ᐅᔭᓱᐁᐧᐊᐧᐠ 8
8
1ᐊᓂᐦᐃ ᒫᑲ ᐃᐸᕒᐁᐃᒼ ᓈᐯᐊᐧ ᐅᒥᓯ ᑭ ᐃᑎᐠ, ᑖᓀᐦᑭ ᐅᒥᓯ ᑳ ᑭ ᑐᑕᐃᐧᔮᕽ, ᐁᑳ ᑳ ᑭ ᓇᑐᒥᔮᕽ ᐃᐢᐱ ᐁ ᓇᑕᐃᐧ ᓄᑎᓇᒋᐠ ᒥᑎᔭᐣ? ᐁᑯᓯ ᑭ ᑭᓯᑭᑐᑎᐠ. 2ᑭ ᐃᑌᐤ ᒫᑲ, ᑫᑲᐧᐩ ᑳ ᐃᑐᑕᒫᐣ ᐃᔨᑯᕽ ᑭᔭᐋᐧᐤ ᑳ ᑭ ᐃᑐᑕᒣᐠ? ᓇᒪ ᒋ ᐁ ᒧᓴᑭᓂᐦᒋᐠ ᐃᐢᑯᓂᑲᓂ ᓱᒥᓂᓴᐠ ᐃᐸᕒᐁᐃᒥᕽ ᐊᔨᐋᐧᑫᔨᑖᑲᐧᐣ ᐃᔨᑯᕽ ᒫᒪᐃᐧ ᓱᒥᓂᓴᐠ ᐋᐱᔨᓴᕒᐃᕽ? 3#ᓂᑲᒧᓇ 83:11ᑭᓭᒪᓂᑐ ᑭ ᐸᑭᑎᓀᐤ ᑭᒋᐦᒋᐋᐧᕽ ᒥᑎᔭᐣ ᐅᑭᒫᒥᐋᐧᐊᐧ ᐋᕒᐃᑊ ᒥᓇ ᓯᑊ; ᐁᑯᓯ ᑫᑲᐧᐩ ᓂᔭ ᑳ ᐃᑐᑕᒫᐣ ᐃᔨᑯᕽ ᑭᔭᐋᐧᐤ ᑳ ᑭ ᑐᑕᒣᐠ? ᐁᑲᐧ ᒫᑲ ᑭ ᐋᐢᑌᑭᓯᐢᑕᐁᐧᐊᐧᐠ ᐃᐢᐱ ᐅᒪ ᑳ ᐃᑌᐧᔨᐟ.
4ᑭᑎᔭᐣ ᒫᑲ ᑭ ᑕᑯᓯᐣ ᒑᕒᑕᓂᕽ, ᐁᑯᓯ ᑭ ᐋᓱᐊᐧᐦᐊᒼ, ᐃᐧᔭ ᒥᓇ ᐊᓂᐦᐃ ᓂᐢᑖᐧᐤ ᒥᑖᐦᑐᒥᑕᓇᐤ ᓈᐯᐊᐧ ᑳ ᐃᐧᒉᐃᐧᑯᐟ ᐁ ᓄᑌᓯᑭᐠ ᒫᑲ ᐋᐦᒋᐱᑯ ᐁ ᓇᐊᐧᓭᐧᒋᐠ. 5ᑭ ᐃᑌᐤ ᒫᑲ ᓴᑲᐦᐟ ᐊᔨᓯᔨᓂᐊᐧ, ᒥᔨᑯᐠ ᑭ ᐸᑯᓭᔨᒥᑎᓈᐋᐧᐤ ᐁ ᑲᐧᔮᑎᑲᓱᔨᐟ ᐸᐦᑫᐧᓯᑲᓇ ᐊᔨᓯᔨᓂᐊᐧᐠ ᑳ ᐱᒥᑎᓴᐅᒋᐠ; ᒋᑫᒫ ᓄᑌᓯᓇᐧᐠ, ᐁᑯᓯ ᓂ ᓇᐊᐧᓵᐧᑖᐊᐧᐠ ᓯᐸ ᒥᓇ ᓵᓬᒫᓇ ᒥᑎᔭᐣ ᑭᐦᒋ ᐅᑭᒫᐊᐧᐠ. 6ᐊᓂᑭ ᒫᑲ ᓴᑲᐦᐟ ᐅᑭᒫᐊᐧᐠ ᑭ ᐃᑌᐧᐊᐧᐠ, ᑭ ᒥᒋᒥᓇᒫᐧᐣ ᒋ ᐅᒋᐦᒋᐋᐧᐊᐧ ᓯᐸ ᒥᓇ ᓵᓬᒫᓇ, ᑭᑕ ᒥᔮᔮᑭᐠ ᐸᐦᑫᐧᓯᑲᓇ ᑯᓄᑎᓂᑫᒪᐠ? 