Левит 13
13
Арсна гемин тускар
1Деед Эзн Мошед келнә:
2– Кемр күүнә махмудын арсн деер хавдр, бүрлдлһн эс гиҗ цаһан толв һархла, эннь проказа гидг арсна гем. Тер күүг Ахарон гелң тал, эс гиҗ терүнә нег гелң болҗах хөөт үй тал авч одх кергтә. 3Арсн деер һарсн гемиг тер хәләтхә. Кемр тер ормднь урһҗах үсн цаһаһад, хотхр орм һарсн болхла, тиигхлә тернь проказа гем. Гелң тиим юм үзхләрн гемтә күүг бузр гиҗ тоолхмн болҗана. 4Кемр арсн деер цаһан толв бәәхлә, зуг хотхр орм уга, тер ормд урһҗах үсн эс цаһасн болхла, тиигхлә гелң тер күүг долан хонгт талднь бәртхә. 5Дола хонад гелң терүг хәләтхә. Кемр шархта орм эс оңдарсмн болхла, арсн деерәһәр эс түгҗ одсмн болхла, тиигхлә гелң гемтә күүг бас долан хонгт һанцараһинь бәртхә. 6Дола хонад терүг шинәс хәләтхә. Кемр шархин орм цәәвр бәәдл һарад, арсн деегүр эс түгсн болхла, тиигхлә гелң гемтә күүг цевр гиҗ зәңглх. Эннь йирдән бүрлдлһн бәәҗ. Эн күн хувцан уһатха, тегәд цевр болх. 7Болв тер гелңд бийән үзүләд, цеврдснә хөөн бүрлдлһнә гем арсн деегүрнь түгсн болхла, дәкн гелңд бийән үзүлх кергтә. 8Кемр гелң бүрлдлһнә гем арсар түгсинь үзхләрн, тер гемтә күүг бузр гиҗ зәңглх йоста. Эннь проказа гем.
9Проказа гемтә күүг гелңд авч одх кергтә. 10Кемр гелң гемтә күүнә арсн деер цәәсн хавдр, тер ормд үсн цәәһәд, махнь үзгдәд халцха болсиг үзхләрн, 11тернь удандан бәәх проказа гем гих. Тиим күүг гелң цевр биш гиҗ зәңглх зөвтә. Салу бәрхмн биш – тер цевр биш. 12Болв кемр гем арсарнь түгәд толһаһаснь тавгтнь күрсиг гелң медхлә, 13тер күүнә махмудынь кевтнь гем бүрксиг гелң үзхләрн, тиим бәәдлиг гелң цевр гиҗ келх йоста. Махмуднь кевтән цәәсн болхла, цевр болҗана. 14Болв күүнә махмудт ил сөрв һархла, тиим күн цевр биш. 15Кемр гелң тиим сөрв үзхләг, тер күүг цевр биш гиҗ келх йоста. Ил сөрв цевр биш, эннь проказа гем. 16Болв сөрвнь дәкн цаһахла, тер күн шинәс гелң тал одтха. 17Гелң терүг хәләтхә. Кемр шархта ормнь цаһасн болхла, гелң гемтә күүг цевр гих. Тер күн цевр.
18Кемр күүнә арсн деер хавдр һарад эдгхләнь, 19терүнә ормд цаһан хавдр эс гиҗ улан-цаһан толв һарч ирхлә, гемтә күн гелңд бийән үзүлтхә. 20Кемр эн орм хотхр болад үснь цәәсн болхла, гелң тиим күүг цевр биш гиҗ келх йоста. Эннь хавдрин ормд һарч ирсн проказа гем. 21Болв кемр гелң терүнд цаһан үс болн хотхр орм эс олхла, дәкәд толв цәәсиг үзхләрн гемтә күүг долан хонгт һанцараһинь бәәлһтхә. 22Кемр толв арсн деерәһүр түгсн болхла, тиигхлә гелң тер күүг цевр биш гиҗ келх: эннь гем. 23Болв цаһан толв эс оңдархла, эс түгхлә, тиигхлә эннь хавдрас үлдсн йирин сөрв. Тегәд гелң терүг цевр гиҗ келх йоста.
