Нүүдл 34

Шин хавтха чолуд болн олн зааврмуд

1Деед Эзн Мошед келнә:

– Хойр хавтха чолуһин өөһинь авад, өмн кеснләһән әдл ке. Би тедн деер урднь чини хамхлсн чолудт бичснлә әдл үгмүд бичнәв. 2Өрүн күртл белн бол. Өрүндән Синай уул деер һарад Мини өмн уулын ора деер зогс. 3Чамла нег чигн күн бичә йовтха, нег чигн күн уул деер бичә үзгдтхә, мал чигн уулын девсңд бичә идшлтхә.

4Моше урдклаһан әдл хойр хавтха чолу кеҗ авад, өрүн өрлә тедниг һартан бәрсн Деед Эзнә келсәр Синай уул деер һарна. 5Деед Эзн үүлнд бууна, Мошен өмн зогсад Яхве гиҗ нерән зәңглнә. 6Деед Эзн терүнә өмнәһүр йовад иигҗ келнә:

– Яхве, Яхве – Бурхн хәәрлтә болн сән седклтә, тесвртә, өр-өвч болн итклтә! 7Терүнә өр-өвчнь миңһдгч үйдән хадһлгдна: һарһсн гемиг, килнциг болн буру йовдл һарһсиг Тер тәвҗ өгнә. Зуг гем һарһсиг Тер гем уга гиҗәхш: эцкин һарһсн килнцәс көлтә теднә көвүдиг һурвдгч, дөрвдгч үйднь күрәд засглна!

8Моше адһмтаһар сөгдәд, түргүр унад 9келнә:

– Мини Эзн! Кемр би Танд тааста болхла, Мини Эзн, маднла йовтн! Эн келн-улс зүткә, болв мадна килнциг болн буру йовдлыг тәвҗ өгтн! Мадниг Эврәннь үлмәд орулҗ автн!

10Деед Эзн иигҗ хәрү өгнә:

– Би таднла бооца кенәв. Цуг әмтнә өмн һазр деер болад уга өвәрц йовдл Би үзүлнәв. Нег чигн келн-улст тиим юмн болад уга! Чини эргнд бәәх цуг келн-улс чамар дамҗад Би, Деед Эзн, кеҗәх кергиг әәҗ хәләтхә! 11Мини таднд закч келҗәх тоотыг күцәтн. Би амореймүдиг, кананахныг, хетмүдиг болн перизмүдиг, хивеймүдиг болн евүсмүдиг таднас көөнәв. 12Хәләтн, тер одх һазрин бәәрн улсла бичә бооца кетн. Энтн таднд бәрән болх! 13Теднә тәкл тәкдг ормиг хамхлтн! Теднә әрүн чолудыг күүлтн! Ашеран#34:13 Ашера – Канана олн әмтнә бурхн – күүкд күн гидг бурхн. модна бахнсиг чавчтн! 14Талдан әмтнә бурхнд бичә мөргтн! Яһад гихлә Деед Эзнә нерн – Харллһн! Тер – хару Бурхн!

15Тер һазра келн-улсла бичә бооца кетн. Тедн эврәннь бурхдтан шүтнә – тедндән бәрц бәрнә. Кемр тедн тадниг дуудхла, теднә тәкл тәксн бәрцәснь идхит. 16Теднә күүкд эврә бурхдтан мөргнә. Кемр тадн теднә күүкдиг көвүдтән мордулҗ авхла, тиигхлә тедн тана көвүдиг бас тиим йовдлд орулх.

17Цутхсн бурхна кегдл бийдән бичә кетн.

18Эс искәсн һуйрин нәәриг кетн: долан хонгтан Мини закч келсәр эс искәсн һуйр идтн. Нерәдсн цагт, авив сард, нәр кетн. Яһад гихлә авив сард Египетәс тадн һарлат.

19Эк болһна түрүн һарсн үрн Мини болҗана – бод болн үүрмг малас һарсн эр зүстәнь Мини! 20Элҗгнә түрүн туһлын алв хөөһәр өгәд хулдҗ автн. Кемр хулдҗ авшгоһар седҗәхлә, терүнә күзүһинь нуһлтн. Эврәннь түрүн көвүдин төлә бас авлһ өгтн. Нег чигн күн Мини өмн хоосн һарта ирҗ чадшго!

21Зурһан хонгтан көдлтн, доладгч өдртән амртн: һазр хаһлҗах болну, эс гиҗ тәрә хураҗах цагт болну көдлмшән зогсаһад амртн.

22Долан хонгин нәр кетн – буудян түрүн хадлһна нәр. Темс цуглулҗ авлһна нәр җилин чилгчәр кетн. 23Җилд һурв дәкҗ танад залус цугтан Эзн Яхвен өмн – Израилин Бурхна өмн үзгдх йоста. 24Кемр тадн җилд һурв дәкҗ Деед Эзнә – тана Бурхна – өмн мөргхәр ирәд бәәхлә, Би таднас талдан улсиг көөнәв, тадна меҗәг икдүлнәв, нег чигн күн тадна һазр тал өөрдшго.

25Нанд тәкл тәкхләрн, бәрцин цусн исксн өдмг деер бичә асхртха. Песахин нәәрин өдр авч ирсн бәрциг өрүн күртл бичә үлдәтн.

26Эврәннь һазрин түрүн урһцас эврәннь Бурхна – Деед Эзнә – герт авч иртн.

Ямана ишкиг экиннь үснд бичә чантн.

27Деед Эзн Мошед келнә:

– Эн үгмүд бичҗ ав: энүгәр ул кеһәд чамта болн Израильта бооца кеҗәнәв.

28Моше Деед Эзнлә дөчн өдр болн дөчн хонгтан бәәв, өдмг идсн уга, ус уусн уга. Хавтха чолуд деер бооцана учринь Моше бичв – Арвн Заавр. 29Моше Синай уул деерәс буухла, терүнә һарт Бооцана хойр хавтха чолуд бәәҗ.

Мошен чирә герләр гилвкнә

Деед Эзнлә күүндснә дару чирәһәсн герл һарчахиг Моше медсн уга. 30Болв Ахарон болн Израилин улс терүг үзәд өөрдхәсн әәцхәв. 31Моше тедниг дуудна. Ахарон болн хамцана һардачнр өөрднә, Моше теднлә күүнднә. 32Дарунь Израилин наадк улс өөрдәд ирнә. Моше теднд Синай уул деер Деед Эзнә өгсн заавриг цугтаһинь келҗ өгнә. 33Болв Моше теднлә күүнддгән уурхларн, чирәһән бүркәһәр бүркнә. 34Деед Эзнлә өөрдәд күүндх саам ирхлә, Моше бүркәһән чирәһәсн авна. Хәрү ирхләрн Деед Эзн терүнд ю даалһсинь Израилин улст келҗ өгнә. 35Тер кемд Израилин улс Мошен чирәһәс герл һарчахинь үзнә. Деед Эзнлә күүндх саам иртл Моше шинәс чирәһән бүркдмн.

Currently Selected:

Нүүдл 34: ХКО_ӘБ

Highlight

Copy