7ᑭᑎᔭᐣ ᒫᑲ ᑭ ᐃᑌᐧᐤ, ᐁᑯᓯ ᐁᓵᓂ ᐃᐢᐱ ᑳ ᑎᐯᔨᐦᒋᑫᐟ ᑭ ᐸᑭᑎᓈᒋ ᓯᐸ ᒥᓇ ᓵᓬᒫᓇ ᓂᒋᐦᒋᕽ ᓂ ᑲ ᒑᒌᓯᐱᑌᐣ ᑭ ᐃᐧᔮᓯᐋᐧᐤ ᒥᓯᑳᐃᐧᒥᓇᑲᓯᔭᐠ ᒥᓇ ᑳᐃᐧᒥᓇᑲᓯᔭᐠ ᐁ ᐋᐸᒋᐊᑭᐠ ᐱᑲᐧᑕᐢᑭᕽ ᐅᐦᒋ. 8ᑭ ᓯᐯᐧᑌᐤ ᒫᑲ ᐁᑯᑕ ᐅᐦᒋ ᒥᓇ ᑭ ᐅᑎᐦᑕᒼ ᐯᓄᐃᓬ ᐁᑯᓯ ᐁᐊᐧᑯᓂ ᒥᓇ ᐁᑯᓯ ᑫᔮᐱᐨ ᑭ ᐃᑌᐤ; ᐊᓂᐦᐃ ᒫᑲ ᐯᓄᐃᓬ ᐊᔨᓯᔨᓂᐊᐧ ᑭ ᓇᐢᑫᐧᐊᐧᓯᒥᐠ ᑖᐱᐢᑯᐨ ᓴᑲᐦᐟ ᐊᔨᓯᔨᓂᐊᐧ ᑳ ᑭ ᐃᓯ ᓇᐢᑫᐧᐊᐧᓯᒥᑯᐟ. 9ᑭ ᑭᑐᑌᐤ ᒫᑲ ᐊᓂᐦᐃ ᐯᓄᐃᓬ ᐊᔨᓯᔨᓂᐊᐧ ᐁ ᐃᑌᐧᐟ, ᐃᐢᐱ ᑳᐃᐧ ᒥᓇ ᐯᔭᐦᑕᐠ ᑕᑯᓯᓂᔮᓂ, ᓂ ᑲ ᑲᐃᐧᐁᐧᐸᐁᐣ ᐅᒪ ᐊᓴᐋᐧᐱᐃᐧᑲᒥᐠ.
10ᓯᐸ ᒫᑲ ᒥᓇ ᓵᓬᒫᓇ ᑭ ᐊᔮᐊᐧᐠ ᐊᓂᑕ ᑳᕒᑳᕒ, ᐁ ᐃᐧᒉᐃᐧᑯᒋᐠ ᐊᓂᐦᐃ ᐅᓇᑐᐸᔨᒥᐋᐧᐊᐧ, ᓈᐣᑕᐤ ᒥᑖᑕᐦᐟ ᓂᔮᓇᓄᓵᑊ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ, ᑲᐦᑭᔭᐤ ᐁ ᐃᐢᑯᐃᐦᒋᐠ ᐊᓂᑭ ᐅᓇᑐᐸᔨᐊᐧᐠ ᐋᐧᐸᓄᑖᕽ ᑳ ᐅᐦᒋᒋᐠ; ᒋᑫᒫ ᑭ ᐸᐦᑭᓯᓇᐧᐠ ᒥᑖᐦᑐᒥᑕᓇᐤ ᓂᓯᑕᓇᐤ ᐊᔨᐋᐧᐠ ᑕᐦᑐ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ ᐃᓴᐁᐧᐢᐠ ᑳ ᐋᐸᒋᐦᑖᒋᐠ.