24Кемр кен-негнь һалд шатад, шатсн ормднь ил махн улан-цаһан, эс гиҗ цаһан болҗ һархла, 25эн күүг гелң хәләтхә. Кемр толв деерк үсн цәәһәд, хотхр орм һарсн болхла, тиигхлә шатсн махмудт проказа гем һарч ирсн болҗана. Тиигхлә гемтә күүг гелң цевр биш гиҗ келх зөвтә: эннь проказа. 26Кемр гелң цаһан үс болн хотхр орм эс үзхлә, дәкәд толв цәәсиг үзхләрн гемтә күүг долан хонгт талднь бәәлһтхә. 27Дола хонад гелң терүг хәләтхә. Кемр толв арсн деегүр түгсн болхла, гелң тер күүг цевр биш гиҗ келх йоста. Эннь проказа гем. 28Кемр эн толв оңдарлго болн арсн деегүр эс түгҗәхлә, цәәҗ одсн болхла, тиигхлә тер хавдр шатснас һарчана. Гелң тер гемтә күүг цевр гиҗ тоолх йоста. Эннь шатснас һарчах сөрв.
29Кемр залусин эс гиҗ гергчүдин толһа деернь, эс гиҗ өргн деернь арснь хавдхла, 30гелң тер ормд хотасн бәәдл болн нигт биш шар үс үзхләрн тер күүг цевр биш гиҗ келх йоста. Эннь цар гем, толһад һардг эс гиҗ өргн деер һардг проказа гем. 31Кемр тер ормд хотхр уга, хар үсн уга болхла, тиигхлә гемтә күүг долан хонгт һанцараһинь бәәлһтхә. 32Долан хонг болад гелң гемтә күүг хәләх йоста. Кемр цар гем эс түгсн болхла, кемр тер ормд шар үсн эс урһсн болн эс хотасн болхла, 33гемтә күн өвчәх ормиг көндәлго үсән хустха. Тегәд гелң терүг бас долан хонгт салу бәртхә. 34Дола хонад гелң терүг шинҗләд хәләтхә, кемр цар гем арсн деегүр эс түгсн болхла, кемр хотхр орм эс һарсн болхла, гелң терүг цевр гиҗ тоолхмн болҗана. Тер күн хувцан уһатха, тегәд тер цевр болх. 35Болв кемр гемтә күн цевр гиҗ келснә хөөн цар гем арсн деегүр түгсн болхла, 36гелң терүг үзхләрн шарлсн үс хәәлго чигн бәәх: гемтә күн цевр биш. 37Кемр хавдсн орм эс оңдарсмн болхла, тенд хар үсн урһхла, тиигхлә гемнь эдгәд тер күн цеврдсн болҗана. Гелң терүг цевр гиҗ тоолх йоста.
38Кемр залусин эс гиҗ гергчүдин арсн цаһан толвар бүркгдхлә, 39гелң гемтә күүг хәләһәд тер толв өңгән геехлә, тиигхлә эннь йирдән цаһасн арсн болҗана. Гемтә күн цевр.
40Кемр күүнә гиҗгиннь үсн унхла, тиигхлә гиҗгнь халцха, тиим күн цевр. 41Кемр өмннь урһҗах үсән геехлә, тиигхлә эннь халцха орм, тиим күн цевр. 42Болв кемр күүнә халцха гиҗгт, эс гихлә өмннь бәәх халцха ормд улан-цаһан толв һарч ирхлә, тиигхлә эн ормд проказа гем түгҗәнә. 43Кемр гелң эн күүг хәләһәд гиҗгтнь бәәсн халцха ормд, эс гиҗ өмннь бәәсн халцха ормд проказа гемин бәәдлтә улан-цаһан хавдр үзхлә – тиим гем арсн деер бәәснлә әдл болхла, 44тиигхлә эн күн проказа гемтә, цевр биш. Гелң терүг цевр биш гиҗ тоолх йоста: терүнә толһа деер проказа.
