sēnt mārk 14
14
1 #
ēksatas 12:1-27
ēkwa niso kisikāw ē astēk kita otihcipayik mayāskotāto wihkohtowin mina ēkā ē piswēkasot pakwēsikan: ēkosi kihci ayamihēwiyiniwak mina masinahikēwiyiniwak ki natonamwak kita isi kayēsi otinācik, ēkosi kita nipahācik. 2māka ki itwēwak, namawiya ē wihkohtowikisikāk ēkā kita opwēwicik ayisiyiniwak.
3 #
lok 7:37,38 mēkwāc māka pēhtaniihk ē ayāt o wāskāhikaniyihk saimana omacāspinēwa, ē apit ē micisot, ēkota ki pē itohtēw iskwēw ē takonahk ālapāstar asiwacikanisihk, spaiknārt tamaskowin, nāspic ē ākwakitēk: ki pikonam māka asiwacikanis ēkosi ē sikinamwāt ostikwāniyihk. 4māka ki ihtāwak ātiht ē kisiwēyitahkik wiyawāw kēhciwāk, ē itwēcik, tānisi ētāpatahk oma tamaskowin kā isi pakwanata mēstinikātēk? 5cikēmā oma tamaskowin kita ki otisināniwanopan, atāwākēhk, awasimē nistwāw mitātahtomitanaw soniyās, ēkosi kita ki miyihcik okitimākisiwak. ēkosi māka ki ānwēyimēwak. 6māka cisas ki itwēw, ēkā totāhk; tānēki kā mikoskāciāyēk? miyo atoskēwin kā ki isi atoskāsit. 7#tiyotaranami 15:11cikēmā okitimākisiwak kākikē ki wici ayāmikowāwak, mina piko iyikohk ētēyitamēko ki ka ki miyo totawāwāwak: māka niya wiya namawiya mosak kit ayāwināwāw. 8ē isi kaskitāt ki itotam: niyāk ki tominam niyaw kita nainikawiyān. 9mina tāpwē kit itināwāw, piko ita miywācimowin kē wawicikātēkwē misiwēskamik, oma mina awa iskwēw kā ki itotahk kita ātocikātēw kita kiskisitotāht.
10cotas iskāriyat māka, ēwako pēyak aniki mitātat nisosāp, ki sipwētēw ē nātāt kihci ayamihēwiyiniwa, kita ki pakitinamawāt. 11wiyawāw māka, ispi piyēhtahkik, ki mamahtākosiwak, ēkosi asotamawēwak kita miyācik soniyāwa. ēkosi ki natonam kita isi naipayiikot kita pakitinamawāt.
12nistam kisikāw māka wēticipayik ēkā ē piswēkasot pakwēsikan, ita māna kā tipitotakik mayāskotāto wihkohtowin, o kiskinohamawākana omisi itik, tānita nētawēyitaman kita natawi kwayācitāyāhk kita miciyan mayāskotāto wihkohtowin? 13ēkosi itisawēw niso o kiskinohamawākana, mina itēw, itohtēk otēnāhk ēkota māka ki ka nakiskākowāw nāpēw ē pimiwitāt kwāpikākan ē moskinēk nipi: pimitisaohk; 14piko ita māka pihtokwēci, omisi itihk kā tipēyitahk wāskāhikan, okiskinohamākēw itwēw, tānita ēyāk ni kiokēikamik, ita kē wici micisomakik mayāskotāto wihkohtowin ni kiskinohamawākanak? 15ēkosi wiya ki ka wāpatiyikowāw tahkocāyihk ē misāk ē piskici kipahikātēk mitoni ē wawēyitāhk; ēkota kwayācitāk kiyānaw ohci. 16ēkosi kiskinohamawākanak ki sipwētēwak, ki pihtokēwak otēnāhk, mina ki miskamwak mwēhci kā ki isi wihtamākocik: ki kwayācitāwak māka mayāskotāto wihkohtowin.
17ispi māka wētākosik ki pē itohtēw asici anihi mitātat nisosāp. 18#nikamona 41:9mēkwāc māka ē apicik ē micisocik, cisas ki itwēw, tāpwē kit itināwāw, pēyak kiyawāw ni ka wayēsi pakitinik, ana isa piko kā wicimicisomit. 19mistahi māka nama naēyitamwak, ēkosi ati āskawi kakwēcimēwak akinē, niya ci? 20ki itēw māka, pēyak mitātat nisosāp kā itasiyēk, ana kā witospomit. 21cikēmā ispayiw iyiniwikosisān kā itasinahikātēk wiya ohci: māka kakwaiyakēyitākwanokēw ana ayisiyiniw kā wayēsi pakitināt! nawac o ka ki miwāpacihiko ēwako ayisiyiniw ēkā wikac ki nihtāwikikopanē.
