ᐅᔭᓱᐁᐧᐊᐧᐠ 9
9
1ᐊᐱᒥᓬᐃᐠ ᒫᑲ ᐅᑯᓯᓴ ᒉᕒᐊᐯᐊᓬ ᑭ ᐃᑐᐦᑌᐤ ᓯᑫᒥᕽ ᐁ ᓇᑕᐋᐧᐸᒫᐟ ᐅᑳᐃᐧᔭ ᐃᐧᒋᓵᓂᔨᐊᐧ, ᐁᑯᓯ ᑭ ᐊᔭᒥᐦᐁᐤ ᐁᐊᐧᑯᓂ, ᒥᓇ ᑲᐦᑭᔭᐤ ᑳ ᐋᐧᑯᒪᔨᐟ ᐊᓂᐦᐃ ᐅ ᐋᐧᐢᑳᐦᐃᑲᓂᔨᕽ ᐅᑳᐃᐧᔭ ᐅᑖᐃᐧᔨᐊᐧ, ᐁ ᐃᑖᐟ, 2ᐱᑭᐢᑫᐧᐠ ᑭ ᐸᑯᓭᔨᒥᑎᓈᐋᐧᐤ, ᑭᑕ ᐯᐦᑕᐦᑭᐠ ᑲᐦᑭᔭᐤ ᓯᑫᒼ ᐊᔨᓯᔨᓂᐊᐧᐠ, ᑖᓈᓂᒪ ᓇᐊᐧᐨ ᑫ ᒥᔮᐧᐸᒋᐃᑯᔦᐠ, ᑲᐦᑭᔭᐤ ᐅᑯᓯᓴ ᒉᕒᐊᐯᐊᓬ, ᑌᐸᑯᐦᐳᒥᑕᓇᐤ ᑳ ᐃᐦᑕᓯᒋᐠ, ᑭᑕ ᑎᐯᔨᒥᑯᔦᑯᐠ, ᐊᐦᐳ ᐯᔭᐠ ᑭᑕ ᑎᐯᔨᒥᑯᔦᐠ? ᑲᓄᑭᐢᑭᓯᐠ ᒥᓇ ᓂᔭ ᑭᐢᑲᓂᐋᐧᐤ ᒥᓇ ᑭ ᐃᐧᔮᓯᐋᐧᐤ. 3ᐅᑳᐃᐧᔭ ᒫᑲ ᐅᒋᐋᐧᒥᔨᐊᐧ ᑭ ᐱᑭᐢᑫᐧᔨᐊᐧ ᐁ ᐯᑖᑯᔨᐟ ᑲᐦᑭᔭᐤ ᓯᑭᒼ ᐊᔨᓯᔨᓂᐊᐧ ᑲᐦᑭᔭᐤ ᐅᐦᐃ ᐁ ᐃᑌᐧᒋᐠ; ᑭ ᐃᓯᑌᐦᐁᐊᐧᐠ ᒫᑲ ᑭᑕ ᐱᒥᑎᓴᐋᐧᒋᐠ ᐊᐱᒥᓬᐃᑲ; ᒋᑫᒫ ᑭ ᐃᑌᐧᐊᐧᐠ, ᐁᐊᐧᑯ ᑭᒋᐋᐧᒥᓇᐤ, 4ᑭ ᒥᔦᐊᐧᐠ ᒫᑲ ᑌᐸᑯᐦᐳᒥᑕᓇᐤ ᑕᐦᑖᐧᐱᐢᐠ ᐋᐧᐱᐢᑭᓱᓂᔮᐊᐧ ᐅ ᐋᐧᐢᑳᐦᐃᑲᓂᔨᕽ ᐅᐦᒋ ᐯᐊᓬᐯᕒᐃᐦᐟ, ᐁᑯᓯ ᐁᐊᐧᑯᓂ ᐅᐦᒋ ᐊᐱᒥᓬᐃᐠ ᑭ ᒪᓯᓇᐦᐃᑫᐁᐤ ᐱᑯᓇᑕ ᒥᓇ ᐱᐃᐧᐊᔨᓯᔨᓂᐊᐧ ᑳ ᐱᒥᑎᓴᐦᐅᑯᐟ. 5ᑭ ᐃᑐᐦᑌᐤ ᒫᑲ ᐅᑖᐃᐧᔭ ᐅ ᐋᐧᐢᑳᐦᐃᑲᓂᔨᕽ ᐊᓂᑕ ᐋᐦᐸᕒᐊ ᐁᑯᓯ ᑭ ᓂᐸᐁᐤ ᐅᒋᐋᐧᒪ ᐅᑯᓯᓯᔨᐊᐧ ᒉᕒᐊᐱᐊᓬ, ᑌᐸᑯᐦᐳᒥᑕᓇᐤ ᐊᔨᓯᔨᓂᐊᐧᐠ, ᐯᔭᐠ ᐊᓯᓂᕽ; ᒫᑲ ᒑᐦᑖᒼ ᐅᓯᒥᒫᐊᐧ ᐅᑯᓯᓴ ᒉᕒᐊᐯᐊᓬ ᑭ ᐃᐢᑯᐋᐤ; ᒋᑫᒫ ᑭ ᑳᓱ.
6ᑲᐦᑭᔭᐤ ᒫᑲ ᓯᑫᒼ ᐊᔨᓯᔨᓂᐊᐧᐠ ᑭ ᒫᒪᐃᐧ ᒫᐊᐧᒋᐦᐃᑐᐊᐧᐠ, ᒥᓇ ᑲᐦᑭᔭᐤ ᐅ ᐋᐧᐢᑳᐦᐃᑲᓂᔨᕽ ᒥᓬᐅ, ᐁᑯᓯ ᑭ ᓇᑕᐃᐧ ᑭᐦᒋ ᐅᑭᒫᑳᑌᐊᐧᐠ ᐊᐱᒥᓬᐃᑲ ᒋᑭ ᒪᐢᑲᐋᐧᑎᑯᕽ ᒋᒪᒋᑲᐣ ᑳ ᐊᔮᐠ ᐊᓂᑕ ᓯᑫᒼ.
