Нүүдл 37

Бооцана хәәрцг келһн

1Акация модар Бецалел хәәрцг кенә. Тернь утдан хойр дундур тоха, өргндән – күсдундур, өндртән – күсдундур, 2һазаһаснь болн дотраснь терүг цевр алтар будад, захинь алтар эрәлв. 3Дөрвн алтн төөлг кеһәд тер теднән хәәрцгин дөрвн көлднь наана: хойр төөлг хәәрцгин нег бийәснь, хойр төөлг талдан бийәснь. 4Акацияс тер ут модд кеһәд алтар будна. 5Теднән хәәрцгин хойр таласнь төөлгт орулна, ут моднд терүг авч йовхд амр болтха гиҗ кенә.

6Хәәрцгин бүркәһинь цевр алтар кенә. Утдан тернь хойр дундур тоха, өргндән күсдундур тоха болв. 7Бүркән захарнь тер хойр керүбин дүр алтар сииләд кев: 8негнь нег бийәснь, хойрдгчнь – хойрдгч таласнь. Тернь бүркәлә нииләд нег бәәдлтә болв. 9Нег-негнәннь чирә нүүрцәд зогсад бүркә хәләхләрн, тедн деернь җиврән делнә.

Әрүн өдмг тәвдг ширә келһн

10Бецалел акацияс ширә кенә, хойр тоха утдан, нег тоха өргндән болн күсдундур тоха өндртән, 11терүгән цевр алтар будад алтн тасм кев. 12Ширән захарнь рамк кев, өргндән альхн дүңгә, эн рамкд алтн тасм һарһв. 13Бецалел дөрвн алтн төөлг кеһәд ширән дөрвн өнцгтнь көл деернь батлна, 14кемр ширәг көндәхлә, гиигн болтха гиһәд эн төөлгүдт ут мод орулдгар кенә. Төөлгүд ширән рамк түшнә. 15Акация моднас тер ширә өргдг ут модд кенә, теднән алтар будна. 16Ширә деер тәвх ааһ-сав цевр алтар кенә: тәрлкс, шанһс, шалдрң юм кехин төлә ааһс болн буһшс.

Өргә герт герлин гегә келһн

17Герлин гегә цевр алтар сииләд кев. Терүнә һол моднь, ацнь болн үйнь – теднә уңгнь болн цецгин делвснь – бүклдән негднә. 18Герлин гегәнә бәәрнд зурһан ац бәәлә: нег бийәснь һурвн, хойрдгч таласнь – һурвн. 19Зурһан ац болһнднь һурваһад үй – миндалин цецг мет – һол модта, цецгин делвстә. 20Герлин гегәнә көл деернь дөрвн цецг бәәлә, теднь миндалин цецг мет һол модта болн делвстә. 21Түрүңк хойр ац дор – үйин йорал, хойрдгч хойр ац дор – үйин йорал, һурвдгч хойр ац дор – үйин йорал; зурһан ац дор кевтән иим билә. 22Үйин йорал болн ацмуд цугтан герлин гегәнлә нег бәәдлтә болв; цугтан цевр алтнас кегдв. 23Бецалел долан цөгц, цевр алтар шамин һол ясдг кесг чимкүр болн күҗин кесг сав кенә. 24Герлин гегәнә болн терүнд кергтә тоотст нег талант цевр алтн орв.

Күҗ уңһдадг ширә болн әрүн тос бел келһн

25Акация моднас күҗ шаталһна төлә бәрцин ширә кев: утдан нег тоха, өргндән нег тоха болн хойр тоха өндртән. Ширән өврнь терүнлә мел ниилв. 26Терүнә дееркинь, үзг болһинь болн өвринь тер цевр алтар будв, эргүләд алтн тасм кегдв. 27Хойр алтн төөлг кеһәд тасмин дор, захарнь тер батлв. Терүнд ут модд орулад ширәг көндәһәд йовдгар кев. 28Ут моддыг акация моднас кеһәд алтар тер ширдв.

29Бецалел тос түрклһнә йовдл күцәхин төлә әрүслсн тос болн арһтаһар цевр күҗ белдв. Терүг шатахла сән үнр һарна.

Currently Selected:

Нүүдл 37: ХКО_ӘБ

Highlight

Copy