45Проказа гемәр гемтсн күүнә хувцнь шуурха, үснь сарвасн, тер чирәһән сахласн дорагшан бултулх йоста. Тегәд тер хәәкртхә: «Цевр биш, цевр биш!» 46Гемнь эс давтл тер күн цевр биш болх. Тиим күн цевр биш, һанцарн бәәх йоста. Терүнә бәәрн олна бәәрнәс холд бәәтхә.
Хувцн деер бәәх проказа гемин тускар
47Кемр проказа гем шеемг, эс гиҗ олсн эдәр уйсн хувцн деер үзгдхлә, 48олсн, эс гиҗ шеемг эдин утдан бәәх утцн деер, эс гиҗ көндлң утцн деер, арсн деер, арсар уйсн ямаран чигн кегдлмүд деер, 49кемр эн толв хувцн деер, эс гиҗ арсн деер, эдин утдан бәәх утцн деер, эс гиҗ көндлң бәәх утцн деер, ямаран чигн арсар уйсн хувцн деер ноһавр, эс гиҗ улавр өңгтә болхлаг, эннь проказа гем. Эн хувциг гелңд үзүлх кергтә. 50Гелң тер юмиг хәләһәд долан хонгтан терүг күн бичә көндәтхә гиҗ зактха. 51Кемр дола хонад тер толв хувцн деегүр түгсн болхла, эдин утдан бәәх утцн деер, эс гиҗ көндлң бәәх утцн деегүр, эс гиҗ арсар кесн кегдлмүд деегүр ямаран чигн кергтә эс болв, тегәд эн хорта проказа гем, эн юмн цевр биш. 52Толв һарч ирх хувциг, эн утдан бәәх болн көндлң бәәх утцдиг, эн олсн эс гиҗ шеемг эдиг, эс гиҗ арсар кесн кегдлмүдиг, тиигхлә шатах кергтә. Эннь хальдврта проказа гем, олзлсн юмс шатагдх йоста. 53Кемр толв эд деегүр, утдан болн көндлң бәәх утцд деегүр, арсн кегдлмүд деегүр эс түгсиг гелң үзхләрн, 54тиигхлә толв бәәх хувциг уһатха гиҗ гелң зактха. Дәкәд долан хонгтан күн терүг бичә көндәтхә. 55Кемр уһасна хөөн хувцн деерк толв эс икдв чигн өңгән эс геесн болхла, тегәд эн хувцн цевр биш. Терүг шатах кергтә. Тиим толв һазань бәәнү, дотрнь бәәнү йилһл уга, хувцн үрҗ одсн болҗана. 56Кемр уһасна хөөн тер хувцна толвнь цәәҗ одсн болхла, эдин эн әңгинь, эс гиҗ арсинь, эс гиҗ утдан бәәх көндлң бәәх утцдин әңгинь шуулад авчкг. 57Кемр толв шинәс тер юмс деер һарч ирхлә, тиигхлә тер түгҗәдг болҗана. Тегәд толв бәәх хувциг шатах кергтә. 58Болв уһасна хөөн эдәс, утдан бәәх эс гиҗ көндлң утцд, ямаран чигн арсн кегдлмүд деер эн толв һархла, тиигхлә бас шинәс тер юмиг уһатха. Тегәд тернь цевр болх.
59Проказа гем шеемг эс гиҗ олсн, утдан бәәх, эс гиҗ көндлң бәәх утцд деер болн ямаран чигн арсн кегдлмүд деер һарч ирхлә, тернь цевр аль цевр биш гиҗ келх закан болҗана.
Currently Selected:
Левит 13: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