22ēkosi mēkwāc ē micisocik, ki otinēw pakwēsikana, ispi māka kā nanāskomot ki pāpakwēnēw, mina ki miyēw ē itwēt, otinihk: ēwako oma niyaw. 23ki otinam māka minikwākan, ispi māka kā nanāskomot, ki miyēw: ēkosi kahkiyaw ki minikwēwak 24#ēksatas 24:8; cērimāya 31:31-34ki itēw māka, ēwakoma ni mihko asotamākēwinihk, mihcēt ohci kā sikinikātēk. 25tāpwē kit itināwāw, namawiya mina ni ka minikwān ē minisiwit sominātik, pātimā anima kisikāw ē oskāyiwahk minikwēyāni kisēmanito ot otēnawiwinihk.
26ispi māka kā nikamocik nikamon, ki wayawiwak alips wacihk ē itohtēcik. 27#sēkarāya 13:7cisas māka itēw, kahkiyaw ki ka nayētāwēyitēnāwāw; cikēmā itasinahikātēw, ni ka pakamawāw okanawimāyatihkwēw, ēkosi māyatihkwak kita siswēyāmokātāwak. 28#mātyo 28:16māka wiya, ispi ki waniskānikawiyāni, ki ka nikānotātināwāw kālalihk. 29māka pitar ki itēw, āta kahkiyaw nayētāwēyitakwāwi, niya wiya namawiya. 30cisas māka itēw, tāpwē kit itin, kiya mina anohc kā kisikāk, ahpo anohc kā tipiskāk, mwayēs niswāw kitot pākaākwān, nistwāw ki ka ānwētawin. 31māka ahci piko namawiya natakitākosiw ē itwēt, kispin āta kita nipiyān kiki kiya, namawiya ki ka anwētātēn. ēkosi māka ki itwēwak kakiyaw.
32ki otitamwak māka ita kēhtsēmani ē isiyihkātēk: ēkosi itēw o kiskinohamawākana, ota apik, ē ispici ayamihāyān. 33ki wicēwēw māka pitar mina cēmis mina cān, ēkosi ki māci mistahi māmaskāci ayāw, mina ki wisaki mikoskātēyitam. 34ēkosi itēw, nit ahcāhk mistahi kotakēyimowin kikiskāk, ahpo nipaēyitamowin: ota ayāk, mina asawāpik. 35ēkosi ki yakotēw apisis, mina mocihk, ki isi kawisin, mina ki ayamihāw, kispin kita ki ikihk, anima tipaikan kiyām kita mayāskākot. 36ki itwēw māka, āpā, notā, kahkiyaw kēkway ki kaskitān; kiyām oma minikwākan ohpimē itisinamawin; ēyiwēhk māka namawiya niya ē isi natawēyitamān, māka kiya ē isi natawēyitaman. 37ēkosi mina pē itohtēw, poti miskawēw ē nipāyit, ēkosi itēw pitara, saiman ki nipān ci? nama ci kanakē pēyak tipaikan ki ki asawāpin? 38asawāpik mina ayamihāk ēkā kita pihtokēyēk kotēyimikowinihk: ahcāhk wiya mitoni tēpēyimo, māka wiyās nēsowan. 39mina māka ki sipwētēw, mina ki ayamihāw, kēyāpic ēwakwani ayamiwina ē itwēt. 40mina māka ē pē itohtēt, miskawēw ē nipāyit, cikēmā mistahi notēkwasiwak; ēkosi namawiya kiskēyitamwak ahpo kita isi naskwēwasimācik. 41ki pē itohtēw māka mina, ēkwa nistwāw, omisi māka ki itēw, nipāk ēkwa, mina āstē ayēskosik: ēkoyikohk ani; otihcipayiw tipaipisimwān; mātika, iyiniwikosisān wayēsi pakitināw o cihciyihk omacātisiwa. 42waniskāk ēkwa sipwētētāk: cist, ana kā wayēsi pakitinit kisiwāk ayāw.
43sēmāk māka, mēkwāc kēyāpic ē pikiskwēt, pē itohtēw cotas, pēyak aniki mitātat nisosāp, ē wicēwikot ē māmawēyatiyit ayisiyiniwa ē kikiyit isawēska mina mistiko pakamākana, ē itisaokoyit anihi kihci ayamihēwiyiniwa mina masinahikēwiyiniwa mina kā nikānēyitākosiyit. 44ana māka kā wayēsi pakitināt ki miyēw oma kita kiskinawātēyitamiyit, ana kē ocēmāwakē, ēwako ana; otinihk, mina pēyatak sipwētaihk. 45ispi māka tēkosihk, sēmāk ki pē nātēw, mina ki itwēw, rāpay; ēkosi ki ocēmēw.
46ēkwā ki otihtinēwak, mina ki otinēwak. 47māka pēyak aniki ēkota kā nipawicik ki otitinam ot isawēsk, mina ki pakamawēw ot atoskēyākaniyiwa kihci ayamihēwiyiniwa, mina ki maniwēpaamwēw otawakāyiw. 48cisas māka ki naskwēwasimēw omisi ē ki itāt, tāpiskoc ci omaskatwēw, kit isi mawinēskawināwāw, isawēska mina mistiko pakamākana ē kikiyēk kita otiniyēk? 49#lok 19:47; 21:37tahto kisikāw ki ki wicēwitināwā kihci ayamihēwikamikohk ē kiskinohamākēyān, ēkosi namawiya koh otinināwāw: māka oma ihkin kihci masinahikēwina kita tipipayiki. 50ēkwa kahkiyaw ki nakatik mina ki tapasiyiwa.
