ᒑᐢᔪᐊ 9
9
1ᑭ ᐊᔨᐦᑭᐣ ᒫᑲ, ᐃᐢᐱ ᑲᐦᑭᔭᐤ ᐊᓂᑭ ᑭᐦᒋ ᐅᑭᒫᐊᐧᐠ, ᐅᑌ ᐃᑌᑫᑲᒼ ᒑᕒᑕᓂᕽ, ᐊᓂᑕ ᐊᐧᒋᕽ, ᒥᓇ ᐊᓂᑕ ᐊᐧᔭᑎᓇᕽ, ᒥᓇ ᒥᓯᐁᐧ ᐊᐧᐢᑲ ᑭᒋᑲᒥᕽ ᐅᑎᐢᑲᐤ ᓬᐁᐱᓇᐣ, ᐦᐃᑕᐃᐟ, ᒥᓇ ᐋᒪᕒᐊᐃᐟ, ᑫᓇᓇᐃᐟ, ᐯᕒᐃᓴᐃᐟ, ᐦᐊᐃᐸᐃᐟ, ᒥᓇ ᒉᑊᔪᓴᐃᐟ ᑳ ᐯᐦᑕᐦᑭᐠ; 2ᑭ ᒪᒪᐃᐧ ᒫᐊᐧᒋᐃᑐᐊᐧᐠ, ᑭᑕ ᓄᑎᓇᒋᐠ ᒑᐢᔪᐊᐊᐧ ᒥᓇ ᐃᐢᕒᐁᐃᓬᐊ.
3ᐃᐢᐱ ᒫᑲ ᐊᓂᑭ ᑳ ᐅᑕᐢᑭᒋᐠ ᑭᐱᔭᓂᕽ ᑳ ᐯᐦᑕᐦᑭᐠ ᐊᓂᒪ ᒑᐢᔪᐊ ᑳ ᑭ ᑐᑕᐠ ᒉᕒᐃᑯᐃᕽ ᒥᓇ ᐁᐊᐃᕽ. 4ᑭᒧᐨ ᑭ ᐊᑐᐢᑫᐊᐧᐠ, ᒥᓇ ᐁ ᑭ ᑐᑕᐦᑭᐠ ᒪᓇ ᐱᑯ ᐁ ᐃᓯᑎᓴᐦᐊᐧᑲᓂᐃᐧᒋᐠ, ᐁᑯᓯ ᑲᔭᓯ ᒪᐢᑭᒧᑕ ᐁ ᑭ ᓇᔭᑕᐊᒋᐠ ᐅᓱᓱᒥᐢᑕᑎᒧᒥᐋᐧᐊᐧ, ᒥᓇ ᓱᒥᓈᐳᐃᐧ ᐊᓯᐊᐧᒋᑲᓇ, ᑲᔭᓴᔭ, ᒥᓇ ᐁ ᑕᑐᐸᔨᑭ, ᒥᓇ ᐁ ᑕᑯᐱᑌᑭ; 5ᒥᓇ ᑲᔭᓯ ᒪᐢᑭᓯᓇ ᐁ ᒪᒥᓴᐃᑲᑌᔨᑭ, ᒥᓇ ᑲᔭᓯ ᒥᐢᑯᑕᑲᔭ ᐁ ᑭᑭᐢᑲᐦᑭᐠ, ᒥᓇ ᑲᐦᑭᔭᐤ ᐅᐸᑫᐧᓯᑲᓂᒥᐋᐧᐊᐧ ᑳ ᓂᒪᒋᐠ ᑭ ᐸᓱᔨᐊᐧ ᒥᓇ ᑭ ᐊᑲᐧᑯᓯᔨᐊᐧ. 6ᑭ ᓈᑌᐊᐧᐠ ᒫᑲ ᒑᐢᔪᐊᐊᐧ ᐁ ᑭ ᑲᐯᓯᔨᐟ ᐊᓂᑕ ᑭᓬᑳᓬ, ᐅᒥᓯ ᒫᑲ ᑭ ᐃᑌᐊᐧᐠ, ᒥᓇ ᐃᐢᕒᐁᐃᓬ ᐊᔨᓯᔨᓂᐊᐧ, ᐊᐧᔭᐤ ᐃᓴ ᐊᐢᑭᕽ ᓄᑐᑕᓇᐣ; ᐁᑲᐧ ᐃᓴ ᒫᑲ ᓇᐁᔨᑐᑖᐣ. 