7ᐃᐢᐱ ᒫᑲ ᑳ ᐃᐧᐦᑕᒪᐋᐧᒋᐠ ᒑᐦᑖᒪ, ᑭ ᓇᑕᐃᐧ ᓂᐸᐃᐧᐤ ᑕᑯᑖᒪᑎᐣ ᑫᕒᐃᓯᒼ ᐊᐧᒋᕽ, ᐁᑯᓯ ᑭ ᐯᐦᑖᑯᓯᐤ ᐁ ᑭ ᑌᐯᐧᐟ, ᒥᓇ ᐁ ᑭ ᐃᑖᐟ, ᓇᑐᐦᑕᐃᐧᐠ ᑭᔭᐋᐧᐤ ᓯᑫᒼ ᐊᔨᓯᔨᓂᑎᐠ, ᑭᓭᒪᓂᑐ ᑭᑕ ᓇᑐᐦᑖᑯᔦᐠ. 8ᒥᐢᑎᑲᐧ ᑲᔮᐢ ᑭ ᓯᐯᐧᑌᐊᐧᐠ ᑭᑕ ᐅᔭᑭᒫᒋᐠ ᑭᑕ ᐅ ᑭᐦᒋ ᐅᑭᒫᒥᒋᐠ; ᐁᑯᓯ ᑭ ᐃᑌᐊᐧᐠ ᐋᓬᐃᑊ ᐱᒥᐋᐧᑎᑲᐧ, ᑭᔭ ᑎᐯᔨᒥᓈᐣ. 9ᒫᑲ ᐊᓇ ᐋᓬᐃᑊ ᐱᒥᐋᐧᑎᐠ ᑭ ᐃᑌᐤ, ᓂ ᑲ ᓇᑲᑌᐣ ᒋ ᓂ ᐃᐧᔨᓄᐃᐧᐃᐧᐣ, ᐃᑕ ᓂᔭ ᐅᐦᒋ ᑳ ᑭᐦᒋᑐᑕᐋᐧᒋᐠ ᑭᓭᒪᓂᑐᐊᐧ ᒥᓇ ᐊᔨᓯᔨᓂᐊᐧ ᓂᔭ ᑭᑕ ᓇᑕᐃᐧ ᐁᐧᐁᐧᐸᓯᔮᐣ ᐁ ᐊᔨᐃᐧᐢᑲᐊᐧᑭᐠ ᒥᐢᑎᑲᐧᐠ? 10ᐁᑯᓯ ᒥᐢᑎᑲᐧᐠ ᑭ ᐃᑌᐊᐧᐠ ᐊᓂᐦᐃ ᒥᓯ ᓱᒥᓈᑎᑲᐧ, ᑭᔭ ᐯ ᓇᑕᐃᐧ ᑎᐯᔨᒥᓈᐣ. 11ᒫᑲ ᐊᓇ ᒥᓯ ᓱᒥᓈᑎᐠ ᑭ ᐃᑌᐤ, ᓂ ᑲ ᓇᑲᑌᐣ ᒋ ᑳ ᐃᓯ ᐃᐧᐦᑫᔨᒥᑲᐃᐧᔮᐣ, ᒥᓇ ᓂ ᒥᔪ ᒥᓂᓯᐃᐧᐃᐧᐣ ᑭᑕ ᓇᑕᐃᐧ ᐁᐧᐁᐧᐸᓯᔮᐣ ᐁ ᐊᔨᐃᐧᐢᑲᐊᐧᑭᐠ ᒥᐢᑎᑲᐧᐠ? 12ᐁᑲᐧ ᒥᐢᑎᑲᐧᐠ ᑭ ᐃᑌᐊᐧᐠ ᓱᒥᓈᑎᑲᐧ, ᑭᔭ ᐯ ᓇᑕᐃᐧ ᑎᐯᔨᒥᓈᐣ. 13ᐁᑯᓯ ᓱᒥᓈᑎᐠ ᑭ ᐃᑌᐤ, ᓂ ᑲ ᓇᑲᑌᐣ ᒋ ᓂ ᓱᒥᓈᐳᒼ ᑳ ᒥᔪᑌᐦᐁᐢᑳᑯᐟ ᒪᓂᑐ ᒥᓇ ᐊᔨᓯᔨᓂᐤ, ᑭᑕ ᓇᑕᐃᐧ ᐁᐧᐁᐧᐹᓯᔮᐣ ᐁ ᐊᔨᐃᐧᐢᑲᐊᑭᐠ ᒥᐢᑎᑲᐧᐠ? 14ᐁᑲᐧ ᑲᐦᑭᔭᐤ ᒥᐢᑎᑲᐧᐠ ᑭ ᐃᑌᐊᐧᐠ ᒥᓯᑳᐃᐧᒥᓇᑲᓯᔭ, ᑭᔭ ᐯ ᓇᑕᐃᐧ ᑎᐯᔨᒥᓈᐣ. 15ᐁᑯᓯ ᒥᓯᑳᐃᐧᒥᓇᑲᓯᐊᐧᑎᐠ ᑭ ᐃᑌᐤ ᒥᐢᑎᑲᐧ, ᑭᐢᐱᐣ ᑖᐯᐧ ᐅᔭᑭᒥᔦᑯ ᓂᔭ ᑭᑕ ᐅ ᑭᐦᒋ ᐅᑭᒫᒥᔦᐠ, ᐁᑲᐧ ᐯ ᓇᑕᐃᐧ ᐊᐢᐯᔨᒧᐠ ᓂᐟ ᐋᑲᐋᐧᐢᑌᐢᑳᑫᐃᐧᐣ; ᒫᑲ ᑭᐢᐱᐣ ᓇᒪᐃᐧᔭ, ᑭᔮᒼ ᐃᐢᑯᑌᐤ ᒥᓯᑳᐃᐧᒥᓇᑲᓯᔭᑎᑯᕽ ᑭᑕ ᐅᐦᒋᐸᔨᐤ, ᑭᑕ ᒣᐢᑎᑲᓱᑯᒋᐠ ᒫᓯᑭᐢᑳᑎᑲᐧᐠ ᓬᐁᐱᓇᓂᕽ. 