51ki pimitisahok māka pēyak oskinikiwa mostākiyaw ē ki wēwēkit papakiwayānēkinoyiw: ēkosi ki otihtinēwak; 52māka wiya ki pakiciwēpinam papakiwayānēkinoyiw, ēkosi ki tapasiw ē mosēskatēt.
53ki itohtahēwak māka cisasa ita ē ayāyit māwaci kihci ayamihēwiyiniwa: ēkota māka ki asici māwaciitowak kahkiyaw kihci ayamihēwiyiniwak mina kā nikānēyitākosicik mina masinahikēwiyiniwak. 54pitar māka ki pimitisawēw wāyaw ohci, piyis pitokamik, ē wāskā ayāyik māwaci kihci ayamihēwiyiniw wiki: ēkosi ēkota witapimēw otiniwēwa, mina ayawaso ē wāsaskotēyik iskotēw. 55kahkiyaw māka ayamihēwiyiniwak mina māmawi kā oyasowēcik ki natonamwak ācimowin kita isi ācimiht cisas kita ki nipaiht; māka namawiya miskamwak. 56cikēmā āta mihcēt naspāc isi ācimēwak, māka namawiya pēyakotāwak ē isi ācimācik. 57ēkosi ātiht ki nipawiwak, mina naspāc ki isi ācimēwak ē itwēcik, 58#cān 2:19ni ki pētawānān ē itwēt, ni ka nisiwanācitan oma kihci ayamihēwikamik micihciya kā ki ohci osicikātēk, ēkosi nisto kisikāw iyikohk kotak ni ka ositān ēkā micihciya kita ohci osicikātēk. 59māka wiyawāw ahpo namawiya ki pēyakwaniyiw ot ācimowiniwāw. 60ēkwa māka māwaci kihci ayamihēwiyiniw ki nipawiw tāwayihk, mina ki kakwēcimēw cisasa ē itwēt, nama kēkway ci ki naskwēwasitān? kēkway oma oko ot ācimowak kā isi mamisimiskik? 61māka namawiya kito, mina nama kēkway naskwēwasitāw. ēkwa mina māwaci kihci ayamihēwiyiniwa kakwēcimik, mina itik, kiya ci Christ, okosisa kēstēyitākosit? 62#tāniēl 7:13cisas māka ki itwēw, niya ēwako; mina ki ka wāpamāwāw iyiniwikosisān ē apit ē kihciniskiwahk sokātisowin, mina ē pē itohtēt waskohk kisikohk. 63ana māka māwaci kihci ayamihēwiyiniw ki yāyikipitam o kikiskācikana, mina ki itwēw, kēkway awasimē nētawēyimāyakok otacimowak? 64#lipitikas 24:16ki ki pēhtēnāwāw pāstamowin: tānisi ētēyitamēk? kahkiyaw māka kaskitamāso nipiwin ki itasowātēwak. 65ēkwa māka ātiht ki sāsikwātēwak, mina ki akwanākwēnēwak, ēkosi ki pāpakamawēwak, mina ē itācik kiskiwēhikē: ēkosi aniki otiniwēwak o cihciwāwa ohci ki pāpakamawēwak ē otinācik.
66mēkwāc māka pitar nicāyihk ē ayāt ita anima ē wāskā ayāk, ki pē nātik pēyak ot atoskēyākaniskwēmiyiwa māwaci kihci ayamihēwiyiniwa; 67ē pisiskāpamāt māka pitara ē awasoyit, ki kanawāpamēw, ēkosi itwēw, kiya mina ki ki wicēwāw ana nāsarin, cisas oti. 68māka ki anwētam, ē itwēt, namawiya ni kiskēyitēn ahpo namawiya ni nisitotēn kā itwēyan: ki wayawiw māka pitawiskwātēmihk isi, ēkwa māka pākaākwān ki kito. 69ēkosi anihi atoskēyākaniskwēwa mina ki wāpamik, mina ki maci itēyiwa anihi ēkota kā nipawiyit, ēwako awa mina pēyak. 70māka mina ki ānwētam, nākēs iyikohk māka, aniki ēkota kā nipawicik ki itēwak pitara, kēcina kiya pēyak o wicēwākana; cikēmā ki kālaliwiyiniwin. 71māka ki māci māmaci itwēw mina ē āaspi itwēt, namawiya ni kiskēyimāw awa nāpēw kā ayimomāyēk. 72sēmāk māka, ēkwa niswāw, pākaākwān ki kito. ēkwa māka pitar ki kiskisopayiw anima ayamiwin. cisasa kā ki itikot, mwayēs niswāw kitot pākaākwān, nistwāw ki ka ānwētawin, ispi māka miyāmitonēyitahk ēwakwēyiw ki māto.
Currently Selected:
sēnt mārk 14: KKMR
Highlight
Share
Copy
Want to have your highlights saved across all your devices? Sign up or sign in
This Bible text is a transliteration of a corrected edition of the 1908 Western Cree Bible; it is in the public domain.