7#ᐁᐠᓴᑕᐢ 23:32; 34:12; ᑎᔪᑕᕒᐊᓇᒥ 7:2ᐊᓂᑭ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᐅᒥᓯ ᑭ ᐃᑌᐊᐧᐠ ᐦᐊᐃᐸᐃᑕ, ᒪᐢᑯᐨ ᐊᐦᐳ ᑭ ᐃᐧᑕᐢᑭᒥᓇᐣ; ᑖᓂᓯ ᒫᑲ ᑫ ᐃᓯ ᓇᐁᔨᑐᔭᐠ? 8ᐅᒥᓯ ᒫᑲ ᑭ ᐃᑌᐊᐧᐠ ᒐᐢᔪᐋᐧᐊᐧ, ᓂᔭᓇᐣ ᑭᐟ ᐊᑐᐢᑫᔮᑲᓇᐠ. ᒑᐢᔪᐊ ᒫᑲ ᐅᒥᓯ ᑭ ᐃᑌᐤ, ᐊᐁᐧᓂᑭ ᑭᔭᐋᐧᐤ? ᒥᓇ ᑕᓂᑌᐁᐧᑐᑌᔦᐠ? 9ᐅᒥᓯ ᒫᑲ ᑭ ᐃᑌᐊᐧᐠ, ᓇᐢᐱᐨ ᐃᓴ ᐊᐧᔭᐤ ᐊᐢᑭᕽ ᐅᐦᑐᐦᑌᐊᐧᐠ ᑭᐟ ᐊᑐᐢᑫᔮᑲᓇᐠ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᐅᑎᓯᓂᑲᓱᐃᐧᐣ ᐅᐦᒋ; ᒋᑫᒫ ᓂ ᑭ ᐯᑌᓇᐣ ᐅᑎᑕᒋᒥᑯᐃᐧᐣ, ᒥᓇ ᐊᓂᒪ ᑲᐦᑭᔭᐤ ᑳ ᑭ ᑐᑕᕽ ᐃᒋᑊᑎᕽ, 10#ᓇᒼᐸᕒᐢ 21:21-35ᒥᓇ ᑲᐦᑭᔭᐤ ᐊᓂᒪ ᑳ ᑭ ᑐᑕᐊᐧᐟ ᓂᓱ ᐅ ᑭᐦᒋ ᐅᑭᒪᒥᔨᐊᐧ ᐋᒪᕒᐊᐃᑕ, ᐊᑲᒥᕽ ᒑᕒᑕᓂᕽ ᑳ ᑭ ᐊᔭᔨᐸᐣ, ᓯᐦᐋᐣ ᑭᐦᒋ ᐅᑭᒫᐤ ᐦᐁᐢᐸᓂᕽ, ᒥᓇ ᐋᐠ ᑭᐦᒋ ᐅᑭᒫᐤ ᐯᓵᓂᕽ, ᑳ ᑭ ᐊᔭᐸᐣ ᐊᓂᑕ ᐊᐢᑌᕒᐅᐟ. 