Нүүдл 32
32
Алтн туһлд шүтлһнә килнц
1Моше уул деерәс эс бууҗахиг әмтн медв. Тегәд тедн Ахарониг бүслҗ зогсад терүнәс некнә:
– Нә, ода маднд бурх кеҗ өг, тер мадниг дахулад йовтха. Египетәс мадниг дахулҗ һарсн күн – Моше – терүнлә юн болсинь бидн медхшвидн!
2Ахарон теднд иигҗ келнә:
– Гергдиннь, көвүдиннь, күүкдиннь чикнәс алтн чимкәринь авад нанд өгтн.
3Әмтн чикнәсн алтн сиикән авад Ахаронд өгцхәнә. 4Ахарон теднинь авад хәәләд бүрүһин дүрстә кегдл кенә. Әмтн нег-негндән келнә:
– Израиль, эн тадна Бурхн! Эн тадниг Египетәс дахулҗ һарһла!
5Энүг үзҗәсн Ахарон туһлын кегдлин өмн тәкл тәклһнә орм кеһәд келнә:
– Маңһдур Деед Эзнә нәр!
6Маңһдуртнь өрүһәр тедн бәрц бәрх тоотыг авч ирәд шатана, эвцлһнә бәрциг бас авч ирнә. Дарунь тедн идәд, ууһад, байртаһар дөгәд нәәрлнә.
7– Уул деерәс шулуһар бу, – гиҗ Деед Эзн Мошед келнә. – Чини Египетәс дахулад һарһгдсн әмтн йир андрсн, ичр-һутр уга болҗ одҗ! 8Мини зааһад орулсн хаалһас ямаран түргәр тедн хаҗив! Тедн бийдән цутхсн бүрүһин көшә кецхәв, тедн эн көшәдән шүтҗәнә, терүнд бәрц бәрҗәнә. Иигҗ келнә: «Эн тадна Бурхн, Израиль! Эн тадниг Египетәс дахулҗ һарһв!»
9Деед Эзн Мошед келнә:
– Эн әмтн буцдг заңта бәәсинь меднәв! 10Тегәд бичә нанд харшл. Эврәннь цухлан эдн деер асхад, эдниг алнав. Чамас Би алдр әмт һарһнав!
11Болв Моше Деед Эзиг, эврәннь Бурхиг, эрәд сурна.
– Деед Эзн! – гиҗ тер келнә. – Ю хәәҗ Та Эврәннь әмтнд цухлан һарһхмнт, Та Эврән тедниг Египетәс Эврәннь алдр чидләрн, Эврәннь күчтә һарарн һарһлат? 12Эврәннь әмтиг уул дотр алгдтха гиһәд, һазр деер дәкҗ бичә бәәтхә гиһәд Та тедниг дахулад һарһлат гиҗ Египетин улсар ю хәәҗ келүлнәт? Цухлан бичә үзүлтн, хәәрлтн, Эврә әмтән бичә алтн! 13Бийиннь мухласан – Абрахамиг, Ицхакиг болн Израилиг#32:13 Эс гиҗ Яковиг. санлт, теднд Та Бийәрн андһар өгләт: «Тадна үйнр тооһарн олн болх – теңгртк одн мет. Мини өгх һазриг мөңкинд үйнртн эдлх гиҗ үгән өгчәнәв».
14Деед Эзн санань зовад, Эврәннь әмтән засглхар седҗәһәд зогсв.
15Моше эргәд уул деерәс бууҗав. Терүнә һарт Бооцана хойр хавтха чолуд бәрәтә. Терүн деернь өмн ард бийднь бичг бичәтә. 16Тер хавтха чолуд Бурхн Эврән кесмн болҗана. Терүн деерк бичвр бас Бурхн Эврән бичсмн болҗана – бичгиг керчәд кеҗ.
17Тегәд дор бәәх әмтн ямаран шууга татҗахинь Ешуа соңсна.
– Бәәсн сүүр деер ноолдана шууган! – гиҗ тер Мошед келнә.
18Моше иигҗ хәрү өгнә:
– Энтн диилврин шууган биш, энтн диилгдснә шууган биш! Энтн нәәрин дууна ә!
19Сүүр тал өөрдхләрн Моше бүрүһин дүрстә кегдл үзнә, биилҗәх әмтиг үзнә. Моше уурлад уулын көлд хавтха чолуд хаяд теднән хамхлна. 20Бүрүһин кегдлиг шатаһад, үүләд тоос кенә. Тоосиг уснд хаяд Израилин улст тер усиг уулһна.
21– Иим күнд килнцд орулдгарн эн әмтн ю кев чамла, бурута болҗахмб? – гиҗ Моше Ахаронас сурна.
22Ахарон иигҗ хәрү өгнә:
– Бичә уурлад бә, мини эзн! Чи эврән меднәлмч эн әмтн хар саната йовдл һарһдгинь… 23Тедн нанд келлә: «Маднд бийән дахулх дүңгә бурх кеҗ өг. Мадниг Египетәс дахулҗ һарһсн күн – Моше – терүнлә юн болсинь бидн медҗәхшвидн!» 24Тиигхлә би теднд келв: «Алтн кегдлмүд бәәхлә, терүгән тәәлтн». Теднән нанд өгцхәв, би алтыг һалд хайв… Аштнь эн бүрүһин дүрстә кегдл болҗ һарв…
25Ахаронас көлтә әмтн хөрлт уга болцхасиг Моше үзнә. Дәәснәннь тав деер һарһад Ахарон эднд ичр-һутран, әәмшгән мартхд зөв өгв. 26Моше бәәрнд орхинь өмн зогсад, дуудвр кенә:
– Деед Эзнлә кен? Нан тал иртн!
Терүг эргәд Левин хөөт үйнр цугтан цуглрад зогсв. 27Моше теднд келнә:
– Иигҗ Израилин Бурхн Деед Эзн келҗәнә: «Үлдән авад бәәрн дундаһар йовад хәрү эргтн! Күн болһн эврәннь ахан, эврәннь нәәҗән, өөрхн улсан алтха!»
28Левин көвүд Мошен заквриг күцәнә: тер өдр 3 000 шаху әмтн алгдв. 29Моше теднд иигҗ келнә:
– Тадн эндр бийән Деед Эзнә гелңд нерәдвт – көвүнәннь әмәр, ахиннь әмәр. Тегәд тадниг Деед Эзн әдслх!
30Маңһдуртнь Моше әмтнд иигҗ келнә:
– Тадна килнц йир ик! Болв би Деед Эзнд күрнәв, тадна килнциг тәвүләд чигн орквзав.
31Деед Эзнд хәрү күрәд терүнд келнә:
– О! Намаг соңстн! Эн әмтнә килнц йир ик: тедн бийдән бурхиг алтар кеҗ! 32Теднә геминь тәвҗ өгнт? Кемр уга гихлә, намаг бас Эврәннь бичсн дегтрәс билләд хайтн!
33Деед Эзн иигҗ хәрү өгнә:
– Мини өмнәс килнц һарһсн күүг Би Эврәннь дегтрәс хусҗ хайнав. 34Йов! Мини чамд заасн үзг тал әмтиг дахулад авч ир. Тадниг мандг Мини элч чини өмн йовх. Болв засглх өдр ирхлә, Би тедниг килнц һарһснднь шоодхув.
35Израилин олн-әмтн Ахарониг бүрүһин дүрстә кегдл кетхә гиҗ келснәс көлтә тедниг Деед Эзн цааҗлв.
Currently Selected:
Нүүдл 32: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
