Левит 14
14
Проказа гемәс эдгснә хөөн күцәх авъясмудын тускар
1Деед Эзн Мошед келнә:
2– Проказа гемәр гемнснә хөөн күн яһҗ бийән цеврлхин туск закан эн. Терүг гелң тал авч иртхә. 3Гелң тер күн тал бәәрнәсн һарч ирх йоста. Кемр гелң гемтә күүнә гемнь эдгсинь үзхлә, 4цеврдхәр седҗәх күүнә төлә 2 цевр шову, хошун модна зорһс, улавр күрң эдин тасрха болн хуссоп авч иртхә. 5Нег шовуг цевр усар дүүргсн шавр буһш деер алтха гиҗ гелң зактха. 6Әмд шовуг хошун модна зорһста, улавр күрң эдин тасрхата болн хуссопта хамднь цевр усар дүүргсн буһш деер алгдсн шовуна цуснд орулад норһтха. 7Тер цусар гелң проказа гемәр гемнснә хөөн цеврлгдҗәх күүг цеврлхин төлә дола дәкҗ цацл цацх йоста. Әмд шовуг гелң сулднь тәвхмн. 8Цеврлгдҗәх күн хувцан уһатха, үсән кевтнь хустха, бийән уһатха. Тегәд тер цевр болх. Терүнә хөөн тер олна бәәрнд орҗ чадҗана. Болв бас долан хонгтан эврәннь шатрт орлго бәәх. 9Дола хонад тер күн үсән кевтнь хусх йоста – толһаһан хусх, сахлан болн күмсгән хусх. Үсән кевтнь хусад, бийиннь хувцан уһаһад, бийән уһасна хөөн цевр болх.
10Нәәмдгч өдр 2 эрмдг уга хурһ, эрмдг уга нег җил күцсн хө болн өдмгин бәрц кехин төлә олив тоснд элдсн ефән арвна һурвдгч әңг буудян цаһан һуйр болн 1 лог#14:10 Лог – литр олив тосна нег һурвнань. олив тос авч иртхә. 11Цеврллһнә авъяс кеҗәх гелң цеврлҗәх күүг Деед Эзнә өмн Харһлтын Шатрин үүднд авч ирсн бәрцтәһинь зогсатха. 12Гелң 1 хурһиг һаруһинь даах бәрц гиҗ 1 лог олив тоснла хамднь авад, тедниг Деед Эзнә өмн өргтхә. 13Хурһиг әрүн ормд алх кергтә. Цеврллһнә болн шаталһна бәрц бәрдг ормд кех. Һару даах бәрц цеврллһнә бәрцлә әдл гелңгин болҗана. Эннь әрүнәс әрүн юмн. 14Һару дааҗах бәрцин цуснас авад гелң цеврлгдҗәх күүнә барун чикнә ашкднь, барун һарин ик хурһнднь, барун көлин ик хурһнднь түрктхә. 15Авч ирсн тосиг гелң зүн һарин атхгдсн альхн деер кеһәд, 16тер альхн деер кегдсн тоснд барун һарин хурһан норһад, Деед Эзнә өмн дола дәкҗ цацл цацтха. 17Альхн дотр үлдсн тосар цеврлгдҗәх күүнә барун чикнә ашкднь, барун һарин ик хурһнднь, барун көлин ик хурһнднь түрктхә. Тер һару даалһна бәрцин цусн деерәһәр олив тос түркг. 18Альхн дотр үлдсн тосиг гелң цеврлгдҗәх күүнә толһа деернь кетхә. Тиигҗ гелң Деед Эзнә өмн гем хәрүллһнә авъяс күцәх.
19Гелң килнцәс цеврллһнә бәрц кетхә. Тегәд гелң эн күүнд гемән хәрүллһнә авъяс күцәх. Терүг тиигҗ цеврлх.
Дарунь шатагдх бәрц алх кергтә. 20Шатагдх болн өдмгин бәрциг гелң тәклин орм деер тәвтхә. Тиигҗ гелң гемән хәрүллһнә авъяс күцәх. Тер күн тегәд цевр болх.
21Кемр күн угатя болад мөңгн уга болхла, һаруһинь даах бәрцд орулх 1 хурһ автха. Гемән хәрүллһнә авъяс күцәхин төлә Деед Эзнд терүг өргтхә. Дәкәд олив тоснд элдсн буудян һуйрин арвна хүвин 1 хүв ефә өдмгин бәрцд орулх болн 1 лог олив тос автха. 22Дәкәд бас 2 көглҗрһн шову эс гиҗ 2 баахн көглҗрһн шову (терүнә чидләр) авч иртхә. Нег шовуһинь килнцәс цеврллһнә бәрц гиһәд, хойрдгч шовуһинь шаталһна төлә гиһәд авч иртхә.