11ᑭᑎᔭᐣ ᒫᑲ ᑭ ᐊᑎ ᐃᑐᐦᑌᐤ ᐁ ᐃᑕᒧᑖᐁᐧᔨᐟ ᐊᓂᐦᐃ ᑳ ᒧᐦᒋ ᐅ ᐃᐧᑭᔨᐟ ᐋᐧᐸᓄᑖᕽ ᐃᑌᐦᑫ ᓄᐸ ᒥᓇ ᒑᐠᐱᐦᐋ, ᐁᑯᓯ ᑭ ᓂᐸᐁᐤ ᐅᓇᑐᐸᔨᐊᐧ ᒋᑫᒫ ᐅᓇᑐᐸᔨᐊᐧ ᓇᒪᐃᐧᔭ ᑭ ᐊᐢᐁᐧᔨᒥᐠ. 12ᓯᐸ ᒫᑲ ᒥᓇ ᓵᓬᒫᓇ ᑭ ᑕᐸᓯᐊᐧᐠ ᐁᑯᓯ ᑭ ᓇᐊᐧᓵᐧᑌᐤ; ᑭ ᐅᑎᓀᐤ ᒫᑲ ᐁᓂᓯᔨᐟ ᒥᑎᔭᓇᐃᑕᐠ ᐅ ᑭᐦᒋ ᐅᑭᒫᒥᐋᐧᐊᐧ, ᓯᐸ ᒥᓇ ᓵᓬᒫᓇ, ᒥᓇ ᑭ ᐱᐋᐧᒧᑫᐤ ᑲᐦᑭᔭᐤ ᐅᓇᑐᐸᔨᐊᐧ.
13ᑭᑎᔭᐣ ᒫᑲ ᐅᑯᓯᓴ ᒍᐋᐢ ᑭ ᐯ ᑭᐁᐧᐤ ᓄᑎᓂᑐᐃᐧᓂᕽ ᐅᐦᒋ ᐁ ᐊᑎ ᐋᒪᒋᐁᐧᔮᐠ ᐦᐃᕒᐃᐢ. 14ᑭ ᐅᑎᐦᑎᓀᐤ ᒫᑲ ᐯᔭᐠ ᐅᐢᑭᓂᑭᐊᐧ ᐊᓂᐦᐃ ᓴᑲᐦᐟ ᐊᔨᓯᔨᓂᐊᐧ ᐅᐦᒋ ᐁᑯᓯ ᑭ ᑲᑫᐧᒋᒣᐤ; ᑭ ᐋᒋᒧᐢᑖᐠ ᒫᑲ ᑖᓈᓂᐃ ᐅᑭᒫᐊᐧ ᓴᑲᐦᐟ ᒥᓇ ᑳ ᓂᑳᓀᔨᑖᑯᓯᔨᐟ, ᑌᐸᑯᐦᐳᒥᑕᓇᐤ ᑌᐸᑯᑊ ᐊᔨᐋᐧᐠ ᓈᐯᐊᐧ. 15ᑭ ᐯ ᐅᑎᐦᑌᐤ ᒫᑲ ᐊᓂᐦᐃ ᓴᑲᐦᐟ ᐊᔨᓯᔨᓂᐊᐧ, ᐁᑯᓯ ᑭ ᐃᑌᐤ, ᒋᐢᐟ ᐁᐊᐧᑯᓂᐠ ᓯᐸ ᒥᓇ ᓵᓬᒫᓇ, ᐊᓂᑭ ᑳ ᑭ ᐅᐦᒋ ᐱᐃᐧᑭᓵᐧᓯᔦᐠ ᐁ ᐃᑌᐧᔦᐠ, ᑭ ᒥᒋᒥᓇᒫᐧᐣ ᒋ ᐅᒋᐦᒋᐋᐧᐊᐧ ᓯᐸ ᒥᓇ ᓵᓬᒫᓇ, ᑭᑕ ᒥᔮᔮᑭᐠ ᐸᐦᑫᐧᓯᑲᓇ ᑯᐢᑭᓂᑭᒪᐠ ᐁ ᓄᑌᓯᑭᐠ? 