууддг күн тал бичә одтн. Терүнәс тадн бузрдхит. Би – Деед Эзн, тадна Бурхн.
32Буурл үстәг тевч, көгшдин өмн босад зогс. Эврәннь Бурхиг икәр күндл. Би – Деед Эзн.
33Тадна һазрт бүүрлхәр нүүҗ ирсн әмтиг бичә бастн. 34Танад бәәх нүүҗ ирсн әмтиг бәәрн улсла әдл тоолтн. Теднд бийләһән әдл дурл. Тадн бас Египетд нүүҗ ирсн әмтн болҗ бәәләт. Би – Деед Эзн, тадна Бурхн.
35Кергән күцәхләрн чикәр күцә: юм кемҗәлхләрн, чиңнүрдхләрн эс гиҗ тоолхларн. 36Тадна чиңнүр чик болн гиир чик болтха, чик ефә болн чик гин болтха. Би – Деед Эзн, тадна Бурхн. Тадниг Египетәс Би һарһлав.
37Мини зокалмудыг болн закадыг бәртн, тедниг күцәтн. Би – Деед Эзн».
Currently Selected:
Левит 19: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