16ᐁᑲᐧ ᒫᑲ, ᑭᐢᐱᐣ ᑖᐯᐧ ᒥᓇ ᑲᐧᔭᐢᐠ ᑳ ᐃᑐᑕᒧᐁᐧᑫᐧ ᐊᓂᒪ ᐊᐱᒥᓬᐃᐠ ᑳ ᑭ ᑭᐦᒋ ᐅᑭᒫᑫᔦᐠ, ᒥᓇ ᑭᐢᐱᐣ ᑳ ᒥᔪᑐᑕᐋᐧᐁᐧᑫᐧ ᒉᕒᐊᐯᐊᓬ ᒥᓇ ᐊᓂᐦᐃ ᐅ ᐋᐧᐢᑲᐦᐃᑲᓂᕽ ᑳ ᐊᔮᔨᐟ, ᒥᓇ ᑳ ᐃᑐᑕᐋᐧᐁᐧᑫᐧ ᐁ ᑭ ᐃᓯ ᑲᐢᑭᑕᒫᓱᐟ ᑳ ᑭ ᐃᑐᑕᕽ; 17(ᒋᑫᒫ ᓄᑖᐃᐧ ᑭ ᑭ ᓄᑎᓂᑫᐢᑕᒫᑯᐋᐧᐤ, ᒥᓇ ᓇᒪᐃᐧᔭ ᑭ ᒪᓈᒋᐦᑖᐤ ᐅ ᐱᒫᑎᓯᐃᐧᐣ, ᒥᓇ ᑭ ᑭ ᐸᐢᐱᐦᐃᑯᐋᐧᐤ ᐅᒋᐦᒋᔨᕽ ᒥᑎᔭᓇ ᐅᐦᒋ; 18ᐁᑲᐧ ᒫᑲ ᑭ ᐸᓯᑯᐢᑕᒫᐧᓈᐋᐧᐤ ᓄᑖᐃᐧ ᐅ ᐋᐧᐢᑳᐦᐃᑲᐣ ᐊᓄᐦᐨ ᑳ ᑭᓯᑳᐠ, ᒥᓇ ᑭ ᑭ ᓂᐸᐃᒫᐋᐧᐊᐧ ᐅᑯᓯᓴ ᑌᐸᑯᐦᐳᒥᑕᓇᐤ ᐊᔨᓯᔨᓂᐊᐧ ᐯᔭᐠ ᐊᓯᓂᕽ, ᐁᑯᓯ ᑭ ᑭ ᐅᔭᑭᒫᐋᐧᐤ ᐊᐱᒥᓬᐃᐠ, ᐅᐟ ᐊᑐᐢᑫᔮᑲᓂᐢᑫᐧᒪ ᐅᑯᓯᓯᔨᐊᐧ, ᑭᑕ ᐅ ᑭᐦᒋ ᐅᑭᒫᒥᒋᐠ ᓯᑭᒼ ᐊᔨᓯᔨᓂᐊᐧᐠ, ᐁ ᐅᒋᐋᐧᒥᔦᐠ ᐅᐦᒋ;) 19ᑭᐢᐱᐣ ᒫᑲ ᑖᐯᐧ ᒥᓇ ᑲᐧᔭᐢᐠ ᑳ ᐊᔨᑐᑕᐋᐧᐁᐧᑫᐧ ᒉᕒᐊᐯᐊᓬ ᒥᓇ ᐅ ᐋᐧᐢᑳᐦᐃᑲᓂᕽ ᑳ ᐊᔮᔨᐟ ᐊᓄᐦᐨ ᑳ ᑭᓯᑳᐠ, ᐁᑲᐧ ᐊᐱᒥᓬᐃᐠ ᑭ ᑲ ᐃᐧ ᒪᒪᐦᑖᑯᐃᑯᐋᐧᐤ ᒥᓇ ᑭᔭᐋᐧᐤ ᑭ ᑲ ᐃᐧ ᒪᒪᐦᑖᑯᐋᐋᐧᐤ; 20ᒫᑲ ᑭᐢᐱᐣ ᓇᒪᐃᐧᔭ, ᑭᔮᒼ ᐃᐢᑯᑌᐤ ᑭᑕ ᐅᐦᒋᐸᔨᐤ ᐊᐱᒥᓬᐃᐠ ᐁᑯᓯ ᑭᑕ ᓂᓯᐊᐧᓈᒋᐦᐃᑯᒋᐠ ᓯᑫᒼ ᐊᔨᓯᔨᓂᐊᐧᐠ ᒥᓇ ᐅ ᐋᐧᐢᑳᐦᐃᑲᓂᕽ ᒥᓬᐅ ᐅᐦᒋ ᑭᑕ ᓂᓯᐊᐧᓈᒋᐦᐃᑯᐟ ᐊᐱᒥᓬᐃᐠ. 21ᒑᐦᑖᒼ ᒫᑲ ᑭ ᓯᐯᐧᐸᑖᐤ ᒥᓇ ᑭ ᑕᐸᓯᐤ, ᑭ ᐃᑐᐦᑌᐤ ᐱᐊᕒ, ᐁᑯᑕ ᒫᑲ ᑭ ᐊᔮᐤ ᐁ ᑯᐢᑖᐟ ᐊᐱᒥᓬᐃᑲ ᐅᒋᐋᐧᒪ.
