Нүүдл 39

Гелңгүдин хувц уйлһн

1Көк, чисм улан болн улавр күрң утцнас әрүн бәәрнд мөрглһнд орх хувц кенә. Тиим әрүн хувц Ахаронд некҗ өгнә. Деед Эзн Мошед заквр өгсәр тедн мел тиигҗ кев.

2Алтнас, көк, чисм улан болн улавр күрң утцнас болн нимгн олснас заппу кенә. 3Энүнә төлә алтыг нимгләд утц кеһәд, тер утциг көк, чисм улан, улавр күрң утцнла ниилүлв, дәкәд нимгн олснас сиилвртә эд некҗ кенә. 4Заппун үзг болһнас ээм һарһҗ уйна. 5Заппун бүс бас заппун бәәдлтәһәр нег кевәр некгдв: алтн утцар, көк, чисм улан, улавр күрң утцар болн нәрхн олсар. Деед Эзн Мошед заквр өгсәр тер мел тиигҗ кев.

6Оникс чолуд бел кецхәв. Теднь алтар кесн сиилвртә кевд тәвгдв. Тер чолудт, тамһд бәәснлә әдләр, Израилин көвүдин#39:6 Израилин көвүд эс гиҗ Яковин көвүд. нерд керчгдсн бәәҗ. 7Тедниг заппун ээм деернь тәвв. Эн чолуд Израилин көвүдин туск тодлвр болтха гисн темдг болҗана. Деед Эзн Мошед заквр өгсәр тер мел тиигҗ кев.

8Заппула әдл чееҗд өлгдг түңгрцг кев. Тернь бас алтн утцнас, көк, чисм улан, улавр күрң утцнас болн нәрхн олснас сиилвртәһәр некгдв. 9Чееҗд өлгдг түңгрцг дөрвлҗн бәәдлтә, нег сөм утдан, нег сөм өргндән хойр давхрлад эвксн эдәр кегдҗ. 10Терүн деерәһәр 4 зерглән үнтә чолуд бәәнә. Түрүн зергләнднь сердолик, топаз, берилл; 11хойрдгч зергләнд бирюза, сапфир, изумруд; 12һурвдгчднь – гиацинт, агат, аметист; 13дөрвдгчднь – хризолит, оникс болн яшма. Чолуд цугтан сиилвртә алтн кевд тәвгдҗ. 14Израилин көвүдин нертә чолуд тооһарн 12 болв. Чолун болһн деер тамһла әдл Израилин 12 отгин неҗәһәд нер керчәд батлҗ.

15Чееҗ деерк түңгрцгин төлә цевр алтар эрчм орулгдсн бүчлә әдл олн цев кегдҗ. 16Хойр алтн сиилвртә кев кегдв. Хойр алтн төөлг кеһәд түңгрцгин өнцгүдәр өлгв, 17тедниг хойр алтн цевәр 18хойр кевд негдүлв, тедниг заппун ээм деер өмнәснь өлгв. 19Бас хойр алтн төөлг кев. Тедниг чееҗд өлгдг түңгрцгин хойр өнцгин дотраснь заппуд наалддг бийәснь өлгв. 20Бас 2 алтн төөлг кеһәд өмн бийәснь ээмин көвән захд өлгв. Тернь заппун бүсин деер уйгдҗ. 21Чееҗд өлгдг түңгрцгин төөлгүд заппун төөлгүдлә көк боодһаһар боогдҗ. Тегәд заппун бүс деер бәәхләрн тер заппуһас ундгоһар кегдв. Деед Эзн Мошед заквр өгсәр тедн мел тиигҗ кев.

22Заппу дор өмсдг хувциг мел көк утцар некв. 23Тернь бичә шууртха гиһәд терүнд бат көвәтә малтар бәәнә. Тернь мел дәәчнрин хувцна бәәдлтә. 24Деерк хувцна дор көвәһәр көк, чисм улан болн улавр күрң утцар, нәрхн олсар гранатын темснә бәәдлтә бичкн долдас кев. 25Цевр алтар хоңхс кеһәд гранат дунд дор көвәһәрнь өлгв. 26Мөргүлин төлә кесн хоңхс болн гранатын темсд деерк хувцна дор көвәһәр селгәһәр сольгдв. Деед Эзн Мошед заквр өгсәр тедн мел тиигҗ кев.

27Ахарона болн терүнә көвүдин төлә олсн утцар киилг некҗ өгв, 28олсн эдәс тахъя болн толһад боодг олсн боодһас, нимгн олсн эдәс шалвр кеҗ өгв. 29Нимгн олсар, көк, чисм улан болн улавр күрң утцдар олн өңгтә бүс некҗ өгв. Деед Эзн Мошед заквр өгсәр тедн мел тиигҗ кев.

30Әрүн ормд титм кев – цевр алтнас темдг. Терүн деер, тамһ деер керчәд кеснлә әдләр, иигҗ бичгдв: «ДЕЕД ЭЗНӘ ӘРҮН ТЕМДГ». 31Терүнд тахъя деерәһәр боох көк боодһа уйҗ кев. Деед Эзн Мошед заквр өгсәр тер мел тиигҗ кев.

Өргә гер бәрлһнә көдлмш төгсәлһн

32Тегәд өргә гер бәрлһнә көдлмш төгсв – Харһлтын Шатр бәргдв. Израилин улс Мошед Деед Эзнә заксар цугинь дигтә кевәр күцәв. 33Тедн Мошед өргә гер, бүркә болн цуг кергтә тоотынь – бүтүс, тулг бахнс, көндлң модд, бахнс, түшгүд, 34бас хуцин ширдсн арсн бүркә, нимгләд кесн арсн бүркә болн халхлх көшг, 35Бооцана хәәрцг, терүнә ут модд, бүркә, 36ширә болн терүнд тәвх сав, Деед Эзнә өмн оркх әрүн өдмг, 37цевр алтар кесн герлин гегән болн терүн деер тәвх цөгцс, терүнд кергтә тоотс болн терүнд кергтә тосн, 38алтн ширә, түркдг тос, шатадг күҗ, Шатрт орх үүднә көшг, 39улан мөңгн тәкл тәкдг орм улан мөңгн термтәһән, терүнә ут модд болн терүнд кергтә тоот сав, тулгта ик сав, 40хашан көшг, терүнә бахнс болн терүн дор тәвх түшг, хашан үүднә көшг, деесд болн бичкн һасн, мөргүл кехлә кергтә тоотыг өргә герт – Харһлтын Шатрт. 41Бас әрүн бәәрнд мөргүл күцәх әрүн хувцд: гелң Ахаронд болн терүнә көвүдт. 42Деед Эзнә Мошед заасар мел цугтаһинь Израилин улс күцәв.

43Моше теднә кесиг эргәд хәләв. Цугнь мел Деед Эзнә келсәр дигтәһәр кегдв. Моше теднд әдсән күргв.

Currently Selected:

Нүүдл 39: ХКО_ӘБ

Highlight

Copy