Нүүдл 38

Тәкл шатадг орм келһн

1Акация моднас Бецалел тәкл шатадг дөрвлҗн орм кев – утдан тавн тоха, өргндән тавн тоха, өндртән болхла һурвн тоха. 2Дөрвн өнцг деернь дөрвн өвр кев – тернь тәклин ормла нег бәәдлтә болад ниилв. Терүгән тер улан мөңгәр будв. 3Тәкл тәкдг ормд тәвх кергтә тоотыг олар кев: сав, бичкн күрз, цус авдг сав, мах бәрдг серә болн һал һарһдг сав. Энүг цугтаһинь улан мөңгәр кев. 4Тәкл тәкдг ормд улан мөңгәр терм кев. Терүг захин дор тал дунднь күрдгәр тәвв. 5Ут моддын төлә дөрвн төөлг цутхад, терүгән улан мөңгн термин дөрвн бийднь батлв. 6Ут моддыг болхла, акация модар кеһәд улан мөңгәр һадрлв. 7Ут моддыг тәкл тәкдг ормин хәврһәрнь бәәсн төөлгүдт өргхд эвтә болтха гиһәд тер орулв. Тәкл тәкдг орм тегш модар көндәһәр кегдв.

8Бецалел ик сав кеһәд дорнь тулг тәвв. Харһлтын Шатрин үүднд церглҗәсн күүкд улсин нүр үздгин улан мөңгн кевтән тер савд орулгдв.

Өргә герин хаша келһн

9Дәкәд тер хаша кев. Өмн үзгәснь нимгн олсн эдәр кегдсн көшг утдан 100 тоха болв, 1020 улан мөңгн түшгтә 20 бахнст тер көшгиг өлгв. Бахнст хадгдсн дегәс болн ниилврнь цаһан мөңгәр кегдв. 11Ар үзгәснь өлгсн көшг утдан 100 тоха болв. Тернь 20 бахн, 20 улан мөңгн түшгтәһәр кегдв. Бахнс деер бәәх дегәс болн ниилврнь цаһан мөңгәр кегдв. 12Хашан барун үзгәснь утдан 50 тоха көшг өлггдв. Тернь 10 бахнста болн 10 түшгтә болв. Бахнст өлггдсн дегәс болн ниилврнь цаһан мөңгәр кегдв. 13Зүн үзгнь утдан 50 тоха. 14Терүнә үүднә нег бийәснь утдан 15 тоха көшг 3 түшгтә 3 бахнс тәвгдв. 15Хашан үүднә талдан бийднь утдан 15 тоха көшг 3 түшгтә 3 бахнс тәвгдв. 16Хашан эргндк көшг кевтән нимгн олсн эдәр уйгдв. 17Бахнс дор тәвгдсн түшгүд улан мөңгәр, бахнс деер хадсн дегәс болн ниилврнь цаһан мөңгәр кегдв. Бахнсин дееркнь цаһан мөңгәр бүркгдв. Хашан бахнс цугтан цаһан мөңгәр ниилгдв. 18Үүднд өлггдсн көшг олн өңгтәһәр кегдв: көк, чисм улан, улавр күрң утцдар болн нәрхн олсар некгдв, утдан 20 тоха болв. Хашан көшг мет тер өндртән 5 тоха. 19Үүднә өөр 4 улан мөңгн түшгтә 4 бахн бәәҗ; бахнст бәәсн дегәс цаһан мөңгәр кегдҗ. Деерәһәрн бахнс цаһан мөңгәр будата, ниилврнь бас цаһан мөңгн. 20Өргә герин бичкн һасн болн хашан эргндк көшгин бичкн һасн улан мөңгәр кегдҗ.

Тосхлтын төлә олзлгдсн тоотс

21Бооцана өргә герт һарһсн һару иим болв. Эннь Ахарона гелң көвүн Итамарин һардврт Мошен зааврар левитмүд кев. 22(Бецалел – Урин көвүн, Хурин ач – Иудан отгас – тер Бецалел Деед Эзнә заасиг Мошеһәр дамҗад цугтаһинь күцәв. 23Терүнлә Дан гидг отгас Ахисамахин көвүн Оголиав болна. Тер сиилвр һарһдг урч бәәҗ, бас зүсн-зүүл сиилвртә эд көк, чисм улан, улавр күрң болн нәрхн олсн утцдар некдг эрдмтә бәәҗ.)

24Әрүн бәәр бәрхин төлә һарһсн алтн – авч ирәд бәрц бәрсн – 29 талант болн 730 әрүн бәәрнә шекель болв.

25Отгин улсиг тоолхд цуглулсн цаһан мөңгн 100 талант болн 1 775 әрүн бәәрнә шекель болв: 2620 настаһас деегшән тоолсн күн болһна – 603 550 күн – неҗәһәд бека (әрүн бәәрнә шекелин өрәлинь) авв.

27Әрүн бәәрнә бахнсин түшг болн терүнә көшгин бахнс цутххин төлә 100 талант орв: 100 түшгт 100 талант, неҗәһәд талант түшг болһнд. 28Миңһн долан зун далн тавн цаһан мөңгн шекель бахнсин дегәд болн ниилврт орулгдв, бахнсин дееркиг цаһан мөңгәр будлһнд бас орв.

29Бәрц бәрәд бәәсн улан мөңгн 70 талант болн 2 400 шекель күрв. 30Терүнәс Харһлтын Шатрин үүднд бәәсн бахнсин түшг, улан мөңгн термтә тәкл тәкдг орм болн кергтә тоотнь кегдв, 31хашан эргндк көшг татх бахнсин түшгт болн хашан ик үүднә төлә, бас өргә герин бичкн һаснд болн хашан эргндк көшгин бичкн һаснд улан мөңгн орулгдв.

Currently Selected:

Нүүдл 38: ХКО_ӘБ

Highlight

Copy