sēnt mātyo 2
2
1ēkwa ispi kā nihtāwikit cisas anita pētliyamihk cotiaihk kā ihtakwahk, mēkwāc ē kihci okimāwit hērat, cist, iyinisiwiyiniwak ki pē takosinwak wāpanotāhk ohci cērosalamihk isi. 2ē itwēcik, tāniwā kā ki nihtāwikit ot okimāmiwāwa cowak? cikēmā ni ki wāpamimānān ot acakoma wāpanotāhk, ēkosi ē pē itohtēyāhk kita ocihcihkwanapistawāyāhk.
3ispi māka ērat kihci okimāw kā pēhtahk oma, ki mikoskātēyitam, mina kahkiyaw cērosalamihk asici. 4ispi māka kahkiyaw māmawi kā māwacihāt kihci ayamihēwiyiniwa, mina o masinahikēwiyinimiyiwa ayisiyiniwa, ki kakwēcimēw tānita kē nihtāwikipan Christ. 5omisi māka ki itēwak, pētliyamihk cotiaihk kā ihtakwahk; cikēmā ēkosi itasinahikēw okiskiwēhikēw;
6 #
maika 5:2
kiya māka pētliyam cota askihk kā ayāyan namawiya notaw kit ispitēyitākosin ita ē ayācik cota okimāwak; cikēmā kiya ēkota kita pē ohciw ana kihci okimāw, kē kanawēyimāt nit ayisiyinima isrēila.
7ēkosi hērat, ispi kimoc kā natomāt iyinisiwiyiniwa, mitoni ki kakwēcimēw iyikohk mwēhci kā nokosiyit acahkosa. 8ēkosi ki isitisawēw pētliyamihk; ē ki itāt, itohtēk, mitoni nitawi nanātonāhk oskawāsis; ispi māka ki miskawāyēko, mina pē wihtamawikēk kita itohtēyān nista kita pē ocihcihkwanapistawak. 9ispi māka kā pētawācik kihci okimāwa ki ati sipwētēwak: ēkosi cist, acahkosa, kā ki wāpamācik wāpanotāhk, ki ati nikānotākwak piyis ē ki ati otihcipayit mina ē ki kipiciyit anita tipiskoc kā ayāyit oskawāsisa. 10ispi māka kā wāpamācik acahkosa, ki kihci mamahtākosiwak kihci miyawātamowinihk.
11ispi māka kā pihtokēcik wāskāhikanihk, ki wāpamēwak oskawāsisa asici mēriwa okāwiyiwa, ēkosi ē ki pahkisihkik, ē ki ocihcihkwanapistawācik: ispi māka kā pāskinakik o wēyotisiwiniwāwa, ki pakitinamawēwak mēkiwina; osāwisoniyāwa, mina wikimāsikan, mina pikiw wiyikimākosiyit. 12māka ē wihtamākocik kisēmanitowa pawāmiwinihk, ēkā kita kiwētotawācik hērata, ki ati sipwētēwak tipiyawē ot askiwāhk isi kotak mēskanāhk.
13ispi māka kā sipwētēcik, cist, okisikoma kā tipēyihcikēt ki nokohisostāwēyiwa cosipa pawāmiwinihk, ē itāt, waniskā, mina otin oskawāsis mina okāwiya, ēkosi iciptihk itāmo, ēkotē māka ayā iyikohk mina kita wihtamātān; cikēmā hērat kita nanatonawēw oskawāsisa kita nisiwanācihāt. 14ispi māka kā waniskāt, ki otinēw oskawāsisa mina okāwiyiwa ē mēkwā tipiskāyik, iciptihk ē ki isi sipwētēt: 15#hāsiya 11:1ēkotē māka ki ayāw piyis ē ki nipiyit hērata: kita tipipayiyik kā ki itwēk kā tipēyihcikēt okiskiwēhikēwa ohci, ē itwēt, iciptihk ohci ni natomāw nikosis.
16ēkosi hērat, ispi kā wāpātahk ē papāpinotākot iyinisiwiyiniwa, ayiwāk mistahi ki kisiwāsiw, ēkosi isitisahowēw ē ki nipahāt māka kahkiyaw nāpē awāsisa pētliyamihk kā ayāyit, mina misiwē wāskā ēkota kā ayāyit, ē niso piponwēyit mina notaw ispi isa piko ohci, anima mitoni kā ki kakwēcimāt iyinisiwiyiniwa. 17ēkospi māka kā tipipayik anima kā ki itwēt cērimaya okiskiwēhikēw ē itwēt,
18 #
cērimāya 31:15
anita rēma ki matwē pēhtākosināniwiw, kisinātatwēmowin, mina mātowin, mina kihci kakwātakatwēmowin, rēcil ē mawikātāt ot awāsimisa, mina namawiya ki wi miyotēhēhikosiw, cikēmā ēkā ē ihtāyit.
19māka ispi hērat kā nipit, cist, okisikomiyiwa kā tipēyihcikēt ki nokohisostāk pawāmiwinihk cosip anita iciptihk, 20ē itwēyit, waniskā, mina otin oskawāsis mina okāwiya, itohtē māka anita ot askihk isrēil; cikēmā sāsay nipiwak aniki kā ki nanātonahkik o pimātisiwiniyiw oskawāsisa. 21ēkosi ki waniskāw, ē otināt oskawāsisa mina okāwiyiwa, ē ki pē itohtēt ot askihk isrēil. 22māka ispi kā pēhtahk ārkilēas ē tipēyitahk anita cotia, ē tāpapistamawāt otāwiya hērata, ki astāsiw kita itohtēt ēkotē; ē ki wihtamākot kisēmanitowa māka pawāmiwinihk, ki ati paskētēw anitē kālalihk isi. 23#mārk 1:24; lok 2:39; cān 1:45ēkosi ki pē takosin, ki ayāw māka anita otēnāhk nāsarēt ē isiyihkātēk; kita isi tipipayik kā ki itwēcik okiskiwēhikēwak, nāsarin isa kita isiyihkāso.
Currently Selected:
sēnt mātyo 2: KKMR
Highlight
Share
Copy
Want to have your highlights saved across all your devices? Sign up or sign in
This Bible text is a transliteration of a corrected edition of the 1908 Western Cree Bible; it is in the public domain.