11ᐁᐊᐧᑯ ᒫᑲ ᐅᐦᒋ ᓂ ᓂᑳᓀᔨᑖᑯᓯᒥᓇᓇᐠ ᒥᓇ ᑲᐦᑭᔭᐤ ᑳ ᐅᑕᐢᑭᒋᐠ ᓂᐟ ᐊᐢᑭᓇᕽ ᓂ ᑭ ᐊᔭᒥᐃᑯᓇᓇᐠ, ᐁ ᐃᑌᐧᒋᐠ, ᐅᑎᓇᒧᐠ ᒥᒋᒪ ᑫ ᓂᒪᔦᐠ, ᓂᑕᐃᐧ ᓇᑭᐢᑲᑯᐠ, ᐅᒥᓯ ᒫᑲ ᐃᑎᑯᐠ, ᓂᔭᓇᐣ ᑭᐟ ᐊᑐᐢᑫᔮᑲᓂᐋᐧᐊᐧᐠ; ᐁᑲᐧ ᐃᓴ ᒫᑲ ᓇᐁᔨᑐᑕᐣ. 12ᐁᐊᐧᑯ ᐊᐊᐧ ᓂ ᐸᐦᑫᐧᓯᑲᓂᒥᓇᐣ ᐁ ᑭᓯᓱᐸᐣ ᑳ ᑭ ᐯ ᓂᒪᔭᑭᐸᐣ ᓂᑭᓇᕽ ᐅᐦᒋ ᐊᓂᒪ ᐁ ᑭᓯᑳᐠ ᐃᐢᐱ ᑳ ᐯ ᓇᑎᑕᕽ; ᒫᑲ ᐊᓄᐦᐨ, ᒋᐢᐟ, ᐸᓱ, ᒥᓇ ᐊᑲᐧᑯᓯᐤ: 13ᒥᓇ ᐅᐦᐅ ᐊᓯᐊᐧᒋᑲᓇ ᓱᒥᓈᐳ ᑳ ᐊᓯᐊᐧᑌᐠ, ᐁ ᑭ ᓴᑲᐢᑭᓇᑕᔭᕽ, ᑭ ᐅᐢᑫᓂᑲᐧᓄᐸᓂ; ᒫᑲ ᒋᐢᐟ, ᑕᑐᐸᔨᐊᐧ; ᒥᓇ ᐅᐦᐅ ᓈᐢᑯᑕᑲᓇᓇ ᒥᓇ ᓂ ᒪᐢᑭᓯᓂᓇᓇ ᐊᑎ ᑲᔭᓴᔨᐊᐧᓇᐧ ᐁᐢᐱᒋ ᑭᓀᐧᐢ ᐱᒥᐱᒋᔭᕽ. 14ᐊᔨᓯᔨᓂᐊᐧ ᒫᑲ ᑭ ᐅᑎᓀᐊᐧᐠ ᐅᒥᒋᒥᒥᔨᐤ ᐅᐦᒋ, ᓇᒪᐃᐧᔭ ᑭ ᓇᑐᑕᒪᐁᐧᐊᐧᐠ ᑭᐢᑫᔨᐦᒋᑫᐃᐧᐣ ᑳ ᑎᐯᔨᐦᒋᑫᔨᐟ. 15ᒑᐢᔪᐊ ᒫᑲ ᑭ ᐃᐧᒋ ᑭᔭᒣᐃᐧᓯᐃᐧᒣᐤ, ᒥᓇ ᑭ ᓇᐁᔨᑕᒣᔨᒣᐤ, ᑭᑕ ᐱᒫᑎᓯᔨᐟ; ᐊᓂᑭ ᒫᑲ ᐅᑕᑭᒪᓯᓯᒥᐋᐧᐊᐧ ᑳ ᒫᒪᐁᐧᔭᑎᒋᐠ ᑭ ᑭᐦᒋ ᐊᓱᑕᒪᐁᐧᐊᐧᐠ.