23Эврәннь цеврллһнә нәәмдгч өдр бел кесн тоотан авад гелң тал ирәд, Харһлтын Шатрин үүднд Деед Эзнә өмн зогстха. 24Һаруһинь даах бәрцд орулх хурһиг болн олив тосиг гелң Деед Эзнә өмн өргтхә. 25Тер һаруһинь даах бәрцд орулҗах хурһиг алад, цусинь авад цеврлгдҗәх күүнә барун чикнә ашкднь, барун һарин ик хурһнд, барун көлин ик хурһнд гелң түрктхә. 26Олив тосиг гелң атхсн зүн альхн деерән асхад, 27Деед Эзнә өмн дола дәкҗ альхндан бәәх тоснас барун һарин хурһарн цацл цацтха. 28Альхндан бәәх тосар гелң цеврлгдҗәх күүнә барун чикнә ашкднь, барун һарин ик хурһнднь, барун көлин ик хурһнднь һаруһинь даах бәрцин цусн деерәһәр түркх йоста. 29Альхндан үлдсн тосиг гелң цеврлгдҗәх күүнә толһа деер кех йоста. Тиигҗ Деед Эзнә өмн гемән хәрүлҗәх күүнә авъяс гелң кеҗ күцәнә. 30Тегәд тер күн нег шову бәрцдән орултха (көглҗрһн эс гиҗ баахн көглҗрһн болну, эвәрн хәләтхә). 31Цеврллһнә бәрц гиҗ өгсән өгтхә. Хойрдгч шовуг өдмгин бәрцтә хамднь шаталһна бәрцд орултха. Тиигҗ гелң Деед Эзнә өмн тер күүнә гемән хәрүллһнә авъясиг күцәх. 32Проказа гемәр гемнәд зовҗасн угатя күн гемәсн яһҗ цеврлгдх закан эн болҗана.
Герин эрсмүд деерк проказа гемин тускар
33Деед Эзн Мошед болн Ахаронд келнә:
34– Таднд эзлтхә гиһәд Би Канана һазр өгчәнәв. Тадниг тиигәрән ирхлә, тер һазрт Би нег герт проказа гем хальданав. 35Тиигхлә герин эзн күн гелң тал ирәд келтхә: «Мини герт гем һарсмн бәәдлтә». 36Гелң хәләхәр ирхәсн өмн тер гер дотр бәәсн юмсинь цугтаһинь һарһтха гиҗ зактха. Эс гихлә гер дотрк кевтән бузр гиҗ келгдх. Терүнә хөөн гелң ирҗ гериг хәләҗ чадҗана. 37Кемр гелң эрс деер ноһан, эс гиҗ улавр толв үзхләрн, тенд хотхр ормс һарсн болхла, 38тиигхлә герин эркнәс һарад эн герт долан хонгтан күн бичә ортха гиҗ зактха. 39Кемр гелң доладгч өдртән ирәд, толвс эрс деегүр түгсиг үзхләрн, 40тиигхлә толвта чолудыг хамхлҗ авад, балһснас һарһад бузр һазрт хайтха. 41Гер дотркиг кевтнь хусх кергтә. Хусгдсн шавриг балһснас һарһад бузр һазрт хайтха. 42Чолуд хамхлҗ авсн ормиг шин чолуд тәвәд шалдтха.
43Кемр чолуд хамхлад авсна хөөн, гер кевтән хусгдад, шинәс шалдгдсна хөөн толв дәкн гер дотраһар түгсн болхла, 44гелң ирәд толв түгсиг үзнә. Эн герт хорта проказа бәәдг болҗана, гер цевр биш. 45Эн гериг хамхлх кергтә. Терүнә чолудыг, бахнсиг болн шалдвринь балһснас һарһад бузр һазрт хайхмн болҗана.
46Бичә ортха гиҗәсн цагт тер герт орсн күн асхн күртл цевр биш. 47Тер герт хонсн күн эврәннь хувцан уһах зөвтә. Тенд хот идсн күн бас хувцан уһах зөвтә.
48Кемр гелң ирәд шинәс шалдгдсн гер үзхләрн, толвс эс һарчахлаг тер гериг цевр гиҗ келх. Гем һарч одҗ. 49Гериг цеврлхин төлә гелң 2 шову, хошун модна зорһс, улавр күрң эдин тасрха болн хуссоп авх. 50Нег шовуг цевр усар дүүргсн шавр буһш деер алтха. 51Дәкәд хошун модна зорһс, хуссоп, улавр күрң эдин тасрха болн әмд шовуг авад, цевр уснла холяд, алгдсн шовуна цуснд булхулад, дола дәкҗ цацл герт цацтха. 52Шовуна цусар, урсхл усар, әмд шовуһар, хошун модна зорһсар, хуссопар болн улавр күрң эдин тасрхаһар гериг цеврлчкәд, 53гелң әмд шовуг балһснас һарһад сулднь тәвх йоста. Тиигҗ тер гемән хәрүллһнә авъяс күцәх, тиигхлә гер цевр болх.
54Ямаран чигн проказа гемин, цар гемин туск закан тиим. 55Проказа гем хувцн деер болн эрс деер, хавдр болну, бүрлдлһн болну, цаһан толв болну, эднә закан тиим. 56Цевр бишинь эс гиҗ цевринь тиигҗ йилһҗ авдг чигн. Проказа гемин закан тиим.
Currently Selected:
Левит 14: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