16ᑭ ᐅᑎᓀᐤ ᒫᑲ ᑳ ᓂᑳᓀᔨᑖᑯᓯᔨᐟ ᐅᑌᓈᕽ, ᒥᓇ ᑭ ᐅᑎᓀᐤ ᒥᓯᑳᐃᐧᒥᓇᑲᓯᔭ ᐱᑲᐧᑕᐢᑭᕽ ᐅᐦᒋ ᒥᓇ ᑳᐃᐧᒥᓇᑲᓯᔭ ᐁᐊᐧᑯᓂ ᒫᑲ ᐁ ᐋᐸᒋᐦᑖᐟ ᑭ ᑲᑫᐢᑭᒧᐁᐤ ᐊᓂᐦᐃ ᓴᑲᐦᐟ ᐊᔨᓯᔨᓂᐊᐧ. 17ᑭ ᑲᐃᐧᐁᐧᐸᐦᐊᒼ ᒫᑲ ᐯᓄᐃᓬ ᐊᓴᐋᐧᐱᐃᐧᑲᒥᐠ, ᒥᓇ ᑭ ᓂᐸᐁᐤ ᐊᔨᓯᔨᓂᐊᐧ ᐅᑌᓈᕽ.
18ᐁᑲᐧ ᒫᑲ ᑭ ᐃᑌᐤ ᐊᓂᐦᐃ ᓯᐸ ᒥᓇ ᓵᓬᒫᓇ, ᑖᐣᑐᐃᐧ ᐊᔨᓯᔨᓂᐊᐧᐠ ᑳ ᑭ ᓂᐸᐦᐋᔦᑯᐠ ᐊᓂᑕ ᑌᐹᕒ? ᑭ ᓇᐢᑫᐧᐊᐧᓯᒥᐠ ᒫᑲ, ᑳ ᐃᓯᓈᑯᓯᔭᐣ ᑭ ᐃᓯᓈᑯᓯᐊᐠ; ᑲᐦᑭᔭᐤ ᐁ ᐃᐦᑕᓯᒋᐠ ᑭ ᐃᓯᓈᑯᓯᐊᐧᐠ ᑖᐱᐢᑯᐨ ᑭᐦᒋ ᐅᑭᒫᐤ ᐅᐟ ᐊᐋᐧᓯᒥᓴ. 19ᑭ ᐃᑌᐤ ᒫᑲ, ᐁᐊᐧᑯᓂᐠ ᓂᒋᐋᐧᒪᐠ, ᓂᑳᐃᐧ ᐅᑯᓯᓴ; ᐁ ᐃᓯ ᐱᒫᑎᓯᐟ ᑳ ᑎᐯᔨᐦᒋᑫᐟ ᑭᐢᐱᐣ ᑭ ᐱᒫᒋᐦᐋᔦᑯᐠ ᓇᒪᐃᐧᔭ ᑭ ᑳᐦ ᓂᐸᐃᑎᓈᐋᐧᐤ. 20ᑭ ᐃᑌᐤ ᒫᑲ ᒉᐦᑕᕒᐊ ᐅ ᓂᐢᑕᒧᓵᓇ, ᐸᓯᑯ, ᒥᓇ ᓂᐸᐦᐃᐠ. ᒫᑲ ᐊᓇ ᐅᐢᑭᓂᑭᐤ ᓇᒪᐃᐧᔭ ᔮᔨᐢᑭᐱᑕᒼ ᐅᐟ ᐃᓴᐁᐧᑯᒫᐣ, ᒋᑫᒫ ᑭ ᓵᑫᐧᔨᒧ ᐊᔨᐢ ᑫᔮᐱᐨ ᐁ ᐅᐢᑭᓂᑭᐟ. 