22ᐊᐱᒥᓬᐃᐠ ᒫᑲ ᓂᐢᑐ ᐊᐢᑭ ᑭ ᑭᐦᒋ ᐅᑭᒫᑲᑕᐁᐧᐤ ᐃᐢᕒᐁᐃᓬᐊ. 23ᑭᓭᒪᓂᑐ ᒫᑲ ᑭ ᐃᓯᑎᓴᐁᐧᐤ ᒪᒋ ᐊᐦᒑᐦᑲᐧ ᑭᑕ ᐊᐧᓈᐃᑯᒋᐠ ᐊᐱᒥᓬᐃᐠ ᒥᓇ ᓯᑭᒼ ᐊᔨᓯᔨᓂᐊᐧᐠ; ᐊᓂᑭ ᒫᑲ ᓯᑭᒼ ᐊᔨᓯᔨᓂᐊᐧᐠ ᑭ ᑲᔦᔨᓯᑲᑕᐁᐧᐊᐧᐠ ᐊᐱᒥᓬᐃᑲ. 24ᐊᓂᒪ ᑳ ᑭ ᐃᓯ ᑭᑎᒪᐦᐃᒥᐦᐟ ᑌᐸᑯᐦᐳᒥᑕᓇᐤ ᐅᑯᓯᓴ ᒉᕒᐊᐯᐊᓬ ᑭᑕ ᐅᑎᐦᒋᐸᔨᐠ, ᒥᓇ ᐅ ᒥᐦᑯᐋᐧᐤ ᑭᑕ ᐸᑲᒥᐢᑳᑯᔨᐟ ᐊᐱᒥᓬᐃᐠ ᐅᒋᐋᐧᒥᐋᐧᐊᐧ ᑳ ᑭ ᓂᐸᐦᐃᑯᒋᐠ, ᒥᓇ ᐊᓂᐦᐃ ᓯᑭᒼ ᐊᔨᓯᔨᓂᐊᐧ ᑳ ᑭ ᐃᐧᒋᐦᐋᒋᐠ ᐁ ᓂᐸᐦᐋᔨᐟ ᐅᒋᐋᐧᒥᔨᐊᐧ. 25ᐊᓂᑭ ᒫᑲ ᓯᑭᒼ ᐊᔨᓯᔨᓂᐊᐧᐠ ᑭ ᐸᑭᑎᓀᐊᐧᐠ ᐅᑕᐢᑲᒫᒋᑫᐊᐧ ᑭᑕ ᐊᓱᐅᑯᐟ ᑕᐦᑯᑖᒪᑎᐣ ᐊᐧᒋᕽ ᑭ ᒫᒪᐢᑲᒣᐊᐧᐠ ᒫᑲ ᑲᐦᑭᔭᐤ ᐊᐃᐧᔭ ᐁᑯᑕ ᑳ ᐯ ᐱᒧᐦᑌᔨᐟ ᐃᑕ ᐁ ᐊᔮᒋᐠ; ᑭ ᐃᐧᐦᑕᒪᐋᐧᐤ ᒫᑲ ᐊᐱᒥᓬᐃᐠ.
26ᐁᑯᓯ ᑫᐊᓬ ᐅᑯᓯᓴ ᐃᐯᐟ ᑭ ᐯ ᐃᐧᒉᐁᐧᐤ ᐅᒋᐋᐧᒪ, ᑭ ᐊᑎ ᐃᑐᐦᑌᐤ ᒫᑲ ᓯᑭᒥᕽ; ᐁᑯᓯ ᓯᑭᒼ ᐊᔨᓯᔨᓂᐊᐧᐠ ᑭ ᒪᒥᓯᑐᑕᐁᐧᐊᐧᐠ. 27ᑭᐢᑎᑳᓂᕽ ᒫᑲ ᑭ ᐃᑐᐦᑌᐊᐧᐠ, ᒥᓇ ᑭ ᒪᐃᐧᓱᐊᐧᐠ ᐅ ᓱᒥᓂᑭᐢᑎᑳᓂᐋᐧᐊᐧ, ᐁᑯᓯ ᑭ ᑕᒪᑯᐢᑲᐁᐧᐊᐧᐠ ᓱᒥᓂᓴ ᒥᓇ ᑭ ᒥᔭᐋᐧᑎᑯᑖᐊᐧᐠ, ᑭ ᐱᐦᑐᑫᐊᐧᐠ ᒫᑲ ᐅ ᐋᐧᐢᑳᐦᐃᑲᓂᔨᕽ ᐅ ᒪᓂᑐᒥᐋᐧᐊᐧ, ᐁᑯᓯ ᑭ ᒥᒋᓱᐊᐧᐠ ᒥᓇ ᑭ ᒥᓂᐦᑫᐧᐊᐧᐠ ᒥᓇ ᑭ ᒫᒪᒋᐃᑌᐊᐧᐠ ᐊᐱᒥᓬᐃᑲ. 28ᑫᐊᓬ ᒫᑲ ᐅᑯᓯᓴ ᐃᐯᐟ ᑭ ᐃᑌᐧᐤ, ᐊᐁᐧᓇ ᐊᓇ ᐊᐱᒥᓬᐃᐠ, ᒥᓇ ᐊᐁᐧᓇ ᐊᓇ ᓯᑭᒼ, ᑭᑕ ᐊᑐᐢᑲᐋᐧᔭᕽ? ᓇᒪ ᒋ ᐁᐊᐧᑯᓂ ᐅᑯᓯᓴ ᒉᕒᐊᐯᐊᓬ? ᒥᓇ ᓯᐸᓬ ᐁᐊᐧᑯᓂ ᐅ ᓯᒫᑲᓂᓯᐃᐧᑭᒫᒪ? ᑭᔮᒼ ᐊᑐᐢᑳᑯᐠ ᐅᐟ ᐊᔨᓯᔨᓂᒪ ᐦᐁᒪᕒ ᐅᑖᐃᐧᔭ ᓯᑫᒼ; ᒫᑲ ᑫᑲᐧᐩ ᐅᐦᒋ ᐃᐧᔭ ᑫ ᐊᑐᐢᑲᐋᐧᔭᕽ? 29ᒥᓇ ᐱᑕᓀ ᑭ ᐃᑌᔨᑕᕽ ᑭᓭᒪᓂᑐ ᓂᔭ ᑭᑕ ᐸᒥᓇᑭᐠ ᐅᑭ ᐊᔨᓯᔨᓂᐊᐧᐠ! ᐁᑲᐧ ᓂ ᑳᐦ ᐃᑲᑌᓈᐤ ᐊᐱᒥᓬᐃᐠ. ᑭ ᐃᑌᐤ ᒫᑲ ᐊᐱᒥᓬᐃᑲ, ᐊᔨᐋᐧᐠ ᒥᐦᒉᑐᐃᐠ ᑯᓄᑎᓂᑫᒪᐠ ᐯ ᐊᐧᔭᐃᐧ ᒫᑲ.
