Нүүдл 31

Өргә гер бәрх көдлмшчнр заалһн

1Деед Эзн Мошед келнә:

2– Хәлә: Би Йудьян отгас Бецалелиг – Урин көвүг, Хурин ачиг шүүҗ авув. 3Терүг Бурхна Сәкүсәр дүүргв – терүнд цецн уха, серл, медрл болн ямаран чигн юм кедг чадмг эрдм өгүв. 4Тегәд тер алтар, цаһан мөңгәр болн улан мөңгәр көдлмш кеҗ чадҗана. 5Чолуг керчәд кевд орулҗ чадх, бас мод керчҗ чадх – ямаран чигн эрдмтә болх. 6Тегәд би терүнд Дана отгин Ахисамахин көвүн Оголиавиг нөкд болтха гиһәд өгүв. Эрдмчнриг цугтаһинь эрдмтә кевүв. Тедн чамд Мини закч келсиг цугтаһинь күцәг: 7Харһлтын Шатр, Бооцана хәәрцг, терүнә бүркәг болн Шатрт кергтә тоотынь, 8ширә болн терүнә сав, цевр алтар кесн герлин гегән кергтә тооттаһан, күҗ уңһдалһна авъяс күцәх ширә, 9тәкл тәкдг орм болн терүнд кергтә тоотнь, ик сав тулгтаһан, 10гелңгин мөргүлд өмсх хувц – Ахарона әрүслсн хувц, терүнә көвүдин әрүслсн хувцд, 11бас түрклһнә авъяс кедг каңкнсн тос болн әрүн бәәрнд шатадг сән үнртә күҗ белдтхә. Тедн Мини келсәр цугинь күцәтхә.

Бемб өдр бәрх заквр

12Деед Эзн Мошед закч келнә:

13– Израилин улс Мини бемб өдр тодлад бәртхә гиҗ теднд кел. Үйәс үйд долан хонгин бемб өдр Мини таднла кесн темдг. Би, Деед Эзн, тадниг әдслдгиг медҗ автн. 14Бемб өдриг бәртн: тер өдр танд әрүн өдр. Тер өдриг эвдсн күн алгдх; бемб өдрлә көдлмш кесн күн эврәннь келн-улс дундасн уга кегдх. 15Зурһан хонгтан көдлтхә, доладгч өдр – төвкнүн бәәлһнә бемб өдр, Деед Эзнә әрүслсн өдр. Бемб өдр көдлсн күн болһн алгдх йоста. 16Израилин улс бемб өдриг үйәс үйд бәртхә – эннь мөңк бооцан. 17Мини болн Израилин улсин хоорнд мөңкинд кесн тиим темдг. Яһад гихлә зурһан хонгт Деед Эзн теңгр болн һазр үүдәҗ, доладгч өдртән сулдан амрчасмн.

18Тенд, Синай уул деер, Деед Эзн Мошелә күүндврән чиләхләрн, терүнд Бурхна һарар Бийинь бичсн Бооцана хойр хавтха чолуд өгнә.

Currently Selected:

Нүүдл 31: ХКО_ӘБ

Highlight

Copy