21ᐁᑲᐧ ᓯᐸ ᒥᓇ ᓵᓬᒫᓇ ᑭ ᐃᑎᐠ, ᐸᓯᑯ ᑭᔭ ᒥᓇ ᐸᑲᒪᐅᓈᐣ; ᒋᑫᒫ ᑳ ᐃᓯ ᐊᔮᐟ ᐊᔨᓯᔨᓂᐤ ᐁᑯᓯ ᐁᓯ ᐊᔮᔨᐠ ᐅ ᒪᐢᑲᐃᐧᓯᐃᐧᐣ. ᑭᑎᔭᐣ ᒫᑲ ᑭ ᐸᓯᑯ, ᒥᓇ ᑭ ᓂᐸᐁᐤ ᓯᐸ ᒥᓇ ᓵᓬᒫᓇ, ᒥᓇ ᑭ ᐅᑎᓇᒣᐧᐤ ᐁ ᐊᐧᐁᐧᓯᒋᑳᓱᔨᐟ ᐅ ᐱᐢᑳᐧᐃᐧᑲᓀᒥᔨᐊᐧ ᐅᑲᐧᔮᔨᕽ.
22ᐁᑲᐧ ᐃᐢᕒᐁᐃᓬ ᐊᔨᓯᔨᓂᐊᐧᐠ ᑭ ᐃᑌᐊᐧᐠ ᑭᑎᔭᓇ, ᑎᐯᔨᒥᓈᐣ ᑭᔮᒼ, ᑭᔭ ᒥᓇ ᑭᑯᓯᐢ, ᒥᓇ ᑭᑯᓯᐢ ᐅᑯᓯᓴ; ᒋᑫᒫ ᑭ ᑭ ᐸᐢᐱᐦᐃᓈᐣ ᐅᒋᐦᒋᕽ ᒥᑎᔭᐣ ᐅᐦᒋ. 23ᑭᑎᔭᐣ ᒫᑲ ᑭ ᐃᑌᐤ, ᓇᒪᐃᐧᔭ ᑭ ᑲ ᑎᐯᔨᒥᑎᓈᐋᐧᐤ, ᓇᒪᐃᐧᔭ ᒥᓇ ᓂᑯᓯᐢ ᑭ ᑲ ᑎᐯᔨᒥᑯᐋᐧᐤ, ᑳ ᑎᐯᔨᐦᒋᑫᐟ ᑭ ᑲ ᑎᐯᔨᒥᑯᐋᐧᐤ.
24ᐁᑯᓯ ᒥᓇ ᑭᑎᔭᐣ ᑭ ᐃᑌᐤ, ᑭ ᓄᐦᑌ ᓇᑐᑕᒫᑌᓈᐋᐧᐤ ᑫᑲᐧᐩ; ᑲᐦᑭᔭᐤ ᐊᐃᐧᔭᐠ ᑳ ᐃᐦᑕᓯᔦᐠ ᑭᑕ ᒥᔨᐟ ᑖᐱᑌᐱᓱᓇ ᑳ ᑭ ᒪᓂᐊᐧᑌᐟ. (ᐊᔨᐢ ᐅᓵᐃᐧᓱᓂᔮᐃᐧ ᑖᐱᑌᐱᓱᓇ ᑭ ᑭᑭᐢᑲᐁᐧᔨᐊᐧ ᐃᐧᔭ ᐁ ᐃᐢᒣᐃᓬᐊᐃᑎᐃᐧᔨᐟ.) 25ᑭ ᓇᐢᑫᐧᐊᐧᓯᒥᐠ ᒫᑲ, ᑭ ᑲ ᒥᔨᑎᓈᐣ ᒫᓇ ᒫᑲ, ᑭ ᑕᓭᐧᑲᐢᑖᐊᐧᐠ ᒫᑲ ᒥᐢᑯᑖᑲᐩ, ᐁᑯᓯ ᐁᑯᑕ ᑲᐦᑭᔭᐤ ᐊᐃᐧᔭᐠ ᑭ ᐃᓯᐁᐧᐱᓀᐤ ᑖᐱᑌᐱᓱᓇ ᑳ ᑭ ᒪᓂᐊᐧᑌᐟ. 