16ᑭ ᐅᑎᐦᒋᐸᔨᐤ ᒫᑲ ᐃᐢᐱ ᑳ ᐳᓂ ᓂᐢᑐᑭᓯᑳᐠ ᓵᓴᐩ ᐁ ᑭ ᓇᐁᔨᑐᒋᐠ, ᑭ ᐯᐦᑕᒪᐧᐠ ᐁ ᐃᐧᑕᐢᑭᒥᑯᒋᐠ ᐁᑯᓯ, ᒥᓇ ᐁ ᑭ ᐃᐧᒋᐊᔭᒪᒋᐠ. 17ᐁᑯᓯ ᐃᐢᕒᐁᐃᓬ ᐅᑕᐋᐧᓯᒥᓴ ᑭ ᐱᒋᐊᐧᐠ, ᐁᑯᓯ ᑭ ᑕᑯᓯᓇᐧᐠ ᐅᑐᑌᓇᔨᕽ ᐁᑎ ᓂᐢᑐᑭᓯᑳᔨᐠ. ᐊᓂᐦᐃ ᒫᑲ ᐅᑐᑌᓇᒥᐋᐧᐊᐧ ᐁᐅᑯᓂ ᐅᐦᐅ ᑭᐱᔭᐣ, ᒥᓇ ᒉᐦᐱᕒᐊ, ᒥᓇ ᐱᐃᕒᐋᐦᐟ, ᒥᓇ ᑲᕒᒐᐟ ᒋᐊᕒᐃᒼ. 18ᐁᑯᓯ ᐃᐢᕒᐁᐃᓬ ᐅᑕᐋᐧᓯᒥᓴ ᓇᒪᐃᐧᔭ ᑭ ᓂᐸᐁᐊᐧᐠ, ᒋᑫᒫ ᐊᓂᑭ ᑳ ᑎᐯᔨᒪᒋᐠ ᑳ ᒫᒪᐁᐧᔭᑎᔨᐟ ᑭ ᐊᐢᐱ ᑭᐦᒋ ᐃᑌᐊᐧᐠ ᑳ ᑎᐯᔨᐦᒋᑫᔨᐟ ᐅ ᑭᓭᒪᓂᑐᒥᔨᐊᐧ ᐃᐢᕒᐁᐃᓬᐊ. ᑲᐦᑭᔭᐤ ᒫᑲ ᑳ ᒫᒪᐁᐧᔭᑎᒋᐠ ᑭ ᑭᑲᒣᐊᐧᐠ ᐅᑭᒪᓯᓴ. 19ᒫᑲ ᑲᐦᑭᔭᐤ ᐊᓂᑭ ᐅᑭᒪᓯᓴᐠ ᑭ ᐃᑌᐊᐧᐠ ᐊᓂᐦᐃ ᑳ ᒫᒪᐁᐧᔭᑎᔨᐟ, ᓂ ᑭ ᐊᐢᐱ ᑭᐦᒋ ᐃᑕᓇᓂᐠ ᑳ ᑎᐯᔨᐦᒋᑫᔨᐟ ᐅ ᑭᓭᒪᓂᑐᒪ ᐃᐢᕒᐁᐃᓬ; ᐁᑲᐧ ᒫᑲ ᓇᒪᐃᐧᔭ ᑳ ᓵᒥᓇᓇᓂᐠ. 20ᐁᑯᓯ ᐅᒪ ᑭ ᑳ ᐃᑐᑕᐊᐧᓇᐊᐧᐠ, ᑭᔮᒼ ᑭᑕ ᐱᒫᑎᓯᐊᐧᐠ, ᐁᑳ ᑭᓯᐊᐧᓯᐃᐧᐣ ᑭᑕ ᐸᑕᑯᐢᑲᑯᔭᕽ, ᐊᓂᒪ ᐅᐦᒋ ᑭᐦᒋ ᐃᑌᐧᐃᐧᐣ ᑳ ᑭ ᐃᓯ ᑭᐦᒋ ᐃᑕᑯᐠ. 21ᐅᑭᒪᓯᓴᐠ ᒫᑲ ᐅᒥᓯ ᑭ ᐃᑌᐊᐧᐠ, ᑭᔮᒼ ᑭᑕ ᐱᒫᑎᓯᐊᐧᐠ; ᒫᑲ ᑭᔮᒼ ᑭᑕ ᒪᓂᑕᐃᐧᐊᐧᐠ ᒥᓇ ᑭᑕ ᒪᓂᑲᐧᐱᑲᐁᐧᐊᐧᐠ ᑲᐦᑭᔭᐤ ᑳ ᒫᒪᐁᐧᔭᑎᔨᐟ; ᒣᐧᐦᒋ ᐅᑭᒪᓯᓴᐠ ᑳ ᑭ ᐃᓯ ᐊᓱᑕᒪᐊᐧᒋᐠ.