30ᐃᐢᐱ ᒫᑲ ᓯᐸᓬ ᑳ ᑎᐯᔨᐦᑕᕽ ᐅᑌᓇᐤ ᑳ ᐯᐦᑕᕽ ᐅᐟ ᐃᑌᐧᐃᐧᓂᔨᐊᐧ ᑫᐊᓬ ᐅᑯᓯᓴ ᐃᐯᐟ, ᑭ ᑭᓯᐁᐧᔨᑕᒼ. 31ᑭᒧᐨ ᒫᑲ ᑭ ᐃᓯᑎᓴᐦᐊᒪᐁᐧᐤ ᐊᐱᒥᓬᐃᑲ ᐅᑖᒋᒧᐊᐧ, ᐁ ᐃᑌᐧᐟ, ᒫᑎᑲ, ᑫᐊᓬ ᐅᑯᓯᓴ ᐃᐯᐟ ᒥᓇ ᐅᒋᐋᐧᒪ ᑕᑯᓯᓇᐧᐠ ᓯᑫᒥᕽ; ᐁᑯᓯ ᒫᑎᑲ, ᓯᑭᐢᑲᐁᐧᐊᐧᐠ ᐅᑌᓈᕽ ᑭᑕ ᓈᐣᑕᐤ ᐃᑐᑖᐢᑭᐠ. 32ᐁᑲᐧ ᒫᑲ, ᓯᐯᐧᑌᐠ ᓂᐹᑎᐱᐢᐠ, ᑭᔭ ᒥᓇ ᐊᔨᓯᔨᓂᐊᐧᐠ ᑳ ᐃᐧᒉᐃᐧᐢᑭᐠ, ᐁᑯᓯ ᐊᐢᑲᒫᑯᐠ ᑭᐢᑎᑳᓂᕽ; 33ᑭᑕ ᐃᐦᑭᐣ ᒫᑲ ᑫᑭᓭᐹᔮᑭ ᓭᒫᐠ ᓵᑳᐢᑌᑭ, ᐃᐧᐸᐨ ᑭ ᑲ ᐊᐧᓂᐢᑳᐣ, ᐁᑯᓯ ᑭ ᑲ ᒧᐢᑭᐢᑌᐣ ᐅᑌᓇᐤ; ᐁᑯᓯ ᒫᑎᑲ, ᐃᐢᐱ ᐃᐧᔭ ᒥᓇ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ ᐯ ᐊᐧᔭᐃᐧᑐᑖᑯᔦᑳᐧᐃᐧ, ᐁᑲᐧ ᑭ ᑲ ᑭ ᐃᑐᑕᐋᐧᐋᐧᐊᐧᐠ ᑫ ᐃᓯ ᓇᐃᐸᔨᐃᑯᔦᐠ.