26ᑭ ᐃᐢᐱᑎᓂᑯᑎᔨᐊᐧ ᒫᑲ ᐊᓂᐦᐃ ᐅᓵᐃᐧᓱᓂᔮᐃᐧ ᑖᐱᑌᐱᓱᓇ ᑳ ᑭ ᓇᑐᑕᒪᐋᐧᐟ ᑭᐦᒋᒥᑖᐦᑐᒥᑕᓇᐤ ᐊᔨᐋᐧᐠ ᑌᐸᑯᐹᐧᐤ ᒥᑖᐦᑐᒥᑕᓇᐤ ᓭᑭᓬᐊ ᐅᓵᐃᐧᓱᓂᔮᐋᐧᐱᐢᐠ; ᐋᑕᐃᐧᔭ ᒥᓇ ᐊᐧᐁᐧᓯᐅᐃᐧᓇ, ᒥᓇ ᑖᐱᐢᑳᑲᓇ, ᒥᓇ ᑳ ᒥᔮᐧᓯᑭ ᒥᐦᑫᐧ ᑭᓀᐧᓵᑲᔭ ᑳ ᑭ ᑭᑭᐢᑲᐦᑭᐠ ᒥᑎᔭᐣ ᑭᐦᒋ ᐅᑭᒫᐊᐧᐠ, ᒥᓇ ᑖᐱᐢᑭᑲᓀᔮᐱᔭ ᑳ ᑭ ᑖᐱᐢᑲᒥᔨᐟ ᐅ ᐱᐢᑳᐧᐃᐧᑲᓀᒥᔨᐊᐧ. 27ᑭᑎᔭᐣ ᒫᑲ ᐁᐊᐧᑫᐧᔨᐤ ᐅᐦᒋ ᑭ ᐅᓯᐦᑖᐤ ᐁᐦᐸᐟ, ᑭ ᐊᐢᑖᐤ ᒫᑲ ᐅᐟ ᐅᑌᓈᕽ, ᐋᐦᐸᕒᐊ ᐅᑎ; ᑲᐦᑭᔭᐤ ᐃᐢᕒᐁᐃᓬ ᒫᑲ ᑭ ᐊᐧᔭᒑᐁᐧᔨᑕᒪᐧᐠ ᐁᑯᑕ; ᐁᑯᓯ ᑭ ᐊᐧᓈᐃᐠ ᑭᑌᔭᐣ ᒥᓇ ᐊᓂᐦᐃ ᐃᐧᑭᕽ ᑳ ᐊᔮᔨᐟ.
28ᐁᑯᓯ ᒥᑎᔭᐣ ᑭ ᐃᓯ ᓵᑯᒋᐋᐊᐧᐠ ᐅᐦᑎᐢᑲᐤ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐁᑯᓯ ᓇᒪᐃᐧᑳᐨ ᒥᓇ ᑭ ᐅᐦᐱᐢᑫᐧᔨᐊᐧᐠ. ᑭ ᐯᔭᑕᑲᐣ ᒫᑲ ᐊᐢᑭ ᓀᒥᑕᓇᐤ ᑕᐦᑐ ᐊᐢᑭᐃᐧᐣ ᒣᑳᐧᐨ ᐁ ᐱᒫᑎᓯᐟ ᑭᑎᔭᐣ.
