Нүүдл 35

Бемб өдрин тускар

1Израилин улсин хамцана цуг әмтиг хураһад Моше келв:

– Деед Эзн иим заавр өгв: 2«Зурһан хонгтан көдлтн, доладгч өдртән – Деед Эзнә әрүн төвкнүн бәәлһнә бемб өдр. Эн өдр көдлсн күн алгдх. 3Тадна гермүдт бемб өдрлә нам һал чигн шатаҗ болшго».

Өргә герт туста тоот

4– Деед Эзн тиим юм зааҗана, – гиҗ Моше Израилин хамцана улст келв. – 5Деед Эзнд бәрц бәртн. Эврәннь дурарн бәрц бәрхәр седҗәх күн Деед Эзнд алт, цаһан мөңг эс гиҗ улан мөңг, 6көк, чисм улан болн улавр күрң утцд, нимгн олс эс гиҗ ямана ноос, 7ширдсн хуцин арс болн нимглсн арс, акациян мод, 8герлин гегәнд кех олив модна тос, түркх тосна төлә болн ута һарһлһна төлә сәәхн үнртә каңкнсн юмсуд, 9оникс нертә чолуд болн үнтә чолуд кевд орулад теднәр заппу болн чееҗд бәрдг түңгрцг кеерүлх тоотсар бәрц бәртхә.

10Тадна эрдмтә әмтн ирәд Деед Эзнә закч келсн тоотыг күцәтхә: 11өргә гер, терүнә бүркә болн терүн деерәһәр бүркә, товчлх бүтү, тулг бахнс болн көндлң модд, бахнс болн түшг, 12Бооцана хәәрцг болн ут модд, терүг хаах бүркә болн халхлх көшг, 13ширә, терүнә ут модд болн савмуд, Деед Эзнә өмн тәвдг әрүн өдмг, 14герлин гегә болн терүнд кергтә тоотыг, цөгц, герлин гегәнә тос, 15күҗ уңһдах ширә болн терүнд кергтә ут модд, түркх тос болн ута һарһлһна күҗ, өргә герин үүднд көшг, 16улан мөңгн термтә тәкл тәкдг орм, терүнә ут модд болн сав, ик сав тулһтаһинь, 17хашан көшг, терүнә бахнс болн дорнь тәвх түшг, хашан үүднә көшг, 18өргә герин бичкн һасн болн хашан эргндк көшг кехин төлә бичкн һасн, терүнә деесд, 19әрүн бәәрнд мөрглһнә хувц – Ахарон гелңгин болн терүнә көвүдин әрүслгдсн хувцд кетхә.

20Тегәд Израилин хамцана улс кевтән Мошеһәс салҗ тарв. 21Дәкәд күн болһн зүркн туссиг, Деед Эзнд бәрц бәрхәр седсән авч ирв. Тедн цугтан Харһлтын Шатрт, терүнд мөрглһнә болн әрүслсн хувцдын төлә кергтә юмс авч ирв. 22Ирхәр седсн әмтн цугтан ирнә, залус болн гергд ке алтн кегдлмүд авч ирв: дегә, сиик, билцгүд, күзүнд зүүдг кеерүл. Эн алтыг Деед Эзнә өмн белг гиҗ өргв. 23Зәрмснь олдсн көк, чисм улан, улавр күрң утц, нимгн олс, ямана ноос, ширдсн хуцин арс болн нимглсн арс авч ирв. 24Деед Эзнд зәрмнь цаһан мөңг болн улан мөңг авч ирв. Кергт орулгдх олдсн акациян мод чигн бәрц бәрхәр авч ирв. 25Дамшлтта күүкд улс ээрәд көк, чисм улан, улавр күрң өңгтә утцд болн нимгн олс авч ирв. 26Талдан гергд ээрч чаддгнь, ээрхәр седдгнь ямана ноос ээрв. 27Хамцана һардачнр кевд орулх оникс чолуд болн үнтә чолуд теднәр заппу болн чееҗд өлгдг түңгрцг кеерүлхәр авч ирв. 28Тедн сән үнртә тос, бас олив модна тос герл өгхин төлә, түрклһнә авъяс күцәхәр, ута һарһхар авч ирцхәв. 29Тегәд Израилин келн-улсин залус болн гергд Мошеһәр дамҗад Деед Эзнә зааҗ келсн кергт орлцхар Бурхнд эврәннь седвәрәр белгән авч ирцхәв.

Өргә гер бәрх көдлмшчнриг шиидлһн

30Моше Израилин улст иигҗ келнә:

– Медәд авчктн: Деед Эзн Бецалелиг йилһҗ авв (тер Йудан отгас Урин көвүн болн Хурин ач бәәҗ). 31Терүг Бурхна Сәкүсәр дүүргв, цецн уха болн серл, медрл болн ямаран чигн керг күцәх дамшлт өгв. 32Тегәд тер алтар, цаһан мөңгәр, улан мөңгәр көдлмш кедг эрдмтә болв. 33Тер кегдлд орулҗ тәвдг чолу керчҗ чадна, бас мод керчҗ ямаран чигн нәрн көдлмш кедг болв. 34Деед Эзн терүнд болн бас Ахисамахин көвүн Оголиавд – Дана отгас – талдан әмт сурһҗ чаддг эрдм өгв. 35Деед Эзн теднд керчдг, эд сиилвртәһәр некдг, зүсн-зүүл өңгтә көк, чисм улан, улавр күрң утцас болн нимгн олснас некдг, бас йирин эдәр кеҗ чаддг эрдмчнрин болн урн әмтнә эрдминь кевтнь үзүлв.

Currently Selected:

Нүүдл 35: ХКО_ӘБ

Highlight

Copy