Левит 18
18
Зака эвдҗ цогц-махмударн ниилшгон тускар
1Деед Эзн Мошед келнә:
2– Израилин улст күргәд кел: «Би – Деед Эзн, тадна Бурхн. 3Тадна бәәсн Египетин авъясиг бичә дуратн. Тадниг Мини дахулад авч йовх Канана һазра авъясиг бас бичә дуратн. Теднә йос бичә бәртн. 4Мини закадыг бәртн, Мини зокалар кеһәд тедниг күцәтн. Би – Деед Эзн, тадна Бурхн болҗанав. 5Мини зокалмудыг болн закадыг күцәтн. Терүг күцәсн күн әмд болх. Би – Деед Эзн.
6Таднас кен чигн күн төрл күүкд күн тал бичә өөрдтхә, терүг бичә авлҗ ичәтхә: Би – Деед Эзн.
7Эцк-экиннь ичртә йовдлынь бичә үзүл. Экиннь нүцкн бәәдл бичә үзүл, энчнь чини эк.
8Эцкиннь талдан гергнә нүцкн бәәдл бичә үзүл, энчнь эцкиннь ичртә бәәдл үзүлснлә әдл.
9Эгч-дүүһиннь ичртә бәәдл бичә үзүл. Тер күн чини эцкин күүкн болну, эс гиҗ экинчн күүкн болну, тер тана өрк-бүлд эс гиҗ талдан бүлд һарсн болну, бичә терүнә ичринь үзүл.
10Чини көвүнә күүкнәннь эс гиҗ күүкнәннь күүкнә нүцкн бәәдл бичә үзүл. Эннь бийиннь нүцкн бәәдл үзүлснлә әдл болх.
11Чини эцкин гергнә күүкнә нүцкн бәәдл бичә үзүл, тер күүкн чини эцкәс һарсмн. Энчнь чини дү күүкн, нүцкн бәәдлинь бичә үзүл.
12Эцкиннь эгч болн дү күүкнә нүцкн бәәдл бичә үзүл. Энчнь чини эцкин махн-цусн.
13Чини экин эгч болн дү күүкнә ичринь бичә илдк, яһад гихлә тер чини экин махн-цусн күн.
14Чини эцкин ах-дүүһин ичртә бәәдлинь бичә үзүл. Терүнә гергн тал бичә өөрд, терчнь чини һаһа.
15Бериннь нүцкн бәәдлинь бичә үзүл. Терчнь чини көвүнә гергн, бичә неринь һута.
16Ах-дүүһиннь гергнә нүцкн бәәдл бичә илдк. Энчн чини ах-дүүһин ичринь үзүлснлә әдл.
17Күүкд күүнә болн терүнә күүкнә ичринь бичә илдк. Терүнә көвүнә күүкәр бичә гергән ке. Эс гиҗ терүнә күүкнә күүк бичә ав. Тедн цугтан нег махн-цусн әмтн. Тиим йовдл һарһлһн килнц болҗана.
18Гергнәннь эгч-дү күүг бичә мордулҗ ав. Гергән әмд деернь эгч-дү күүнә ичринь үзүләд, терүгәр гергнләһән дөрлддг кү бичә ке.
19Сарин кир ирсн цагт гергн күн тал бичә өөрд. Терүнә ичртә бәәдлинь бичә үзүл.
20Талдан күүнә гергнлә бичә кевт, терүнд асаһан бичә орул, терүнлә бичә бийән һута.
21Эврәннь үрдән күүнә Молох гидг бурхнд бичә тәклд бәр. Бурхнаннь нериг бичә һута. Би – Деед Эзн.
22Залу күүнлә гергн күүнлә әдл бичә кевт. Энчн җигшүртә.
23Мал-адуснла бичә ниил. Тиигхләг чи бузр болхич. Күүкд күн бас бичә мал-адуснла ниилтхә. Эннь әмтә юмсин йирин бәәдл эвдлһн болҗана.
24Бийән тиим юмар бичә бузрдатн. Тиим юмар бийән келн-әмтн бузрдаҗав. Тедниг Би таднд орм һарһад көөҗәнәв. 25Теднәс көлтә эн һазр бузрдв. Би терүг килнц һарһснднь хәрүһинь некв. Тер һазр тенд бәәсн әмтиг өргәд шивв. 26Тадн Мини зокалмудыг болн Мини закадыг күцәх зөвтәт. Таднас бәәрн әмтн болну, эс гиҗ нүүҗ ирснь болну, тиим җигшүртә юм бичә һарһтха. 27Таднас урд эн һазрт бәәсн әмтн иим җигшүртә юм һарһҗасн бәәҗ. Тегәд һазр бузрдҗ. 28Таднас урд энд бәәсн әмтиг өргәд шивснлә әдл тиим юмн болшго. Эн һазр таднас көлтә бузрдшго юмн, тадниг тиигшго. 29Тиим җигшүртә юм һарһҗах әмтн эврәннь келн-улс дундас уга кегдх. 30Мини батлсн заавр бәртн: таднас өмн бәәсн әмтнә тиим җигшүртә авъясмуд бичә дуратн. Теднәр бийән бичә һутатн. Би – Деед Эзн, тадна Бурхнв».
Currently Selected:
Левит 18: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