29ᐁᑯᓯ ᒉᕒᐊᐯᐊᓬ ᐅᑯᓯᓴ ᒍᐋᐢ ᑭ ᓇᑕᐃᐧ ᐊᔮᐤ ᐃᐧᔭ ᐅ ᐋᐧᐢᑳᐦᐃᑲᓂᕽ. 30ᑭᑎᔭᐣ ᒫᑲ ᑌᐸᑯᐦᐳᒥᑕᓇᐤ ᑭ ᐃᑕᓯᔨᐊᐧ ᐅᑯᓯᓴ ᐃᐧᔭᐃᐧᕽ ᐁ ᐅᐦᒋᔨᐟ ᒋᑫᒫ ᑭ ᒥᐦᒉᑐᐢᑫᐧᐁᐧᐤ. 31ᐁᑯᓯ ᐅ ᑲᓇᐃᐧᐢᑫᐧᐋᐧᓇ ᐊᓂᑕ ᓯᑫᒼ ᑳ ᐊᔮᔨᐟ, ᐁᐊᐧᑯᓂ ᒥᓇ ᑭ ᓂᐦᑖᐃᐧᑭᑕᒫᐠ ᐁ ᐅᑯᓯᓯᐟ, ᐁᑯᓯ ᐊᐱᒥᓬᐃᐠ ᑭ ᐃᓯᔨᐦᑳᑌᐤ. 32ᑭᑎᔭᐣ ᒫᑲ ᐅᑯᓯᓴ ᒍᐋᐢ ᑭ ᐳᓂ ᐱᒫᑎᓯᐤ ᒪᒥᔦᐧ ᐁ ᑭᓭᔨᓂᐃᐧᐟ, ᑭ ᓇᐦᐃᓈᐤ ᒫᑲ ᐅ ᓇᐦᐃᓂᑐᐃᐧᑲᒥᑯᔨᕽ ᒍᐋᓴ ᐅᑖᐃᐧᔭ ᐁᑯᑕ ᐋᐦᐸᕒᐊ ᑳ ᐊᔮᒋᐠ ᐋᐱᔨᓴᕒᐊᐃᑕᐠ.
33ᑭ ᐊᔨᑭᐣ ᒫᑲ ᓭᒫᐠ ᑭᑎᔭᐣ ᐁ ᐳᓂ ᐱᒫᑎᓯᐟ, ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒥᓇ ᑭ ᑫᐧᐢᑭᐊᐧᐠ, ᐁᑯᓯ ᑭ ᐊᐧᔭᒑᐁᐧᔨᒣᐊᐧᐠ ᐯᐊᓬᐃᒼ, ᒥᓇ ᐯᐊᓬᐯᕒᐃᐦᐟ ᑭ ᐅᑎᓀᐊᐧᐠ ᑭᑕ ᐅ ᒪᓂᑐᒥᒋᐠ. 34ᐊᓂᑭ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᓇᒪᐃᐧᔭ ᑭ ᑭᐢᑭᓯᑐᑕᐁᐧᐊᐧᐠ ᑳ ᑎᐯᔨᐦᒋᑫᔨᐟ ᐅ ᑭᓭᒪᓂᑐᒥᐋᐧᐊᐧ ᑳ ᑭ ᐸᐢᐱᐦᐃᑯᒋᐠ ᐅᒋᐦᒋᔨᕽ ᐅ ᓄᑎᓈᑲᓂᐋᐧᐊᐧ ᐅᐦᒋ ᒥᓯᐁᐧ ᐃᑌ; 35ᐊᐦᐳ ᓇᒪᐃᐧᔭ ᐋᐧᐸᐦᑕᐦᐁᐊᐧᐠ ᑭᓭᐋᐧᑎᓯᐃᐧᐣ ᐊᓂᐦᐃ ᐅ ᐋᐧᐢᑳᐦᐃᑲᓂᔨᕽ ᒉᕒᐊᐯᐊᓬᐊ, ᐁᐊᐧᑯ ᑭᑎᔭᐣ, ᐋᑕ ᐊᓂᒪ ᒥᔪᑐᑖᑫᐃᐧᐣ ᑳ ᑭ ᐃᓯ ᐋᐧᐸᐦᑕᐦᐋᐟ ᐃᐢᕒᐁᐃᓬᐊ.
Currently Selected:
ᐅᔭᓱᐁᐧᐊᐧᐠ 8: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