22ᒑᐢᔪᐊ ᒫᑲ ᑭ ᓇᑐᒣᐤ, ᒥᓇ ᐁ ᑭ ᐊᔭᒥᐦᐋᐟ ᐁ ᐃᑕᐟ, ᑫᑲᐧᐩ ᑳ ᑭ ᐅᐦᒋ ᐊᐧᔦᓯᒥᔭᕽ, ᐁ ᐃᑌᐧᔦᐠ, ᓈᐢᐱᐨ ᑭᔮᐊᐧᐸᒥᑎᓇᐣ; ᐋᑕ ᐁᓴ ᐁ ᐃᐧᒋᐊᔮᒥᔭᕽ? 23ᐁᑲᐧ ᐃᓴ ᒫᑲ ᑭ ᓇᓂᐳᒋᑲᓱᓈᐋᐧᐤ, ᓇᒪᐋᐧᐨ ᒫᑲ ᐯᔭᐠ ᑳ ᐃᑕᓯᔦᐠ ᑭᑕ ᐃᐢᑯ ᐊᐊᐧᑳᓂᐃᐧᐤ, ᒥᓇ ᑭᑕ ᒪᓂᑌᑲᑕᒣᐠ ᒥᓇ ᑭᑕ ᑳᐧᐱᑫᑲᑕᒣᐠ ᐅᐊᐧᐢᑲᐦᐃᑲᓂᒼ ᓂ ᑭᓭᒪᓂᑐᒼ. 24ᑭ ᓇᐢᑫᐧᐊᐧᓯᒣᐊᐧᐠ ᒫᑲ ᒑᐢᔪᐊᐊᐧ, ᐅᒥᓯ ᐁ ᑭ ᐃᑕᒋᐠ, ᒋᑫᒫ ᑫᒋᓇᐨ ᑭ ᐃᐧᐦᑕᒪᐊᐧᑕᔭᐠ ᑭᐟ ᐊᑐᐢᑫᔮᑲᓇᐠ, ᐁ ᑭ ᐃᓯ ᓯᑭᒪᐟ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᐊᓂᐦᐃ ᐅᐟ ᐊᑐᐢᑫᔮᑲᓇ ᒧᓯᓴ ᑭᑕ ᒥᔨᑯᔦᐠ ᒥᓯᐁᐧ ᐊᐢᑭᔨᐤ, ᒥᓇ ᑭᑕ ᓂᓯᐊᐧᓈᒋᐦᑕᒫᑯᔦᐠ ᑲᐦᑭᔭᐤ ᐊᐢᑭᕽ ᑳ ᐅᑕᐢᑭᔨᐟ, ᐁᐊᐧᑯ ᒫᑲ ᐅᐦᒋ ᓇᐢᐱᐨ ᓂ ᑭ ᓭᑭᓯᐢᑕᒪᐊᐧᑌᓇᐣ ᓂ ᐱᒫᑎᓯᐃᐧᓂᓈᓇ ᑭᔭᐋᐧᐤ ᐅᐦᒋ, ᐁᑯᓯ ᐅᒥᓯ ᓂ ᑭ ᐃᑐᑌᓇᐣ. 25ᐁᑲᐧ ᒫᑲ, ᒋᐢᐟ ᑭᒋᒋᕽ ᓂᑕᔭᓇᐣ; ᐁ ᐃᓯ ᒥᐁᐧᔨᑕᒪᐣ ᒥᓇ ᐁ ᐃᓯ ᒥᐊᐧᐱᓯᓂᔭᐣ ᑭᑕ ᑐᑕᐃᐧᔭᕽ ᐁᑯᓯ ᑐᑕᐃᐧᓇᐣ. 26ᐁᑯᓯ ᒫᑲ ᑳ ᑐᑕᐊᐧᐟ, ᒥᓇ ᐁ ᑭ ᐸᐢᐱᑎᓯᓇᐟ ᐅᒋᒋᔨᕽ ᐅᐦᒋ ᐃᐢᕒᐁᐃᓬ ᐅᑕᐋᐧᓯᒥᓯᔨᐊᐧ, ᐁᑳ ᑳ ᑭ ᐅᐦᒋ ᓂᐸᐊᔨᐟ. 27ᐁᑯᐢᐱ ᑭᓯᑳᐤ ᒫᑲ ᒑᐢᔪᐊ ᑭ ᐃᓯᐦᐁᐤ ᑭᑕ ᒪᓂᑕᐊᐧᔨᐟ ᒥᓇ ᑭᑕ ᑲᐧᐱᑲᐊᐧᔨᐟ ᑳ ᒫᒪᐁᐧᔭᑎᔨᐟ, ᒥᓇ ᐅᐸᑭᑎᓇᓱᐃᐧᓇᐱᐢᑯᔨᐤ ᑳ ᑎᐯᔨᐦᒋᑫᔨᐟ, ᐱᔨᐢ ᐊᓄᐦᐨ ᑳ ᑭᓯᑳᐠ, ᐊᓂᑕ ᑫ ᐃᓯ ᓇᐊᐧᓱᓇᒥᔨᐟ.
Currently Selected:
ᒑᐢᔪᐊ 9: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