34ᐊᐱᒥᓬᐃᐠ ᒫᑲ ᑭ ᐊᐧᓂᐢᑳᐤ ᒥᓇ ᑲᐦᑭᔭᐤ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ, ᓂᐸᑎᐱᐢᐠ, ᑭ ᐊᐢᑲᒪᐋᐧᑕᒪᐧᐠ ᒫᑲ ᓯᑫᒼ ᐁ ᓀᐊᐧᔭᑭᓯᒋᐠ. 35ᑫᐊᓬ ᒫᑲ ᐅᑯᓯᓴ ᐃᐯᐟ ᑭ ᐊᐧᔭᐃᐧᐤ, ᒥᓇ ᑭ ᓂᐸᐃᐧᐤ ᐁ ᐊᑎ ᐱᐦᑐᑫᕽ ᑭᐦᒋᐃᐢᑳᐧᑌᒼ ᐅᑌᓈᕽ; ᐁᑯᓯ ᐊᐱᒥᓬᐃᐠ ᑭ ᐸᓯᑯ ᐊᓯᒋ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ ᐁ ᐊᐢᑲᒫᒋᑫᒋᐠ. 36ᐃᐢᐱ ᒫᑲ ᑫᐊᓬ ᐃᐧᔮᐸᒫᐟ ᐊᔨᓯᔨᓂᐊᐧ, ᑭ ᐃᑌᐤ ᓯᐸᓬᐊ, ᒋᐢᐟ, ᐯ ᓂᑖᒪᒋᐁᐧᐊᐧᐠ ᐊᔨᓯᔨᓂᐊᐧᐠ ᑕᐦᑯᑖᒪᑎᐣ ᐅᐦᒋ. ᓯᐸᓬ ᒫᑲ ᑭ ᐃᑌᐤ, ᐊᔨᓯᔨᓂᐊᐧᐠ ᑭᐟ ᐃᓯᓀᐣ ᐊᐧᒋᔭ ᐁ ᒋᑲᐢᑌᑎᑭ. 37ᑫᐊᓬ ᒫᑲ ᒥᓇ ᑭ ᐱᑭᐢᑫᐧᐤ ᐁᑯᓯ ᑭ ᐃᑌᐧᐤ, ᐋᐧᐸᒥᐠ, ᐯ ᐃᑐᐦᑌᐊᐧᐠ ᐊᔨᓯᔨᓂᐊᐧᐠ ᑖᐊᐧᔨᕽ ᐊᐢᑭᑳᓂᕽ, ᐁᑲᐧ ᒥᓇ ᐯᔭᑲᐧᔭᐠ ᐁ ᒥᓀᔭᑎᒋᐠ ᐯ ᐃᑐᐦᑌᐊᐧᐠ ᒥᐋᓂᓂᒼ ᒪᐢᑯᑌᕽ. 38ᐁᑲᐧ ᓯᐸᓬ ᑭ ᐃᑌᐤ, ᑖᓂᐁᐧ ᐁᑲᐧ ᑭᑐᐣ ᑳ ᑭ ᐃᑌᐧᔭᐣ, ᐊᐁᐧᓈᓇ ᐊᐱᒥᓬᐃᐠ, ᑭᑕ ᐊᑐᐢᑲᐋᐧᔭᕽ? ᓇᒪ ᒋ ᐁᐊᐧᑯᓂᐠ ᐅᑭ ᐊᔨᓯᔨᓂᐊᐧᐠ ᑳ ᑭ ᒫᔦᔨᒪᒋᐠ? ᒫᐦᑎ ᐁᑲᐧ ᐊᐧᔭᐃᐧ ᒥᓇ ᓇᑕᐃᐧ ᓄᑎᓂᐠ. 39ᑫᐊᓬ ᒫᑲ ᑭ ᐊᐧᔭᐃᐧᐤ ᐁ ᓂᑳᓄᑕᐋᐧᐟ ᓯᑫᒼ ᐊᔨᓯᔨᓂᐊᐧ, ᐁᑯᓯ ᑭ ᓄᑎᓀᐤ ᐊᐱᒥᓬᐃᑲ. 40ᐊᐱᒥᓬᐃᑲ ᒫᑲ ᑭ ᓯᐯᐧᔮᒧᑳᑎᐠ, ᑭ ᑕᐸᓯᐦᐁᐤ ᒫᑲ, ᒥᐦᒉᐟ ᒫᑲ ᑭ ᐸᐦᑭᓯᓇᐧᐠ ᐁ ᒥᓵᐧᑲᓂᑳᑎᒋᐠ, ᐱᔨᐢ ᐁ ᐊᑎ ᐱᐦᑐᑫᕽ ᑭᐦᒋᐃᐢᑳᐧᑌᒥᕽ.
41ᐊᐱᒥᓬᐃᐠ ᒫᑲ ᑭ ᑕᓯᑫᐤ ᐊᓂᑕ ᐋᕒᐅᒪ; ᐁᑯᓯ ᓯᐸᓬ ᑭ ᐊᐧᔭᐃᐧᑎᓴᐁᐧᐤ ᑫᐊᓬᐊ ᒥᓇ ᐅᒋᐋᐧᒥᔨᐊᐧ, ᐁᑳ ᓯᑫᒥᕽ ᑭᑕ ᑕᓯᑫᔨᐟ. 42ᑭ ᐊᔨᑭᐣ ᒫᑲ ᐁ ᐊᑎ ᐋᐧᐸᕽ, ᐊᔨᓯᔨᓂᐊᐧᐠ ᑭ ᐃᑐᐦᑌᐊᐧᐠ ᑭᐢᑎᑳᓂᕽ; ᐁᑯᓯ ᑭ ᐃᐧᐦᑕᒪᐁᐧᐊᐧᐠ ᐊᐱᒥᓬᐃᑲ. 43ᑭ ᐅᑎᓀᐤ ᒫᑲ ᐊᔨᓯᔨᓂᐊᐧ, ᐁᑯᓯ ᓂᐢᑕᐧᔭᐠ ᑭ ᐸᑭᑎᓀᐤ, ᒥᓇ ᑭ ᐊᐢᑲᒫᒋᑫᐤ ᑭᐢᑎᑳᓂᕽ; ᑭ ᐃᑖᐱᐤ ᒫᑲ ᐁᑯᓯ ᐳᑎ ᐊᔨᓯᔨᓂᐊᐧ ᑭ ᐯ ᐊᐧᔭᐃᐧᔨᐊᐧ ᐅᑌᓈᕽ ᐅᐦᒋ; ᑭ ᒧᐢᑭᐢᑕᐁᐧᐤ ᒫᑲ ᐁᑯᓯ ᑭ ᓂᐸᐁᐤ. 44ᐊᐱᒥᓬᐃᐠ ᒫᑲ ᒥᓇ ᐊᓂᐦᐃ ᐁ ᒥᓀᔭᑎᔨᐟ ᑳ ᐃᐧᒉᐃᐧᑯᐟ, ᑭ ᐃᐢᐸᔨᐦᐅᐊᐧᐠ ᒥᓇ ᑭ ᓂᐸᐃᐧᐊᐧᐠ ᐁ ᐊᑎ ᐱᐦᑐᑫᕽ ᑭᐦᒋᐃᐢᑳᐧᑌᒥᕽ ᐅᑌᓈᕽ; ᐊᓂᑭ ᒫᑲ ᓂᓴᐧᔭᐠ ᑳ ᒥᓀᔭᑎᒋᐠ ᑭ ᒧᐢᑭᐢᑕᐁᐧᐊᐧᐠ ᑲᐦᑭᔭᐤ ᑭᐢᑎᑳᓂᕽ ᑳ ᐊᔮᔨᐟ, ᒥᓇ ᑭ ᓂᐸᐁᐊᐧᐠ. 45ᐊᐱᒥᓬᐃᐠ ᒫᑲ ᑭ ᓄᑎᓇᒼ ᐊᓂᒪ ᐅᑌᓇᐤ ᐁᐊᐧᑳᐧᓂᒪ ᐁ ᑭᓯᑳᐠ ᑲᐯᑭᓯᐠ; ᐁᑯᓯ ᑭ ᐅᑎᓇᒼ ᐅᑌᓇᐤ, ᒥᓇ ᑭ ᓂᐸᐁᐤ ᐊᔨᓯᔨᓂᐊᐧ ᐁᑯᑕ ᑳ ᐊᔮᔨᐟ; ᒥᑐᓂ ᒫᑲ ᑭ ᐱᑯᓇᒼ ᐅᑌᓇᐤ ᐁᑯᓯ ᓯᐃᐧᑖᑲᐣ ᒥᓯᐁᐧ ᑭ ᐃᓯᐁᐧᐱᓇᒼ.
46ᐃᐢᐱ ᒫᑲ ᑲᐦᑭᔭᐤ ᐊᔨᓯᔨᓂᐊᐧᐠ ᓯᑫᒼ ᐊᓱᐃᐧᑲᒥᑯᕽ ᐱᔦᐦᑕᐦᑭᐠ ᐁᐊᐧᑫᐧᔨᐤ, ᑭ ᐱᐦᑐᑫᐊᐧᐠ ᐋᐧᑎᕽ ᐅ ᐋᐧᐢᑳᐦᐃᑲᐣ ᐁᓬᐱᕒᐃᐦᐟ. 47ᑭ ᐃᐧᐦᑕᒪᐋᐧᐤ ᒫᑲ ᐊᐱᒥᓬᐃᐠ ᑲᐦᑭᔭᐤ ᐊᔨᓯᔨᓂᐊᐧ ᓯᑫᒼ ᐊᓱᐃᐧᑲᒥᑯᕽ ᐁ ᒫᐊᐧᒋᐦᐃᑐᔨᐟ. 48ᐊᐱᒥᓬᐃᐠ ᒫᑲ ᑭ ᐋᒪᒋᐁᐧᐤ ᓵᓬᒪᐣ ᐊᐧᒋᕽ, ᐃᐧᔭ ᒥᓇ ᑲᐦᑭᔭᐤ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ; ᐊᐱᒥᓬᐃᐠ ᒫᑲ ᑭ ᐅᑎᓇᒼ ᒋᑲᐦᐃᑲᐣ ᐅᒋᐦᒋᕽ, ᐁᑯᓯ ᑭ ᑭᐢᑲᑕᐊᒼ ᐸᐢᑫᑎᑲᐧᐣ ᒥᐢᑎᑯᕽ ᐅᐦᒋ, ᑭ ᐅᑎᓇᒼ ᒫᑲ ᒥᓇ ᑭ ᐅᓂᑳᑕᒼ; ᐁᑯᓯ ᑭ ᐃᑌᐤ ᐊᔨᓯᔨᓂᐊᐧ ᑳ ᐃᐧᒉᐃᐧᑯᐟ, ᐊᓂᒪ ᑳ ᑭ ᐋᐧᐸᒥᔦᐠ ᐁ ᐃᑐᑕᒫᐣ, ᑲᑫᐧᔮᐅᐠ, ᐁᑯᓯ ᑭᐢᑕᐋᐧᐤ ᐃᑐᑕᒧᐠ. 49ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᐃᐧᐢᑕᐋᐧᐤ ᑳ ᐃᑕᓯᐟ ᐊᔨᓯᔨᓂᐤ ᑭ ᑭᐢᑲᑕᐊᒼ ᐅ ᐸᐢᑫᑎᑲᐧᐣ ᒥᓇ ᑭ ᐱᒥᑎᓴᐁᐧᐊᐧᐠ ᐊᐱᒥᓬᐃᑲ, ᐁᑯᓯ ᑭ ᐊᐢᑖᐊᐧᐠ ᐊᐧᑎᕽ ᒥᓇ ᑭ ᓴᐢᑲᐊᒣᐧᐊᐧᐠ ᐊᓂᒪ ᐋᐧᑎ; ᐁᑯᓯ ᑲᐦᑭᔭᐤ ᒥᓇ ᐊᔨᓯᔨᓂᐊᐧᐠ ᓯᑫᒼ ᐊᓱᐃᐧᑲᒥᑯᕽ ᐅᐦᒋ ᑭ ᓂᐱᐊᐧᐠ, ᓈᐣᑕᐤ ᑭᐦᒋᒥᑖᐦᑐᒥᑕᓇᐤ ᓈᐯᐊᐧᐠ ᒥᓇ ᐃᐢᑫᐧᐊᐧᐠ.
50ᐁᑲᐧ ᐊᐱᒥᓬᐃᐠ ᑭ ᐃᑐᐦᑌᐤ ᑎᐱᓯᕽ ᑭ ᑲᐯᓯᑐᑕᒼ ᒫᑲ ᑎᐱᐢ ᒥᓇ ᑭ ᐅᑎᓇᒼ. 51ᒫᑲ ᑭ ᐃᐦᑕᑲᐧᐣ ᐁ ᓱᑲᕽ ᐊᓱᐃᐧᑲᒥᐠ ᐱᐦᒋ ᐅᑌᓈᕽ, ᐁᑯᓯ ᐁᑯᑌ ᑭ ᐃᑖᒧᐊᐧᐠ ᑲᐦᑭᔭᐤ ᓈᐯᐊᐧᐠ ᒥᓇ ᐃᐢᑫᐧᐊᐧᐠ, ᒥᓇ ᑲᐦᑭᔭᐤ ᐊᓂᑭ ᐅᑌᓈᕽ ᐅᐦᒋ, ᐁᑯᓯ ᑭ ᑭᐸᐅᓱᐊᐧᐠ, ᒥᓇ ᑕᐦᑯᐨ ᐊᓱᐃᐧᑲᒥᑯᕽ ᑭ ᐃᑐᐦᑌᐊᐧᐠ. 52ᐊᐱᒥᓬᐃᐠ ᒫᑲ ᑭᓯᐋᐧᐠ ᑭ ᐃᑐᐦᑌᐤ ᐊᓱᐃᐧᑲᒥᑯᕽ, ᐁᑯᓯ ᑭ ᓄᑎᓇᒼ, ᐁᑯᓯ ᑭᓯᐋᐧᐠ ᐁ ᐃᐢᑳᐧᑌᒥᐊᐧᕽ ᐊᓱᐃᐧᑲᒥᐠ ᑭ ᐃᑐᐦᑌᐤ ᐁ ᐃᐧ ᓴᐢᑲᐊᕽ ᐃᐢᑯᑌᐤ ᐅᐦᒋ. 53#2 ᓵᒼᔪᐃᓬ 11:21ᐯᔭᐠ ᒫᑲ ᐃᐢᑫᐧᐤ ᐊᓂᐦᐃ ᑳ ᑕᑯᑕᐱᔨᐟ ᐱᓂᐳᒋᑲᐣ ᐊᓯᓂᔭ ᑭ ᐱᒧᓯᓈᑌᐤ ᐊᐱᒥᓬᐃᑲ ᐅᐢᑎᑳᐧᓂᔨᐠ, ᐁᑯᓯ ᑭ ᐹᐢᑕᐊᒣᐧᐤ ᐅᐢᑎᑳᐧᓂᑲᓂᔨᐤ. 54ᑭᔨᐸ ᒫᑲ ᑭ ᓇᑐᒣᐤ ᐅᐢᑭᓂᑭᐊᐧ ᑳ ᑕᐦᑯᓇᒥᔨᐟ ᐅᐟ ᐊᓱᐃᐧᓇ, ᒥᓇ ᑭ ᐃᑌᐤ, ᐅᑎᐦᑎᓇ ᑭᐟ ᐃᓴᐁᐧᑯᒫᐣ ᒥᓇ ᓂᐸᐃᐣ, ᐁᑳ ᐊᔨᓯᔨᓂᐊᐧᐠ ᑭᑕ ᐃᓯᒋᐠ, ᐃᐢᑫᐧᐊᐧ ᑭ ᓂᐸᐦᐃᐠ. ᐊᓂᐦᐃ ᒫᑲ ᐅᐢᑭᓂᑭᒪ ᑭ ᓵᐳᐢᑕᐦᐅᐠ ᐁ ᑕᐦᑲᒥᑯᐟ, ᐁᑯᓯ ᑭ ᓂᐱᐤ. 55ᐃᐢᐱ ᒫᑲ ᐃᐢᕒᐁᐃᓬ ᐊᔨᓯᔨᓂᐊᐧᐠ ᐃᐧᔮᐸᐦᑕᑭᐠ ᐊᐱᒥᓬᐃᐠ ᐁ ᓂᐱᔨᐟ, ᑭ ᓯᐯᐧᑌᐊᐧᐠ ᑲᐦᑭᔭᐤ ᐊᔨᓯᔨᓂᐤ ᐃᐧᔭ ᐅᐟ ᐃᐦᑖᐃᐧᓂᕽ.
56ᐁᑯᓯ ᐅᒪ ᑭᓭᒪᓂᑐᐊᐧ ᑭ ᐃᓯ ᒥᐢᑯᒋᐸᔨᑖᐧᐠ ᐅ ᒪᒑᔨᐃᐧᐣ ᐊᐱᒥᓬᐃᐠ, ᑳ ᑭ ᐃᐦᑐᑕᐋᐧᐟ ᐅᑖᐃᐧᔭ, ᐁ ᓂᐸᐦᐋᐟ ᑳ ᑌᐸᑯᐳᒥᑕᓇᐁᐧᔨᐟ ᐅᒋᐋᐧᒪ; 57ᒥᓇ ᑲᐦᑭᔭᐤ ᐅ ᒪᒑᔨᐃᐧᓂᐋᐧᐤ ᓯᑫᒼ ᐊᔨᓯᔨᓂᐊᐧᐠ ᑭᓭᒪᓂᑐᐊᐧ ᑭ ᒥᐢᑯᒋᐸᔨᑖᐧᑲᐧᐠ ᐅᐢᑎᑳᐧᓂᐋᐧᕽ; ᐁᑯᓯ ᐁᐊᐧᑯᓂᐠ ᑭ ᐅᑎᐦᑎᑲᐧᐠ ᐅ ᓈᓂᐳᒥᐁᐧᐃᐧᓂᔨᐤ ᒑᐦᑖᒼ ᐅᑯᓯᓴ ᒉᕒᐊᐯᐊᓬ.
Currently Selected:
ᐅᔭᓱᐁᐧᐊᐧᐠ 9: KKMs
Highlight
Copy
Compare
Share
Want to have your highlights saved across all your devices? Sign up or sign in
This Bible text is a corrected edition of the 1908 Western Cree Bible; it is in the public domain.
